O le vaiaso na te’a nei na sainia ai e le afioga i le kovana sili ia Lolo Matalasi Moliga pili taufaaofi e lua na pasia e le Fono Faitulafono, ma ua aloaia nei le avea o ia pili ma tulafono i totonu o le malo o Amerika Samoa.

O tulafono taufaaofi ua saunia nei e le alii kovana e aofia ai le Pili a le maota o sui 33-5 e faaulutalaina e faapea ‘O se pili e faaopoopo ai totino o le Komiti Faafoe o Femalagaaiga, ina ia faalautele atu ai totino ma faaopoopo ai foi le numera e mafai ai ona maua le kalama e faatino ai galuega a le komiti’, ma le Pili a le maota maualuga 33-3 e faaulutalaina e faapea,’O se tulafono e faaopoopo ai le aofai o totino o tagata tausi mavaega i le Vaega o le Litaea a le malo, ma faaopoopo atu ai ma o latou agavaa i le faatinoina o ia tiute.’

Na taua e le alii kovana i sana tusi i le fofoga fetalai o le maota o sui ia Savali Talavou Ale e faapea, o le faaopoopoina o le aofai o tagata e auai i komiti ma komisi taua faapenei a le malo e pei o le Komiti Faafoe o le Ofisa o Femalagaaiga, ua atagia mai ai le tuuina atu e le malo o le latou sao i le faaleleia lea o le tautua a lea Ofisa i totonu o le malo atoa.

“E le gata i lea, o le a mafai ai ona maua sui fou e tuuina atu mafaufauga fou ma metotia fou i taimi o faiga faaiuga a le komiti, ina ia mafai ai ona tali atu i atugaluga ma popolega o lo o faatula’i mai e le atunuu,” o se vaega lea o le tusi a Lolo ia Savali.

Na taua foi e Lolo ia Savali e faapea, o le pili na pasia e le fono ma ua ia sainia nei, o lo o taua ai le sui mai o le aofaiga o le komiti faafoe mai le aofaiga e 5 o lo o i ai i le 7, peitai o le tulafono sa ia faauluina i le fono, e sui mai ai le aofai o le komiti mai le 5 i le 9.

Fai mai Lolo, afai e i ai ni faafitauli e tulai mai i le lumana’i e faatatau i suiga ua faia, o le a mafai ona latou toe faasoa ai ma taitai o le fono i se taimi o i luma.

O le masina na te’a nei na pasia ai foi e le fono tofiga a le kovana mo i latou e toalima e avea ma totino o le komiti faafoe a le Ofisa o Femalagaaiga. O i latou nei e aofia ai Frank Gaisoa o le taitaifono o le komiti, Rev. Anetele’a Misioka, Fred Mamea, Sherry Bulter ma Moetulu’i Sipili Fuiava.

O le tulafono na pasia e le fono ma ua sainia nei e le alii kovana, o i latou e toa 7 o le a avea ma totino o le komiti faafoe o Femalagaaiga, ia avea i latou o Nesionale o le Iunaite Setete, ma o ni tagata foi e tupuaga mai i tuaa Amerika Samoa.

E le’i tuuina atu e le alii kovana i luma o le fono poo ai le isi toalua lea o le a ia tofia e faaopoopo i le toalima lea ua pasia e le fono e avea ma totino o le komiti faafoe o Femalagaaiga.

I le tusi a Lolo i le peresetene o le senate ia Gaoteote Palaie Tofau sa ia taua ai e faapea, na taua ai e Lolo le taua o le faaiuga ua faia e pasia ai suiga i le aofai o tagata tausi mavaega mo le litaea a le malo.

Sa ia taua foi e faapea, o le tofia ai o sui fou e avea ma totino o le komiti o tausi mavaega a le litaea, o le a maua ai manatu fou ma metotia e faaleleia atili ai le auaunaga a le komiti.

Sa ia faafetaia foi le atamai o le faaiuga ua faia e le Fono, e faatulaga atu ai ma le umi e tautua ai totino taitasi i totonu o le komiti ua latou pasiaina nei.

E toa 9 sui o le komiti o tausi mavaega a le litaea na finagalo le alii kovana e sui agai i ai le tulafono, peitai na sui e le fono i le toa 7, i le maea ai lea ona fesiligia e le fono o totino o le Ofisa o le Litaea i le itu lelei poo ni aafiaga e ono tulai mai pe afai ae sui le aofai o tagata tausi mavaega a le litaea.

O suiga la na pasia e le fono ma ua sainia foi e le kovana, mai le toa 7 o totino o le komiti o tausi mavaega, o le toalima o i latou nei o totino o le tupe a le litaea, ma le toalua e filiflia mai i tagata fapisinisi e le o ni totino o le litaea.

O i latou e toalima na ulua’i tofia e le kovana e avea ma totino o le komiti o tausi mavaega a le litaea e aofia ai Su’a Carl Schuster, Talalemotu Mauga, Avamua David Haleck, John Marsh ma Brant Judy, ma o i latou nei o le a avea ma totino o le komiti mo le e ta’i 5, 4, 3, 2 ma le tasi le tausaga.

Ina ua pasia e le fono le pili e pei ona sainia nei e le alii kovana, na toe tofia ai loa e le alii kovana isi sui e toalua e faaatoa ai le toa 7 o le komiti, ma o i laua ia e aofia ai Nanai Afuola Ma Toafala Iafeta.

O i latou uma nei e avea ma totino o le komiti o tausi mavaega a le litaea pe afai ae faamaonia e le fono faitulafno.