Ads by Google Ads by Google

Sapaia e isi o le atunuu ulua’i suiga ua faia e Lolo ma Lemanu

Ua faaalia e ni isi o le atunuu lo latou lagolagoina ma sapaia o ulua’i suiga ua faia e le afioga i le Kovana Sili, Lolo Matalasi Moliga ma le Lutena Kovana, Lemanu Peleti Mauga, e pei ona faasalalauina i le vaiaso na te’a nei atoa ai ma le amataga o le vaiaso nei.

Na taua e Fa’afili Lemafa o Tafuna ma Manu’a e faapea, o suiga ua faia e Lolo ma Lemanu, o le ulua’i la’asaga lea o le manuia o le la nofoaiga.

“O ni suiga talafeagai toe sa’o le taimi ua amataina ai,” o le saunoaga lea a Lemafa, o se tama ua 6 tausaga talu ona malolo litaea mai le malo o Amerika Samoa, a’o galue ai mo le 30 tausaga i le Matagaluega o Galuega a le malo.

“Ua oo i le taimi ua tatau ai ona faamaopoopo meatotino a le malo e ona ta’ita’i, ua o’o fo’i i le taimi ua tatau ai ona mataalia ta’ita’i i le faasaoina o tupe a le malo mai le soona faaalu i gaioiga e le o mana’omia,” o le isi lea saunoaga a Lemafa i le Samoa News.

Ae na taua e ni alii faipisinisi se toalua i le atunu e aofia ai Faalupega Levaula o Pago Pago ma Lofipo Meleisea o Nuuuli e faapea, afai e finagalo le kovana ma le lutena kovana e tausisi ma faamamalu suiga ua la faailoa, e tatau ona unaia Faatonusili o Matagaluega ma Ofisa a le malo e faamalosia suiga ma tumau ai.

“Ua oo i le taimi ua tatau ai ona taofi faiga soona fai o lo o vaaia e le atunuu i mea totino a le malo, e le gata o le tafili saunoa o ni isi o tagata faigaluega i taavale a le malo, ae o taimi faigaluega foi e tatau ona matua mataalia i ai ta’ita’i, ina ia mautinoa e manava uma tagata faigaluega a le malo i le 4:00 i le afiafi, ae le o le 2:00 po o le itula e 3:00 fo’i,” o le saunoaga lea a Meleisea.

I le avea ai o le susuga a Meleisea ma tagata faipisinisi mo le silia i le 20 tausaga, sa ia taua ai e faapea, e mafua ona taumafai le tagata faipisinisi e taofiofi le soona faaalu o ana tupe, ina ia tumau ai pea tulaga manuia o le pisinisi ma aua ai ne’i gau, e tatau foi ona faapena le malo, e tatau ona taofiofi le soona faaalu o ana tupe i mea e le manaomia atoa ai ma le puipui malu o ana meatotino, ina ia tulaga lelei ai pea le faagasologa o galuega a le malo.

O le aso Tofi na te’a nei ina ua maea le faatautoina o Lolo ma Lemanu e avea ma taitai o le malo mo le isi 4 tausaga, na sainia ai e le tofa Lolo ni poloaiga faalauaitele se 4 e faalauiloa mai ai ni isi o suiga ua la finagalo ma Lemanu e tatau ona faamalosia i totonu o le malo.

O ni isi o ia suiga e aofia ai le taofia o le toe faa faigaluegaina o ni isi tagata faigaluega fou, taofia uma avanoa faigaluega sa faa faigaluegaina mai i le 6 masina talu ai, sei vagana ua avanoa ni alagatupe e totogi ai ona faatoa toe faaauau lea, atoa ai ma le poloaiga e taofia ai le toe soona faaaoga o taavale a le malo i le mae’a ai o taimi faigaluega.

O ni isi o vaega taua sa talanoaina i le ulua’i fono a le Kapeneta a Lolo ma Lemanu i le aso Faraile na te’a nei, o le faamalosia lea o taimi faigaluega mo tagata faigaluega uma a le malo.

Na taua e se sui sa auai i lea fonotaga e faapea, na faamanino e le alii kovana i le Kapeneta e faapea, afai e manatu Faatonu ua tatau ona amata faamalosia suiga ua fuafuaina e le alii kovana, lona uiga e tatau ona oo atu i le 7:30 i taeao uma lava ua taunuu tagata faigaluega uma i ofisa e galulue ai.

O le itula e 7:30 e oo atu i le 4:00 i le afiafi, o le taimi faigaluega faatulagaina lea mo le malo, e pei ona faailoa e Lolo i sui o lana Kapeneta.

Mo malologa o le aoauli, e afa itula e faaalu ai, ma le ta’i 15 minute mo malologa pupu’u i le ogatotonu o le taeao atoa ai ma le ogatotonu o le aoauli.

O se tasi o faasea e masani ona faaleo e le atunuu i luga o le polokalame a le kovana ua mavae atu i faaiuga o vaiaso taitasi, o le fiu lea e tau saili se avanoa mo le Faatonusili i lona Ofisa, ae sau le tali a le tamaitai tali telefoni, “o le Faatonusili e le’i usu atu.”

Na taua e Meleisea e faapea, e le tatau ona toe faalogoina lea ituaiga leo i le nofoaiga fou ua amataina nei.