Ads by Google Ads by Google

Saini kovana paketi malo ae teena suiga a le Fono

Ua tauaao e le Fono Faitulafono se tusi mai le kovana sili ia Togiola Tulafono, e faailoa atu ai lona sainia o le tulafono sa latou pasia ai le Paketi a le malo, mo le Tausaga Tupe Fou 2013 lea na amataina i le aso ananafi, ae o nisi o suiga a le Fono sa faia ua ia teena.

E $497.2 miliona le aofai o le paketi a le malo mo le tausaga tupe 2013 na tuu atu i le Fono latou te pasiaina, peitai ina ua maea iloiloga a le Fono sa faia faatasi ai ma latou suiga na pasia, na faaitiitia ai loa le paketi i le $454.8.

O suiga sa faia e le Fono e aofia ai le pasia o le paketi a le ASPA mo le na o le 4 masina, aveese mai le $6.878 miliona mai totonu o le paketi, faatasi ai ma le aveese mai o le $1 miliona mai tupe o loo totogi atu e le malo i le falema’i o le LBJ, ae toe faasoasoa atu i isi Ofisa ma Matagaluega a le malo.

Na taua e Togiola i lana tusi i le aso 30 Setema i taitai o le Fono e faapea, o lana faaiuga e teena ai nisi o suiga sa faia i le paketi, o loo faavae mai lea i le leai o se faamalamalamaga na tuu atu e le Fono e faamalamalama atu ai le mafuaaga ua latou faaopoopo ai tupe i nisi o Ofisa ma Matagaluega a le malo.

Mo se faataitaiga o le $100,000 na faaopoopo e le Fono i le paketi a le Ofisa o Palota ua teena e Togiola, ona e leai se faamatalaga e faamanino atu ai le mafuaaga o lea faaopoopoga. Saunoa Togiola, e leai se talosaga na tuuina atu e le Ofisa o Palota ia te ia e uiga i se tupe o loo latou manaomia.

O isi suiga ua teena e le kovana e aofia ai le $140,000 lea na toe faaopoopo e le Fono i le teugatupe laiti mo nuu ma afioaga, e mafua mai ina ua leai se faamatalaga auiliili mai le Fono e faailoa atu ai le mafuaaga o lea suiga.

Na taua e Togiola e faapea, talu ai ua ia teena le vaega tupe sa toe faaopoopo e le fono i le teugatupe mo nuu, o le mafuaaga lea ua teena atoa ai le tupe e $240,000 sa fuafua mo le polokalame a nuu, ma le faamoemoe na te toe tuuina atu i le Fono se pili tupe e talosagaina ai se $100,000 e toe faatupe ai galuega mo afioaga i le atunuu.

O isi suiga a le fono ua teena e aofia ai le $329,500 sa fuafua e totogi ai le poloaiga a le faamasinoga mo le kamupani a le PIE; $10,000 mo le tane vai i le Aoga Tulagamuamua a Aunuu; $50,000 e faatau ai vailaau mo falema’i i Manu’a, $50,000 mo le Ofisa o le TAOA; ma le $68,000 mo le Matagaluega o Faatoaga.

Na taua e Togiola i lana tusi e faapea, i le mataupu e uiga i le tupe e totogi ai le poloaiga a le faamasinoga mo le kamupani a le PIE, e le o i ai se faamatalaga o faailoa atu ai le mafuaaga ua ala ai ona oo i le $329,500 le tupe ua manatu le Fono e tuu atu mo le PIE, ae o le poloaiga na tuuina mai e le faamasinoga maualuga, o loo manaomia ai le totogi atu e le malo o le tupe e $321,000.

Sa ia taua foi e faapea, o le masina o Aokuso o le tausaga nei na totogi atu ai e le malo le $25,000 i le PIE, ina ua poloaina e le faamasinoga le faataunuuina o lea tulaga, lona uiga e tatau ona toese mai le tupe lea mai le aofaiga sao o le tupe sa poloai e le faamasinoga le malo e totogi.

E oo foi i isi poloaiga a le faamasinoga o loo taua i totonu o le paketi na pasia e le Fono, ua teena uma e le kovana e pei ona ia taua i lana tusi.

E ese mai i le teena o suiga a le Fono mo le paketi, sa faaalia foi e Togiola i taitai o le fono lona le fiafia tele ona o le latou faaiuga e sui ai paketi a nisi o Matagaluega taua sa ia tuuina atu ae toe faafoi e faatupe mai i lalo o le Ofisa o le Kovana.

O Ofisa e lua e pei ona taua o le Ofisa o Faamaumauga (Department of Information Technology) faapea ai ma le Ofisa e vaaia tupe mai le feterale (ARRA).

O le taua ma le aoga o tiute tauave a matagaluega nei e pei ona taua e Togiola e fesoasoani ai i le faaleleia o tulaga tau fesootaiga ma puipuia ai tulaga manuia mo le atunuu lautele. O loo aofia ai i le saunoaga a le kovana le fuafuaga a le fono e faaitiitia ai paketi a nisi o ofisa ma matagaluega a le malo e pei o le Ofisa o Leoleo, Aoga, Ofisa o Galuega, Vaega o le Sikolasipi ma le LBJ.

Na taua e Togiola e faapea, o le faaitiitia e le Fono o paketi a ofisa e pei ona taua, o le a afaina ai le tautua a ofisa nei mo le puipuiina o le saogalemu ma le soifua maloloina o tagata.