Ads by Google Ads by Google

Saini maliliega i le va o Amerika Samoa ma Samoa

TALIA TALOSAGA TUILAEPA - FESUIA’I FANUA, SUI FAIGA PEMITA

Ua maea nei ona sainia se maliliega i le va o Samoa e lua, e faailoa mai ai faaiuga o mataupu sa talanoaina i le fonotaga a taitai o malo i le Aso Gafua na te’a nei, ma o nisi o ia faaiuga e aofia ai le taliaina e le kovana sili o le talosaga a le alii palemia i se auala e faafesuia’i ai fanua e fausia ai Ofisa i totonu o malo e lua, atoa ai ma suiga i pemita e ulufale mai ai tagata Samoa i le teritori.

Saunoa kovana Togiola Tulafono i le Aso Gafua na te’a nei, o le a faaauau ona ia faailoa mai i tusitala nisi o faaiuga ua maea ona malilie i ai malo e lua, ina ia silafia e le au tusitala tulaga uma nei ma faalauiloa atu ai i le atunuu faaiuga o nei mataupu.

Ae na saunoa le susuga Tuilaepa Lupesoliai Sailele Malielegaoi e faapea, o le faaiuga lea ua la sainia ma le kovana sili, ua faailoa atu ai le tatalaina o faitoto’a uma mo soo se manaoga i le va o atunuu e lua, ina ia faafaigofie ai tulaga o fefaatauaiga ma femalagaaiga mo tagata lautele.

“Lona uiga o le a le toe tau faatali le aufaigaluega i se tali e avatu, ae o a mea uma e tutupu, na ona fesootai lava o aufaigaluega a malo e lua faatino loa aua o lea ua tatala atu le faitoto’a e ta’ita’i, sei vagana o ni itu ogaoga e ono aafia ai tulafono, ona toe fesili mai lea mo se isi tali e avatu,” o le saunoaga lea a le afioga i le alii Palemia a Samoa.

Ae na saunoa Togiola e faapea, o le maliliega ua sainia, o le faailoga moni lea o le galulue soosoo tauau o malo e lua ina ia faaauau pea le naunau e galulue vavalalata.

FA’AFESUIA’I FANUA VA O SAMOA E LUA

O se tasi la o pine faamau o le naunau ina ia galulue vavalalata malo e lua, ua talia ai e Togiola ma lana faigamalo le talosaga a le alii Palemia ma lana aumalaga, ina ia faafesuia’i ni fanua ta’i eka le lapopo’a i le va o atunuu e lua, e fausia ai o la Ofisa mo le faafaigofieina o faaiuga i mataupu e moomia ai tulaga o fela’uaiga ma femalagaaiga.

E lei faailoa mai e Togiola poo fea lea o le a faamatuu atu ai se fanua mo Samoa, peitai i le talosaga a Tuilaepa ia Togiola sa ia taua ai e faapea, afai e maua atu se fanua e tasi le eka mo Samoa i Tafuna, o le a faafesuia’i foi e Samoa se fanua mo Amerika Samoa e tasi fo’i le eka,  se nofoaga matagofie toe savili, e fausia ai ofisa mo atunuu e lua.

Na faailoa e Tuilaepa i le feiloaiga ma tusitala e faapea, o le taua o le i ai o se Ofisa o Amerika Samoa i Samoa, ina ia faa faigofie ai feutanaiga ma talanoaga i mataupu e tula’i mai i taimi faafuase’i, lea fo’i e pei ona i ai le Ofisa o le Konesula a Samoa i Amerika Samoa nei.

O le faamaoniga o lea tulaga lelei e pei ona saunoa Tuilaepa, ua mafai ai ona talia e Samoa talosaga a isi atunuu e pei o Niu Sila, Amerika, Ausetalia, Saina ma Iapani ina ia maua ni o latou fanua i Samoa e faatutu ai o latou ofisa, ae o lea foi ua faafesuia’i ma fanua ua mafai ona ofo mai e atunuu nei mo Samoa, ina ia mafai ai ona fausia se ofisa o Samoa i totonu o laueeleele o ia atunuu.

O le masina foi lea ua faamoemoe e fausia ai le ofisa o le Amapasa o Iapani i totonu o Samoa, ina ua maea ona faamatuu atu i ai e le malo le fanua e tasi le eka mo lea faamoemoe, e pei ona saunoa Tuilaepa.

LE TOE I AI SE TALOSAGA E MANAOMIA MO LE PEMITA 14 ASO

Ae i le tulaga o le pemita e 14 aso, ua finagalo ai le malo o Amerika Samoa o le a le toe faia ni talosaga mai Samoa mo le pemita 14 aso pe afai e fia malaga mai se tasi iinei, ae o le a malaga sa’o mai lava le tagata, ona ‘stamp’ lea o lona tusi folau i le malae vaalele poo le uafu fo’i, o iina lea ua faatulaga e faatoa tauaao atu ai le pemita i le tagata o loo malaga mai, ina ia faigofie ai ona ulufale i Amerika Samoa mo fuafuaga e pei o faatauga ma faalavelave faaleaiga, poo nisi foi o asiasiga pupuu i uo ma aiga.

O lea faiga e pei ona saunoa Togiola, e le o aofia ai le pemita 30 aso.

Na faamaonia atili mai e le Palemia le tulaga lea ina ua fesiligia e tusitala. Saunoa Tuilaepa, o le taua o le tulaga e pei ona malilie i ai malo e lua, ia faafaigofie ai tulaga o fefaatauaiga.

Na pau le itu e le i mafai ona manino mai i le saunoaga a le Palemia, pe ua finagalo foi le malo o Samoa e taofi le pemita lea e ulufale atu ai i Samoa tagata Amerika Samoa e le o ni sitiseni Amerika, pe afai e fia asiasi atu i o latou aiga.

Fai mai Tuilaepa, o le taua lena o le Ofisa a Samoa o loo iinei, e mafai ona faafesoota’i i ai mataupu e fia malamalama i ai tagata Amerika Samoa.