Ads by Google Ads by Google

Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea tau atu ai le tamaititi o Fatu i le fale o Iose o loo saofa’i mai ai le tamaloa faatoa taunuu mai lana malaga mai Savai’i.]

Na vaaia e Fatu foliga le mautonu o le tamaloa o Iose ina ua ia maua atu i le fale, ma ua atili ai o lea o loo pisi suesuega a leoleo i le mafuaaga o le maliu o si ona tama fai o Pulusi, ae o  lea foi na faafuase’i ona malaga ese atu ma lona aiga le tamaloa o Iose. “O lea fo’i faakoa kaugu’u mai i le fale, ga ou sau i le va’a o le aoauli,” o le tali atu lea a Iose i le fesili a Fatu faatasi ai ma lona tauanau o le tamaititi e alu atu la te aai i le meaai a le latou aiga lea ua fai.

O le mafutaga a Fatu ma le tamaloa o Iose, e matua mafana lava, aua o le tele o aso e nofo toatasi ai na o Fatu i le la aiga ma Pulusi ao ola le toeaina, o le fale lava o Iose e eva ai le tamaitiiti, ma o isi aso e moe ai lava ona e leai se isi late to’alua. Na ona sese’e atu lava o Fatu i tafatafa o Iose, alu loa  i le atoa ma lana ai i le kuka a le fafine o Lumepa lea na  faatali ai le malaga, ao le gutu latou ia e le malolo i le fai lea o tala tau faasese e vivii ai le Lumepa ma lana kuka manogi lea ua ai ai.

Sei o tatou liliu atu lava i le sailiga a leoleo ia ua taunuu i Salafai, O le ta tonu o le itula e 8 i le taeao lea na taunuu ai loa leoleo i totonu o le nuu ma amata tuu fesilisili i tagata na tau atu ai, pe latou te iloaina se tagata e igoa ia Iose, ae o le tali lea o loo tuu ane e tagata, latou te le iloaina se tagata faapena. O le fale mulimuli lava lea e tu i le tulimanu o le nuu na afe ai loa leoleo ma malolo ai, ae latou maua ai loa faamatalaga uma e uiga ia Iose ma le aiga lea na nofo ai.

“Se faamolemole lava pe maua mai Iose,?” o le fesili lea a le alii leoleo lapo’a lea e faauluulu i ai le vaega suesuega o loo malaga taamilo i le nuu. “O Iose ua toe fo’i atu i Apia i le aso ananafi, e le o toe iinei,” o le tala lea a le teineititi lea na tau atu i ai leoleo. O le taimi lava na maua ai e leoleo le tala lea, na latou toe solomuli mai ai loa ma o latou toe agai atu loa e tuli le vaa moe mo Apia i le afiafi lea, peitai e taunuu atu loa leoleo i le uafu ae o latou  vaaia le vaa ua malaga ese atu. Na manino foi i manatu o alii leoleo, o le tagata lea na o latou talanoa i le aso na faatoa taunuu atu ai i le nuu, o ia tonu lea o Iose, e iloa gofie lava i lana talanoa ma lona taumafai e fai se auala ina ia aua ai nei o latou asia le nuu i le aso lea, ae na manatu e tuu le sailiga seia aulia le aso fou o loo sosoo  ai.