Ads by Google Ads by Google

Sao Amerika Samoa - BPW Lalolagi

E to’atolu sui iloga lava na faia o latou sao o Amerika Samoa i le fonotaga a Tina Galulue Faipisinisi o le Lalolagi ina ia latou fa’asoa mai o latou lagona, fa’asea, ae maise o lu’iga sa latou uia mai ai lea ala fita, a’o taumafai e fa’aolaola, fa’atautaia pe galulue fo’i i tofi ma pisinisi o lo’o fa’alagolago i so latou sao e ola ai.

O i latou nei o sui talavou o le atunu’u: Nadine Solofa - Taufa’asau; Filifotu Va’ai ma Tuai Auva’a - Mua.

O Nadine Solofa Taufa’asau; o lo’o galue nei i le Kamupani a le Ace American Industries o le Operations Manager; peita’i sa soifua a’e o ia i ona matua, Mark & Cecilia Solofa o se tama’ita’i faigaluega i le Pisinisi Inisiua a ona matua, ma e le’i faigofie ai ia te ia, ona talosaga i sona avanoa mai se tasi Kamupani, ina ua ia tu’ua lana ulua’i galuega lena i lona aiga.

O le auau o lona taofi, sa ia fa’apea ai, “Afai e te fia savali i luga o le vai, oso ese mai le va’a!” O le a le va’a, o le va’a o fa’ase’e malie ai, i le tele o mea ua tausia lelei ai oe e ou matua, ma ua avea ma mea faigofie ia te oe, ona e maua mea uma, ae e te le o ola lava oe ia te oe!

O se tautalaga matagofie, aua o le to’atele o fanau a Samoa e matele ina fa’ase’e fa’apea o latou olaga, e fa’amoemoe le tele o pili totogi, o lo’o seu fa’atasi i totonu o le lotoifale o le aiga e aofia ai le tama ma le tina, uso ma tuagane fa’atasi uma lava.

Ina ua oso ese mai le va’a, sa ia lagona le sousou, ae sa mausali lona fa’atuatua, sa lava ma totoe le taimi na fa’aa’oga ai o ia e ona Matua, ua ia te ia fo’i tomai atoatoa ona lelei, e gafatia ai ona fa’asao lona tagata mai lu’iga o le olaga tuto’atasi.

Sa ia molimauina, fesuia’iga o kia o le sa o le latou aiga, ina ua manatu lona tama e o mai i Samoa, toe sui fa’alua, ua manatu lona tama e o mai i Amerika Samoa. Ina ua matutua, ma to’esea le tama o le aiga, na fa’ato’a faia ai loa lana fa’ai’uga, ‘oso ese mai le va’a lea!

Ina ua faigaluega i lea Kamupani, sa i ai lona fa’anaunauta’iga, e fia avea ma se tasi e auai i fonotaga a le Pulega o le Kamupani, e le’i atoa se tausaga, ae ua se’ei ai e fa’amaumau iugafono. Lea ua i’u ina fa’amanuia mai le fa’amaoni. Fa’afetai lea ua lagona se leo, ona o le tautua matavela.

I le sao o le tama’ita’i o Filifotu Va’ai, e iloga ai e talavou o ia, e le’i atoa fo’i se sefulu o tausaga o tautua i le Blue Sky Communications ma le Blue Sky Samoa. O ia lea ua avea ma Pule o Fa’asalalauga & Fefa’ataua’iga a lea Kamupani Telefoni. Sa amata mai o faigaluega i le Samoa Tel ae o ia o se tasi sa a’otauina fa’apitoa e Samoa ina ia fa’aau’upegaina o ia i tomai e mo’omia i ala o feso’ota’iga. Ua taliu mai ma fa’ailoga, ae le sao i le tele o omiga o pulega matutua o tutula’i i tofi e le lagona ai se leo o tama’ita’i talavou e le’i taitai le soifuaga i le faiga o ni tonu.

O lagona omia ia na mafua ai ona talosaga i avanoa i le Kamupani o i ai nei, ona e va’aia e ia, e to’atele le aufaigaluega i ana tupulaga, ua fa’aaogaina tatau fo’i le atamai ua i ai! Lea ua tula’i i tofiga tau pulega o lea Kamupani, ua ea lana taumafaiga, ae le gata ai i’ina, e ao ina si’itia fo’i se isi matalalaga fou ma aga’i pea i luga i le sitepu o le pulega!

E tele lu’iga na uia, ae sa mae’a tima’ia mai e matua, ia le vave ona fiu pe gata le taumafai, ua aoga i le soifua galue, ma ua tumau ai.

O Tuai Auva’a - Mua, o se tasi na sili ona matagofie lana folasaga, aua ua fa’ailoa mai lo la’ua talavou tele ma lana pa’aga, ae ua la’ua gafatia le 6 tausaga o fa’atautaia pea le la’ua pisinisi la’ititi, sa amata mai le latou fale nofo, ae ua fa’ai’u ane, ua faia se ofisa tu auala, ma ua saga fa’atuputeleina le fiafia i ai o tagata i a la’ua oloa fa’atau mai!

Na amata mai le tupe nono mai matua, ma le fa’atonuga e tatau ona toe mafai ona totogi mai! E leai se ofisa ae fa’aaogaina le fale o le latou aiga, e fai ma fale galue ma ofisa. E talavou, ae ua mafai ona lagona o la’ua leo, ua tali fo’i le fa’atuatua e alofa mai le Atua, pe afai e le fa’aititia i so’o se mea lou talitonuga, “e te le fa’atauina lou Atua i lou naunau i le tupe!”

Ia malosi e tete’e le tagata e o’o atu ia te oe, ae le talafeagai ana oloa ma lou talitonuga i lou Atua o e tapua’i ai! “O le lua tausaga muamua, o se folauga e matua faigata lava, ae ua masani ma le tiga ma faigata i lena vaitau o le galuega, lea ua se’e ai i ma’a o malie i le taimi nei!”

I nei folauga e tolu ua fa’afofogaina e le fonotaga a tama’ita’i galulue faipisinisi o Lalolagi, ua latou iloa ai, “I lotoifale o Amerika Samoa, o lo’o ua lagona le leo o tina i so’o se vaega, pe afai lava ua manatu le tina e fa’atino ana aia tatau, ua sili atu ona tele le avanoa mo tatou tina i’inei e faia ai o latou uiga ma fa’atino a latou taleni i so’o se ala, aua ua i tatou lava i Amerika!”