Ads by Google Ads by Google

Saili Lolo ma Lemanu auala fesoasoani ai taugata pasese HAL

LOLO: E le mafai ona ou nofonofo ae pagatia pea le atunuu

 

O le sailia o auala e mafai ai ona faaitiitia le taugata o lo o i ai pasese a le kamupani vaalele o le Hawaiian Air (HAL), o se tasi lea o taumafaiga malosi o lo o unaia e le alii kovana ia Lolo Matalasi Moliga ma le lutena kovana ia Lemanu Peleti Mauga, ina ia mafai ai ona maua se toomaga mo le atunuu.

 

I se feiloaiga ma tusitala ananafi na saunoa ai le alii kovana e faapea, e le o se tulaga lelei le vaavaai atu i tagata o le atunuu o lo o pagatia i le taugata o pasese o lo latou fetaia’i i le taimi nei.

 

“E le o se tulaga matagofie ia maua ma Lemanu o ta’ita’i o le atunuu le ma nofonofo ma vaavaai atu ae o lo o pagatia le atunuu i le taugata o pasese a le kamupani vaalele, e aunoa ma se gaioiga o ma taumafai e faia ina ia foia ai lea faafitauli,” o le saunoaga lea a le alii kovana.

 

O le fonotaga a le alii kovana ma sui o le pulega a le HAL i Honolulu i le masina o Fepuari na te’a nei, sa talanoaina ai se vaega o lenei mataupu, lea foi na toe aofia i mataupu sa talanoaina i le fonotaga a taitai o le atunuu ina ua tuana’i le faamanatuina o le sisigafu’a i le vaiaso na te’a nei.

 

O le fuafuaga a le malo e pei ona faailoa i lea fonotaga, e leai se isi auala e faigofie ma mafai ai ona faaitiitia le tau o pasese a le HAL, sei vagana ua maua se leo o Amerika Samoa e ofi atu i totonu o le pulega a le kamupani vaalele.

 

O le auala la e mafai ai ona tupu lea tulaga, o le avea lea o le malo o Amerika Samoa ma paaga totino o le kamupani vaalele e ala i lona faatauina lea o aia (shares) mai le kamupani vaalele.

 

Ina ua fesiligia e le Samoa News le alii kovana e tusa ai ma se tulaga ua i ai nei fonotaga, na saunoa ai Lolo e faapea, “o lo o matou vaavaai pea i ai ma faaauau feutanaiga i le taimi nei, ae o le agaga autu ia maua se fesoasoani mo nai o tatou tagata ua tele tausaga o pagatia i le taugata o pasese.”

 

Saunoa foi Lolo e faapea, e pei ona silafia e le atunuu, e le o gafatia i le maketi a Amerika Samoa o lo o i ai nei i tulaga o tagata faimalaga, ona atina’e pe fa’aola ai ni kamupani vaalele tetele se lua i le taimi e tasi ina ia lelei ma penefiti, peitai e le avea ia faafitauli ma itu e nofonofo ai taitai o le atunuu e aunoa ma le saili o ni isi auala e maua ai se fesoasoani mo tagata.

 

O le tulaga matuia o lenei mataupu na i’u ina tusi ai le kovana ua mavae atu ia Togiola Tulafono i le pulega a le HAL i le 2006 ma faailoa i ai e faapea, o le a saili e le malo o Amerika Samoa se isi kamupani vaalele na te tautuaina le va o Pago Pago ma Hawaii.

 

I se faatusatusaga na tuuina mai e Togiola i lena vaitaimi sa ia taua ai e faapea, o le pasese i le alu ma le toe foi mai i le va o Hawaii ma le malae vaalele i L.A, e taugofie atu i le pasese mo le malaga e tasi (one way) i le va o Hawaii ma Pago Pago.

 

Saunoa Lolo e faapea, e ui e le o mautu mai fuafuaga ma talanoaga sa faia e faatatau i lenei mataupu, ae maualuga lona talitonuga o le a mafai ona maua se tali toafilemu mo le atunuu i se taimi o i luma.

 

Na taua e le Apelu Leota ma lona faletua o Julie o Nuuuli e faapea, o le tulaga lea ua i ai pasese a le HAL i le taimi nei, ua oo atu i le tulaga e le toe gafatia ai e tagata Amerika Samoa ona totogi, peitai e leai se isi alofaga e ui i ai le atunuu pe afai e fia malaga i Hawaii ma Amerika, ua na o le Hawaiian Air lava e tua i ai.

 

I le malaga soo ai o Leota ma lona faletua i Hawaii ma Amerika mo pisinisi ma faalavelave faaleaiga, na la taua ai e faapea, afai e i ai se isi auala e manatu le malo e fia fesoasoani ai mo le atunuu, o le isi lea auala e tatau ona faia, o le tuu i lalo o le totogi o pasese