O le isi manulauti o le Komiti mo Tupulaga lea ua fa'atula’i, o lo latou va'ava'aia lea ma sa'ili ni isi auala e fesoasoani ai i olaga o isi tupulaga, ma unaia i latou ina ia fai fa'aiuga lelei ma 'avea o ni ta'ita'i lelei mo le lumana'i.

O le vaiaso na te’a nei na fa’alauiloa mai ai e le ali'i kovana ia Togiola Tulafono totino fou o le Komiti mo Tupulaga lea o lo o i lalo o le fa’atautaiga a le faletua ia Mary Ann Tulafono, mo le talanoaina o mata'upu e fesoasoani ai i le fa’aleleia o polokalame mo tupulaga talavou o le atunu'u.

O i latou e to’afa ua tofia, e aofia ai Naia Addison mai le 'Aoga a le Pacific Horizons lea ua 'avea ma peresetene, Annie Amosa mai le 'aoga maualuga a Samoana lea ua 'avea ma sui peresetene, o Jirch Kruse mai le 'aoga maualuga a Tafuna lea ua filifilia i le tulaga o le Failautusi, ma Jedadaya Fuiava mai le 'aoga maualuga a Manu’a lea ua filifilia e fai ma Teutupe.

Na momoli le fa’amanuiaga a le alii kovana i totino fou o le Komiti a Tupulaga Talavou ua filifilia, ina ua mafai ona latou tula'i mai e fa’atino ni isi o anava tau na mafua ai ona filifilia i latou, aemaise lava le faia o gaoioiga e fa’atosina mai ai isi tupulaga talavou e auai i fa'atautaiga 'ese'ese ma fa'ailoa ai a latou taleni a o laiti lava o latou olaga.

O le ulua’i fonotaga a lenei Komiti na usuia i le aso 19 o Novema, ae o la latou fonotaga mulimuli mo lenei tausaga na usuia i le aso 1 Tesema.

Saunoa Togiola, o le galuega a le Komiti lenei, latou te sailia ni 'auala e fai ai fa'ai'uga fa'ata'ita'i i fa'afitauli o lo o tula'i mai i isi tupulaga talavou, aemaise lava i le fa'aaogaina o fualaau fa'asaina, sauaga i aiga 'atoa ai ma le faia o solitulafono.

ìO le ta'ua o le galuega a le komiti lenei, e mafai ai ona sa'ili o latou manatu ma fa'ata’ita’i i le faia o fa’aiuga fa'ata’ita’i, fa’amasani i tulaga o ta’ita’i, fa'aa’oa’o i galuega a ta’ita’i ma va'ai i totonu o mata'upu e fa'atatau i tupulaga ma fai i ai ni a latou fa'aiuga,î o le saunoaga lea a le ali'i kovana.

Na fautuaina e le kovana le atunu'u ina ia momoli sa latou fa'afetai i fanau ua filifilia i totonu o lenei komiti, 'ave i ai se fa'amalo ina ia fa'amalosia ai i latou e fa'atino le faiva fa'atalavou ina ia 'avea ai i latou ma fa'ata'ita'iga lelei i isi foi tupulaga talavou.

Na ta'ua e ni isi o to’oto’o i luga o le polokalame a le ali'i kovana i le fa’ai'uga o le vaiaso na te’a nei, o se tasi lenei o mafua’aga ua ala ai ona to'atele tupulaga talavou e a’afia i solitulafono, o le leai o ni gaoioiga fa’atupulaga talavou e fa’aaoga i ai o latou taimi avanoa, ae ua fa’aalu i isi mea e le aoga ma i’u ai ina soli atu ai ma le tulafono.

Fai mai le talitonuga o le isi to’oto’o, o ni isi o tupulaga talavou, e mafua ona a’afia i gaoioiga fa’asolitulafono ona o le pipi’i i isi foi tupulaga talavou o lo o fiafia e soli tulafono, ae afai e i ai ni gaoioiga e fa’aaoga i ai o latou taimi e pei o le komiti lea ua tofia, o le a fiafia foi i latou e fa’aaoga o latou taimi fa'atupulaga talavou.

ìE tatau foi ona i ai se vaega a matua e fesoasoani ai i tupulaga talavou ina ia una'ia i latou e filifili i 'auala lelei ma le sa’o, ae 'aua nei naunau e mulimuli atu i filifiliga sese o lo o faia e isi tupulaga talavou,î o le molimau lea a le isi tina sa fa'aalia lona finagalo e 'uiga i lenei mata'upu.

Na ta'ua e le tama'ita'i loia o lo o gafa ma le taulimaina o mata'upu a fanau aoga i luma o le fa'amasinoga fa'aitumalo o Terri Bullinger, o se tasi o 'auala e mafua ai ona a'afia fanau laiti i solitulafono ma i'u ina taofia ai i le to'ese, o le o i ta'a'iga a isi foi tamaiti, pe mulimuli foi ia i latou o lo o inu le pia ma i’u atu ai lava i se tulaga fa'aletonu.

Sa ia ta'ua lona lagolagoina o lenei fa'amoemoe, ina ia fesoasoani ai i le fa'aleleia o olaga o ni isi o tupulaga talavou ua a'afia ona o solitulafono.