Ads by Google Ads by Google

Saili mai le Gaoi Faletupe - Tagata Polenisia Fo’i

Mai le Hawaii News Now ua fa’ailoa mai ai fo’i le toe fa’avave ona tu’u ane i luga e le vaega a le Crime Stoppers ma le vasega o Leoleo a Honolulu le ata o le ali’i Polenisia fo’i sa na gaoia le faletupe i Aina Hana - le Territorial Savings.

Ua fa’ailoa mai o le tagata e tusa ma le 300-350 pauna le mamafa, ae na’o le 5futu 6inisi le maualuga, e uliuli le lauulu ae matamata tetele mai le pe’a a le tama i lona ogalima tauagavale. Talofa e maua ai lava i si ana fa’ailo lena.

 Ua maua fo’i o ia i ata o le mea pu’eata i totonu o le faletupe lea, ma sa savali sa’o mai lava i totonu, tu’u mai le tusi ma fai mai loa e avatu le tupe. Na mae’a lana pisinisi lea, toe faliu tamo’e i fafo ma ua le mailoa le itu na aga’i i ai.

Na tupu lea mea i le aso Gafua na te’a nei, Oketopa 15, 2012, ae ole aso fo’i lea sa fa’ato’a fa’alauiloa mai ai ata o le isi gaoi o fia maua, o se tasi fo’i o tagata polenisia. Talosia ae le o nisi na ti’eti’e mai i le va’alele o le aso Gafua na te’a nei!

Ua talosaga fo’i le mamalu lautele, pe afai e fia taga’i i ai i lea ata mo sau fesoasoani mai i le sailiga a Leoleo ma ali’i taofi solitulafono, fa’amolemole va’ai i ai i le Uepesite a le Hawaii News Now. Laina mo le fa’ailoa mai o nei sui o le 1-808-955-8300. Ua i ai le $1,000. mo so’o se tasi lava e fa’ao’o maia se tala e maua tonu i ai lea sui solitulafono e sailia.

Fia fa’atau e Fiti Meleni a Tonga

O le aso Gafua fo’i, 15 Oketopa 2012, na o’o ane ai le vasega o Sui iloga o le Malo o Fiti e asiasi le fa’ato’aga Meleni a le Malo o Tonga, ina ia mafai ona fa’atau atu e i latou nei fo’i mea’ai aoga tele. Ua fa’ailoa mai e na’o le to’alua nei sui na malaga mai Fiti, i le vaiaso na tuana’i atu, ae ua mae’a faia se galuega tele mo Tonga e ala i fua o latou fa’aeleeleaga.

 

Ua tulata ina atoa le 20 tausaga talu ona sapalaia e Tonga a latou Meleni i le Malo o Iapani, ma e le’i mamao atu fo’i le tausaga na amata ai ona latou la’ua a latou Meleni i Korea i Saute.

Ua fa’ailoa mai, e ui lava ina fa’aitiitia le aofai o faifa’ato’aga ua galuea’ina lea atina’e i le Malo o Tonga. ae le o fa’avaivai mai ai avanoa o nei Maketi lelei mo Tonga, o lona uiga, ua tatau ona toe taga’i le au faifa’ato’aga a lea malo, ina ia toe tima’i latou tagata e saga toto fa’aeleeleaga meleni mo latou oloa fa’atau atu i fafo.

O le mea moni, ua mana’omia e Fiti ona fa’amautu le latou feagaiga lea tau oloa fa’atau atu mai Tonga, o meleni lava. Ua fa’ailoa mai, sa asia le nofoaga o lo’o totoina ai fa’ato’aga, le nofoaga o lo’o fa’amautu mai i ai meleni e tu’u pusa ai mo le auina atu i fafo. Ua fa’amautinoa lelei e nei sui, po’o sa’o ma alagatatau ala uma ua tapena ai le tapenaga o uta meleni mo le auina atu ia i latou ma isi fo’i malo!

SU E SE KAMUPANI SAINI I OREGON PERESETENE OBAMA

O le Kamupani a tagata Saina o lo’o latou fa’atuina le ‘Lotoa o Pe’ape’a e gaosia ai le Eletise’ e fa’aaoga ai le Matagi i Oregon, ua latou suina le tatou Peresetene o Obama, ina ua taofia tumau e Obama lea galuega, ma fa’ailoa mai le mafuaga, “e tauau e lamatia ai le saogalemu o le Malo o Amerika.”

O le Kamupani lea o le Ralls Corp, o le kamupani e pulea ma fa’atautaia a’ia’i e tagata milionea e to’alua mai Saina, peita’i, ua fausia tonu lava lea lotoa o pe’ape’a mo le gaosiga o le Eletise i Oregon e tuaoi lelei ma le Nofoaga o le Navy i Oregon, lea e fa’aautu i ai le fa’atautaiga o va’alele drone lea e fa’atonutonu i rimotu, ma o lo’o faia le tele o osofaiga fa’atonutonu mo nofoaga patino o talipana ma tagata fouvale i Sasa’e tutotonu.

O le atugalu lea ua i ai o le Peresetene o Amerika, e moni ni faitioga a tagata o lona malo ua fa’ao’o atu ia te ia, “O se galuega lelei o faia e Saina, ae i ai lona e mulimuli mai ai, ona o lo’o tau matau e i latou gaoioiga uma o lo’o fa’atautaia i le nofoaga o le Navy lea ua latou tuaoi lelei.”

O le ulua’i fa’amalosiga lea o le malosi’aga fa’aperesetene o le Malo tele talumai le 22 tausaga, e a’afia ai ni galuega e fa’afoea mai e nisi malo o lo’o latou fai pa’aga lelei i tulaga o fefa’ataua’iga, ma isi so’otaga aoga i malo e lua.

Peita’i, e le o logo malie le fa’aupuga o le Su a Saina, ina ua latou fai mai, “Ua ova sitepu e le Peresetene lona malosi’aga e taofia ai se galuega lelei, ma ua le fa’ailoa patino mai fo’i ia i latou, pe o le a le saogalemu o Amerika ua lamatia ona o le latou galuega o fa’atino?”

I le latou faitioga, ua fai mai ai i le aso Gafua na te’a nei, “Ua faia e le Peresetene se fa’ai’uga e le tusa ai ma le tulafono, ma e le o mua’i taga’i o ia i lana aia tatau e faia ai lea fa’ai’uga.”

Ua avea lea taofiga ma lona mafuaga e fesiligia ai e Ralls Corp. po’o le a tonu lava vaega ua a’afia ai le saogalemu fa’alotoifale o Amerika ia i latou ma le latou galuega. E tatau ona folasia mai ma nei mafuaga i le taofiga na fa’ao’o atu ia i latou.