APIA, SAMOA - O lo o ua i lalo nei o le vaavaaiga a leoleo ia se alii o lo o masalomia i le tagatavaleina o se alii ave taxi e 26 tausaga le matua, i le po o le Aso Lua na te’a nei i luma o le Ofisa o le EPC i Vaitele, pe tusa o le itula e 11:00 i le po.

Ua talosagaina e le Matagaluega o Leoleo le mamalu o le atunuu ina ia tuuina atu ni faamatalaga e uiga i lenei faalavelave, mo le tau sailia o le sa ia faatinoina lenei solitulafono.

O le alii ave taxi ua maliu o Ete Ete o Pesega ma Taga i Savai’i, e tu lana taxi i le fale taavale a le 57 Taxi Stand i Motootua.

O le po na tupu ai le faalavelave sa i ai faatasi Ete ma lona uso matua sa malaga mai atunuu i fafo, e pei ona taua i ni ripoti mai Samoa.

Na faamatala e le uso matua o Ete e faapea, pe tusa o le itula e 11:00 i le na tupu ai le faalavelave, sa la manatu ai ma lona uso ua maliu la te o i Pesega e asi lo la tina ma nisi o la tei  laiti o lo o i ai, peitai ina ua oo atu le la taavale i Malifa, sa faafuase’i ona faatu mai e se alii pe a ma le 20 tausaga le matua, ma fai mai o ia e fia alu i Vaitele i le Ofisa o le EPC se’i faatau sana cash power.

Na ona taunuu lava o le taavale i luma o le EPC i Vaitele, faatu loa e Ete le taavale, ae vaaia loa le oso i fafo o le alii lea sa nofo i le pito i tua, ma tago i lana taga.

Fai mai le uso matua o Ete, sa manatu o loo tago le alii lea i lana ato tupe peitai na te’i ina ua ia vaai atu o le fana o loo uu e le alii lea, ma ia faatonuina loa Ete e oso i fafo ma le taavale.

Na usita’i Ete i le faatonuga ina ua ia vaaia le fana o loo ta’i atu ia te ia, ma toe faatonu ai loa o ia e le alii lea e savali lemu i luma, pe tusa e fa loa la’a a Ete ae pa loa ma le fana, ma vaaia ai e lona uso matua le pau i lalo o Ete.

Na ona uma lava ona fana e le alii lea o Ete i tua o lona ulu (tulou), na faliu atu ai loa ma fana le uso matua o Ete o loo i totonu pea lava o le taavale i le taimi nei, peitai o se faaletonu i le fana na le mafai ai ona pa.

Na taua e le uso matua o Ete, na vave lona oso i fafo mai le taavale ina ua ia vaaia lenei vaaiga matautia, ona ia togiina lea o le alii lea i lana telefoni sa uu i lona lima, sosoo ai loa ma lona oso atu ma la tauivi loa ma le tagata lea ao uu pea le fana i lona lima.

Na umi se taimi o la tauivi ma i’u ina pau ese ai le fana mai le lima o le alii lea, ma maua ai loa le avanoa e tamoe ese ai o ia mai le vaega na tupu ai le faalavelave, peitai sa ia taumafai e tuliloa ae ua le maua o ia, o lea na ia valaau ai loa mo se fesoasoani.

Na taua e le tama loto faanoanoa o Faumui Ete ina ua fesiligia e tusitala i Samoa, o le taimi lava na ia maua ai le tala e faatatau i lona atalii, na malaga mai ai loa i le vaa usu mai Taga i Savai’i, le mea o loo latou nonofo ai ma nisi o lana fanau matutua.

Na faamatala e le tama ma ona loimata e faapea, e le malamalama o ia pe aisea na manatu ai lenei tagata e faaoo le oti i lona atalii, ae o ia o se tagata e agamalu.

Fai mai le tama, ua ia faamagalo i le tagata na fasiotia lona atalii.

fa’aliliu: Ausage Fausia