Salu: Tulaga lelei faleaoga talu mai suiga fou ua faia

Talu mai suiga ua faia e le malo e ala i le tu’uina atu o le vaega e faatinoina galuega toe lipea (Maintenance Division) a le Matagaluega o Aoga, i lalo o le vaavaaiga a le Matagaluega o Galuega Lautele, ua maitauina le tulaga lelei o faleaoga i soo se vaega o le atunuu, e pei ona taua e le Faatonusili o Aoga i lana molimau i luma o le Komiti o Aoga a le maota o sui i le vaiaso nei.

 

Na taua e Vaitinasa Dr. Salu Hunkin-Finau e faapea, i le tele o tausaga talu ona i ai le vaega a le ‘Maintenance Division’ i lalo o le vaavaaiga a le Ofisa o Aoga, sa tele faafitauli na feagai ma le Ofisa i le tali atu i manaoga mai aoga taitasi, e le gata i le tuai lea ona taunuu mea faigaluega (materials) e faatino ai galuega mo le toe faaleleia o aoga, ae alu se taimi o taumafai le Ofisa o Aoga e uia auala e oka ai mea faigaluega e mana’omia.

 

“O le taimi nei, ua faigofie gaioiga uma mo le faatauina mai o mea faigaluega o lo o manaomia i galuega, ina ua tuu atu le galuega i lalo o le vaavaaiga a le Ofisa o Galuega a le malo, e le gata ua vave maua mea faigaluega o lo o manaomia ae ua faigofie ai fo’i ona tali atu i manaoga mai aoga taitasi i le atunuu,” o se vaega lea o le saunoaga a Vaitinasa i luma o le komiti o Aoga, ina ua fesiligia e faipule e uiga i lenei mataupu.

 

“O tausaga ua mavae, e alu se taimi o tau oka e le Ofisa o Aoga mea faigaluega e manaomia mo le faafouina ma le toe faaleleia o faleaoga, o isi fo’i taimi e tau alu ni masina o tau saili po o fea tonu mea faigaluega e fetaui mo le galuega, ae o le taimi nei, ua lelei fesootaiga ua faia e le Ofisa o Galuega Lautele a le malo, ua vave fo’i feuiaiga uma ua faia, ma ua faa faigofie ai ona tali manaoga e tula’i mai i aoga eseese i le atunuu,” o le isi lea saunoaga a le faatonusili o aoga.

 

Saunoa Vaitinasa e faapea, o se fautuaga na afua mai i le afioga i le alii kovana ia Lolo Matalasi Moliga, ina ia tuuina atu le vaavaaiga o le vaega a le ‘Maintenance Division’ i lalo o le Ofisa o Galuega Lautele a le malo, ina ia taula’i sa’o ai le Ofisa o Aoga e faatino lana manulauti, o le a’oa’oina lea o fanau aoga ina ia popoto ma atamamai.

 

O le masina o Novema 2013 e pei ona taua e Vaitinasa i luma o le komiti, na aveese mai “Maintenance Division”, ae tuu atu i le vaega o Galuega Lautele.

 

Pau tagata faigaluega o lo o taofia pea i lalo o le vaavaaiga a le Ofisa o Aoga e pei ona saunoa le tamaitai faatonu, o tagata Teufale mo aoga taitasi i le atunuu, ona o tulaga i vaega tupe o lo o totogi ai latou ua mafua ai ona tumau pea i lalo o le vaavaaiga a le Ofisa o Aoga.

 

O se tasi o vaega sa fesiligia e ni isi o faipule, o i latou ia ua tofia e le alii kovana e fai ma Fesootaiga mo ni manaoga e tula’i mai i aoga i totonu o le atunuu.

 

Na faamanino e Vaitinasa e faapea, o i latou e to’atolu ua tofia e fai ma fesootaiga a le Ofisa o Aoga i Itumalo ta’itasi (District DOE Coodinator), mo le faailoa i ai o manaoga e tula’i mai i totonu o aoga, ua vaevaeina i le itu i Sasa’e, Ogatotonu i le taulaga faapea ai ma Sisifo.

 

Na taua e le alii faipule ia Fetu Fetui Jr lona lagolagoina o le suiga ua faia e le alii kovana, ina ia ave atoa ai le taimi o faiaoga ma le matagaluega atoa e a’oa’o ai fanau aoga, nai lo le felefele solo i isi manaoga e le aoga.

 

Ae na saunoa le afioga i le alii faipule ia Larry Sanitoa e faapea, pau lona popolega i le mataupu lenei, na pasia e le Fono Faitulafono le paketi e tuu atu ai le faatupeina ma le vaavaaiga o le Maintenance Division a le Ofisa o Aoga, i lalo o le Ofisa o Aoga, ae foliga mai ua faia le fesuiaiga i se auala ua soli ai le tulafono.

 

Saunoa le afioga i le tamaitai faipule ia Vui Florence Vaili Saulo e faapea, o se tasi o itu faamomoi loto sa ia maitauina i ni isi o aoga i lona itumalo o Tualauta, e i ai isi tamaiti aoga e nonofo i lalo ona e le lava nofoa ma kesi e faaaoga i totonu o potu aoga.

 

Sa fia malamalama Vui pe aisea e tupu ai lea faafitauli, ae aisea fo’i e le lava ai nofoa ma kesi mo aoga eseese i le atunuu e aofia ai ma lona itumalo.

 

Na faamanino e Vaitinasa e faapea, o le isi lea vaega o lo o maofa ai le matagaluega, o le televave ona leaga o kesi ma nofoa o lo o la’u mai e faaaoga e fanau aoga i aoga eseese, ae o le fausaga o nofoa ma kesi o lo o la’u mai e matua faigata lava ona leaga, e ono oo atu i le 10 tausaga le umi e aoga ai pe a faaaoga lelei.

 

Fai mai le faatonusili, afai e oka i le masina lenei nofoa ma kesi mo aoga o lo o i ai le manaoga, e taunuu le oka i totonu o le 6 masina, ua tele atu isi aoga ua manaomia nisi kesi ma nofoa ae laititi le oka na aumai.

 

“I se isi faaupuga, e televave atu ona leaga kesi ma nofoa nai lo le gaioiga e toe faatumu ma oka mai ni nofoa ma kesi fou,” o le saunoaga lea a Vaitinasa.

Comment Here