Ads by Google Ads by Google

Ritaea Tofa Valasi Gaisoa

Mai le amataga o lau tautua, e te le mailoa lona fa’ai’uga pe tua ma ni a? Peita’i, i le fa’ai’uga o le vaiaso na te’a, sa fa’afiafiaina ai le Tofa Manumalotaulafoga Valasi Gaisoa ina ia ‘au’aufa’atasi ana pa’aga i le galuega na tomuli i ai lana tautua matavela i lona Malo o Amerika Samoa, ma latou saunia ai sana fa’amavaega aloa’ia ma i latou, i le Kalapu a le Country Club i le afiafi o le aso Faraile, i Iliili.

 “O le fa’afetai e ao a i le Atua, aua o le malosi, le atamai ma tagata e fa’atauva’a lava ia pe a le finagalo i ai le Matai. O le a fo’i se tautua ua mafai ona fa’atino mo lo’u malo pele, o o’u tagatanu’u ou te auau i ai, ae maise i le vasega o e na latou tausoa fa’atasi ma a’u i tiute ma faiva i so’o se mea sa galue ai, fa’afetai mo lo outou onosa’i, fa’apalepale ma le agaga i le tautua ia au, ma ia aoga mo tagata lautele ma le Malo.”

“O le a ou se’e tuavao, aua e i ai lava taimi e fa’amatu’u e le tagata ina ia toe timata le upega fagota, i lenei fo’i vaitau o le ola ua i ai, fa’atasi ai ma nisi fa’amoemoe e ao ina taumafai i ai, ae ia mua lava ona tu’u avanoa ina ia lava tapena, saili malosi fo’i i le tino ma le mafaufau, ia le tau ina fai se tiute pe fa’ataunu’u pa’ole se fa’amoemoe i nisi tautua.”

Lea ua matu atu le tautua sa i ai i le ofisa o Tagata Matutua o le Malo, TAOA, e fo’i lava ia ma agaga alofa ia i latou ua loa fo’i le auaunaga sa alo ma taumafai fa’atasi, i le susuga le Ali’i Fa’atonu, le afioga Tauanu’u Fa’afiti,  le Pule lua Fa’aolatia Siatu’u ma le au taupulega atoa i lea matagaluega.

O lana tautua pe a aotelega mo le malo o Amerika Samoa ma ona tagata e silia lea i le 30 tausaga peita’i, e ‘ese’ese matagaluega sa tautua ai. O lana tautua i le Malo tele sa aofia ai tausaga na avea ai o ia ma tagata faigaluega i le Ofisa o le Sui o Amerika Samoa i le Konekeresi a’o avea le susuga le To’oto’o Fofo I.F. Sunia ma tatou sui e ono tausaga o lea tautua.

Peita’i, a’o le’i taliu mai i fanua lana tofa ma ona matua, sa mua’i tautua o ia i le Kamupani Inisiua a le All State Insurance mai le tausaga e 1966-1972. O ia sa avea ma Claims Adjuster Agent.

I lona taliu mai ma ua fa’atalitali fo’i se avanoa e faigaluega ai i lona malo Amerika Samoa sa mua’i faigaluega ai i le Hartford Insurance i lona nofoaga sa i ai i le Burns Philp Building i Pago Pago, lea ua fa’afaleina ai nei le Pisinisi a le ASCO Motors i lenei vaitau. E tele na’ua komisi sa auai lana tofa Manumalotaulafo ma sui totino a’o faigaluega o ia i le Ofisa o le tatou sui i le Konekeresi a le Malo tele. O i’ina i lana saunoaga, sa fa’alauteleina atili ai lona iloa, i mataupu tau faigamalo ma ona fo’i tomai e mo’omia mo le galuega tautua i tagata lautele.

O le tele o fo’i ituaiga o a’oa’oga fa’apitoa sa mafai ona auina i ai lona sui ia mafai ona fa’auia mai na polokalama e fa’atautaia i le tatou nei malo. O polokalama e aofia ai: Domestic Violence, Social Services ma le DDPC mo i latou e i ai ‘mana’oga fa’apitoa.’

I lona galue ai i le Matagaluega o le Aufaigaluega a le Malo, DHR sa tautua ai o ia a’o avea le susuga Pat Letuli ma ona ta’ita’i.

O nisi o fa’alapotopotoga o lo’o tautua ai pea le Gaisoa i le atunu’u ua aofia ai le ASOA, o le Toe Afua mai Matua [TAMM], fa’atasi ai ma le galulue fa’atasi ma Mrs. Fa’aalu Iuli i le polokalama a le Alliance Strengthening Women & Families.

I se fa’aupuga a le Tofa Manumalotaulafoga Valasi, sa ia fa’apea ai, ina fa’ato’a manino fo’i le lautele o lana tautua, “E le o ni tautua e mitamita, ae o le ola taumafai lava e faia se galuega e aoga ai i mea ua onomea ona fa’amae’a lelei ma ia sologa lelei ai le soifua o i latou o mafai ona au i ai na tautua.”

O lana tofa o se alo e fa’asino ia Lavata’i Natia Seanoa ua mapu mai i ti’asa, ma lona tina o pasene Tupua Seanoa. Ua fa’aipoipo o ia i le tama o le aiga Pio Gaisoa ma e to’a 4 o la’ua alo, ae to’aiva fanau a le la’ua fanau. O lo’o alaala tumau lava i la’ua i Nu’uuli. Peita’i, i lona suafa matai

na fa’asuafaina ai o ia e le aiga o si ona tina i Amouli, le Aiga Sa Gogo. O ia o se tasi o tulafale o lona aiga i lona suafa o ‘Manumalotaulafoga.’

O a’oa’oga uma lava i le soifuaga o Gaisoa, sa mua’i a’oa’oina o ia i a’oga tulaga lua i Roosevelt Elementary peita’i, ina ua o’o i le tausaga e ulufale ai i aoga maualuluga ona a’e lea i le Santa Ana High School soso’o ai ma lona si’itia i le Santa Ana Junior College ma mae’a ai ana a’oa’oga, ae faliu e tausia ona matua ua mama’i fo’i i la’ua. O le vaitau fo’i lea o lona soifuaga talavou ua faigaluega ma a’oga, ina ia tausia ona matua i fafo.