O se tina sa ia sainia ni siaki se 7 ma ia talaina mai i le pamu kesi o le Airport Way Gas Station i Tafuna, ua molia nei o ia e le malo i moliaga mamafa e lua, o lona sainia lea o ni siaki mai se teugatupe ua ia iloa ma mautinoa ua tapunia, atoa ai ma le moliaga o le gaoi.

O le aso Tofi na tula’i ai le tina o Linnea Samatua i luma o le faamasinoga faaitumalo mo le ulua’i e tali atu i tuuaiga a le malo, lea na ia faailoa ai loa i le faamasinoga, o ia ua mana’o e tuu sa’o atu lana mataupu i luma o le faamasinoga maualuga e faaauau ai.

Sa talia e le alii faamasino ia John Ward II le talosaga a Samatua tauala atu i lana loia fautua, ma tuuina atu ai loa lana mataupu i luma o le faamasinoga maualuga, lea e pei ona tulai ai i le taeao ananafi ma ia teena tuuaiga a le malo.

I lona teena ai o tuuaiga a le malo faasaga ia te ia i le taeao ananafi, ua faatulaga ai loa lana uluai iloiloga e faia lea i le masina o Oketopa.

O lenei mataupu na tofu atu i le ofisa o leoleo, ina ua talosagaina e le tamaitai pule o le kamupani a le MHJ Development Corporations sa latou fesoasoani, ona o siaki e 7 na tala e le ua molia i le latou pisinisi, lea ua toe faafoi uma atu e le faletupe e leai se tupe o i ai.

O le kamupani a le MHJ Development Corporation, o le kamupani lea na te puleaina le pamu kesi o le Airport Way Gas Station ma le Halecks Service Center.

I le tauaaoina ai e le ofisa o leoleo o lenei mataupu, na tofia ai loa le alii leoleo suesue ia Det. Foma’i Papule na te suesueina lenei mataupu.

E tusa ai ma suesuega sa faia e le alii leoleo suesue ia Det. Papule na taua ai e faapea, e 7 siaki na saini e Samatua ma tala mai i le kamupani o loo taua. O siaki e 7 e maua ai le tupe e $570, ona faaopoopo lea i ai ma le sala a le faletupe ona o siaki sa toe faafoi atu e leai se tupe o i ai, lea e tai $25 i le siaki e tasi, ona maua ai lea o le tupe atoa e $745 o loo nofo aitalafu ai le ua molia i le kamupani.

E 5 siaki na saini e le ua molia ma tuuina atu i le pamu kesi o le Airport Way Gas Station ae lua siaki sa ia saini ma tuuina atu i le Haleck Service Center.

O le siaki muamua sa saini i le so 12 Mati 2012 i le aofai e $100, ona sosoo ai lea ma le siaki lona lua i le aso 17 Mati i le aofai foi e $100, peitai o se taimi o le aso lava foi lea sa ia sainia ai le isi siaki e $100 ma ia talaina mai faatinoitupe (cash) mai le pamu kesi.

O se taimi o le aso lava lea sa sainia ai e le ua molia le isi siaki i le aofai e $100, ma le siaki lona lima e $50 sa ia sainia i le aso 23 Mati.

O siaki e lua sa sainia ma tuuina atu i le Halecks Service Center e aofia ai le siaki e $60 ma le isi foi siaki e $60 sa sainia i le aso 25 Mati.

Ina ua toe faafoi atu e le faletupe siaki i le kamupani, sa latou tuuina atu ai loa se tusi i le aso 3 Aperila i le ua molia, e fesiligia ai le mataupu e pei ona tulai mai, ma talosagaina o ia ina ia toe totogi atu le tupe o loo nofo aitalafu ai i le kamupani.

E tusa ai ma faamaumauga a le faamasinoga o loo taua ai, ina ua maua e le ua molia le tusi mai le pule o le kamupani, sa ia toe totogi atu ai loa le $100 i le kamupani i le aso 9 Aperila, $50 sa toe totogi atu i le aso 20 Aperila, ma le isi $50 sa toe totogi atu i le aso 11 Iuni.

O loo taua foi i faamaumauga a le faamasinoga se feiloaiga a le kamupani ma le ua molia ma lona mother-in-law i le masina o Mati, mo le tau faatulagaina o se feagaiga e toe totogi ai le tupe o loo ia aitalafu ai, peitai na fiu le kamupani e faatali le toe totogiina atu o le tupe e lei faia e le ua molia.

O le aso 3 Iulai na toe auina atu ai e le kamupani le isi tusi ia Samatua e uiga lava i lenei mataupu, peitai sa leai alva se tali na tuuina atu e le ua molia.

O loo taua e le kamupani e faapea, i tua o siaki sa sainia e le ua molia, o loo ia tusia ai le numera o lana telefoni o le 688-7791, peitai ua maua e le kamupani, o lana telefoni sa’o o le 688 7691.

E tusa ai ma le tusi a le kamupani sa tuuina atu ia Samatua i le aso 3 Iulai 2012, o loo taua ai e faapea, toe $585 le tupe o loo nofo aitalafu ai le ua molia i le latou kamupani, o lea tupe e aofia ai siaki sa ia sainia faatasi ai ma le sala i le faletupe mo siaki sa toe faafoi atu e leai se tupe o i ai i totonu.

Ua tatalaina i tua Samatua ina ua ia totogiina le $3,000 na faatulaga e le faamasinoga, i lalo o poloaiga e ao ona ia usitai i ai.

O nisi o ia poloaiga e aofia ai le faasa lea ona ia toe alu i le pamu kesi lea o loo tuuaia na ia talaina ai siaki, ua faasa foi ona ia taumafai e toe faafesootai tagata faigaluega o loo galulue ai poo le pule foi, a ia avea o ia ma tagatanuu lelei e usitai ma tausisi i tulafono a le malo i soo se taimi.

Ua poloaina foi e le faamasinoga le taofia o lona tusi folau e le malo, sei maea lana mataupu ona faatoa tatalaina lea i tua.