Saili se fofo o le fa'afitauli i ova taimi a le malo

E le o malolo le faigamalo a le ali'i kovana ia Lolo Matalasi Moliga ma Lemanu Peleti Mauga, i le tau sailia lea o se auala e foia ai le fa'afitauli o lo o tupu mai pea i le malo i le taimi nei, o le tele o tupe e totogi ai itula a tagata faigaluega, ma o o atu fo'i i se tulaga ua aapa mai ai ma le malo tele e tau fa'atonutonu le fa'afitauli.

 

O se tasi lenei o mataupu na fa'amamafa e le ali'i kovana ia Lolo Matalasi Moliga i lana saunoaga i le fono a le kapeneta sa usuia i le vaiaso na te'a nei, lea na ia fesiligia ai sui o lana kapeneta, po ua latou sauni e tutu fa'atasi mo le tau sailia o se auala e foia ai lenei fa'afitauli.

 

O le fa'afitauli na alia'e mai ina ua manino i sailiiliga o lo o faia, o lo o i ai le fa'aletonu i tulaga o uati o lo o fa'amau ai taimi a tagata faigaluega mo le taimi e amata ai, atoa ai ma le taimi e manava ai.

 

Na taua e Lolo e fa'apea, e foliga mai o le fa'afitauli o lo o tupu, e na o le oomi lava o taimi e amata ai ma taimi e manava ai tagata faigaluega, e aunoa ma se feso'ota'iga lelei ma o latou ta'ita'i, e aofia ai le oomi o le uati i le 4:00 i le vaveao o le taimi lea e amata ai galuega, toe oomi i le 2:00 o le taimi lea manava ai.

 

"Ou te musu e soona fai atu se fa'amatalaga i lenei mataupu ae o le mea moni le tatou kapeneta, o lo o tele naua tupe a le malo o lo o ma'imau i ova taimi nei, ma e foliga mai e tele atu tupe o lo o alu e totogi ai ova taimi nai lo tupe o lo o alu i totogi o tagata faigaluega i taimi faigaluega sa'o", o le saunoaga lea a le ali'i kovana.

 

"O lo tatou tiute la o ta'ita'i, e le gata e tatau ona tatou manatu mamafa i le mataupu lenei, ae tatau fo'i ona tatou va'ava'ai i se auala lelei e foia ai, ina ia taofia ai le toe tula'i so o mai i le lumana'i", o le saunoaga lea a Lolo i le kapeneta.

 

O le fonotaga a le alii kovana sui o le Matagaluega a Tagata Faigaluega a le malo tele i le vaiaso na te'a nei, sa ia fa'asoa ai fo'i le mataupu lava lenei, fa'atasi ai ma lana fa'asea sa momoli i sui o le Ofisa lea, e le mana'o e eseese auala latou te tali mai ai i Fa'atonusili o Matagaluega uma a le malo, pe a o o i taimi e talanoaina ai tulaga o le mataupu lenei.

 

"O lo'u tiute o lo'u fesoasoani lea i ofisa a le feterale o lo o aapa mai tatou te galulue fa'atasi, ina ia mautinoa e vave maua se tali o le fa'afiltauli, ou te le mana'o fo'i e na o le ulufale mai lava i totonu o ofisa ma matagaluega ma manatu e finau malosi i mea o lo o latou manana'o i ai, ae tatau ona feutana'i lelei ma ta'ita'i o ofisa ta'itasi a le malo", o le isi lea saunoaga a le ali'i kovana.

 

"Afai e fesiligia se isi mea taua e tatau ona ave i ai la tatou fa'amuamua i le taimi nei, ave i le taumafai e foia fa'afitauli o lo o tula'i mai i totonu o matagaluega a le malo, aemaise lava tulaga i ova taimi ma taimi fa'aopoopo, ina ia mautinoa e le toe avea lenei mataupu o se fa'afitauli i le malo i le lumana'i", o le isi lea saunoaga a le ali'i kovana.

 

O fa'amaumauga na mafai ona fa'alauiloa e le Fa'atonusili o le Matagaluega a Tagata Faigaluega a le malo ia Sonny Thompson i le taimi o le fonotaga, na manino ai le silia i le $1 miliona sa totogi atu e le malo mo ova taimi atoa ai ma isi penefiti i tagata faigaluega a le malo talu mai le masina o Iulai 2013.

Comment Here