Ads by Google Ads by Google

Tama Samoa ta’a’alo ‘au Lakapi a le Utah Warriors i Amerika

Nolan Tu'amoheloa (left) and Don Pati (right)
tusia: Leua Aiono Frost

O se taule’ale’a talavou e 19 tausaga le matua na fanau i Amerika Samoa, ma se ali’i e 28 ona tausaga sa soifua ‘ae i Samoa, o lo’o ua atoa au le au lakapi a le Utah Warriors mo le tausaga 2019.

NOLAN TU'AMOHELOA

Ua avea nei le ali'i talavou o Nolan Tu'amoheloa, 20 tausaga, mai Illiili Amerika Samoa ma tama ta'alo Lakapi a le Utah Warriors. Ma o ia e la'ititi i le ‘au a le Warriors.

O le 15 o ona tausaga na tuua ai Amerika Samoa ae malaga i Hawaii o ia i Hawaii ma fa'aauau ai lana a'oga, ma ta'alo ai fo'i i le Lakapi ae maise o le Football.

Ina ua toe masi'i Nolan i Utah, sa ia ulufale i le Northridge High School i Layton ma ta'alo ai loa i le Volleyball ma le Football ma fa'au'u mai ai loa i lea a'oga.

Ona o tamaiti Samoa e fiafia lava e ta'a'alo Lakapi i so'o se taimi, sa matauina e nisi e fiafia e koleni ma ta'a'alo fa'asamasamanoa i ta'aloga a le Kai Toa Rugby Club.

O iina lea sa maimoaina ai loa lana ta'alo e nisi o le Utah Warriors ma latou talanoa ai loa ia te ia mo lona avanoa ua i ai nei.

Sa mua'i avea o ia ma sui e ta'alo mo le Utah Youth All Stars i le Ta'amilosga Lakapi Taito'afitu sa faia i Rosyn Parki Lonetona, ma avea ma tama ta'alo talavou mai le Utah Cannibals U18 i lena tausaga. Na toe malaga fo'i o ia i le 'au fili a Utah ma tauva ai i Kanata, ma avea fo'i e ta'alo mo Utah i le ta'amilosaga Lakapi a le Rocky Mountain Challenge i Colorado, ma le ta'amilosaga a le 2017 Penn Mutual High School Sevens Championship.

I le ta'amilosaga a le Rocky Mountain Challenge sa maua ai e ia le fa'ailoga All-Tournament Varsity Team i le 2016. Sa ta'alo o ia i le Lakapi Taito'afitu fa'apea fo'i ma le 'au ta'a'alo ta'ito'a 15 mo Utah Cannibals ma sa latou mauaina fo'i le Siamupini o le Las Vegas Invitational Games mo fanau e i latou ane o le 18 tausaga le matutua.

Ua mae'a ta'alo Nolan i le ta'amilosaga amata o le Liki Lakapi 2019 ma na latou manumalo ai i le 'au a le Life West i 'ai e 25-10 i le Zionz Bank Field House ia Ianuari 12, 2019.

O lo'o fa'aauau pea lea season lakapi aua e 16 latou ta'aloga faitaulia ona ta'a'alo ai lenei ta'amilosaga ua amata i le Iunaite Setete.

Tau ina ia fa'amanuia pea le Atua i le taumafai o tatou fanau talavou o lo'o i ai i ta'amilosga o so'o se fa'agatama fa'avaomalo.

DON PATI

Ua toe sainia le Konekarate e ta'alo ai le ali'i o Don Pati mai Samoa i le Utah Warriors mo lenei tausaga. Ua atoa le 28 tausaga o lea alo o Samoa, ma sa ta'alo o ia i le tulaga o le Fulupeki fa'amoemoeina a le Warriors i lana konekarate muamua. O le tausaga e 2004 sa tuua ai e Pati i lona atunu’u o Samoa ae malaga i Utah ma a'oga i le Hunter High School ina ua mae'a ona a'oa'oina fa'apitoa i le gagana fa'aperetania e ala i ana vasega English Second Language sa avea fa'apitoa. Sa ulufale loa i le Iunivesite o Utah ina ua maua lona avanoa fa'asikolasipi

O lana sikolasipi lea sa fa'aigoaina o le USA Rugby Foundation Advanced Player Grant i le 2018. O Don na malaga ta'amilo ma le 'au Lakapi Fili a USA i Kanata i le 2009.

Na filifilia fa'apitoa lava Don i le 'au fili U20 a USA ma latou fetaui ai ma le Au Fili a le Iunivesite o Niu SIla ma toe malaga ai fo'i i ta'aloga a lea 'au fili a USA i Argentina, a'o le'i atoa le 21 o ona tausaga.

O ia lea sa matua iloga lana vaega na faia i le mafai ai ona manumalo o le Utah Warriors i le ta'aloga o le Siamupini ma ua fili mai ai o ia e avea ma sui filifilia o le au a le All Tournament Colligiate Team USA.

Peita'i, sa i ai sona manu'a na afua mai i nisi o a latou ta'aloga ina ua avea o ia ma sui totino o lea 'au fili, ma leaga ai le maso o lona vae. Ona le toe ta'alo ai lea o ia mo sina vaitaimi, ma ua le mae'a ai fo'i lea ta'amilosaga o malaga ai.

O Don ua avea nei o ia ma ulua'i tagata o lona aiga mai Samoa o le a fa'au'u mai a'oga Kolisi po'o Iunivesite.

Na ta'alo Lakapi lea o Don Pati ina ua filifilia mai o ia e avea ma se tasi o tama ta'alo a le San Francisco Golden Gate Rugby Club. Peita'i na toe sainia o ia fa'atasi ma Tiger Rugby, Park City Haggis mai le Utah Selects  Sevens, lea na latou manumalo ai i le National Club 7s a'o ta'alo i le aufili ta'ito'afitu a USA i le tausaga e 2016 ma le 2017.

I le tausaga e 2014 na fa'aauau lava ona mata'ina e le to'atele o faia'oga ma fa'atonu o 'au Lakapi le ta'alo a Don Pati i 'au fili a USA na ta'alo ai. Na malaga fo'i o ia i le 'au fili ta'ito'afitu a USA mo Dubai Sevens i le tausaga e 2016, lea sa filifilia ai le to'a 13 e malaga ai mo lena ta'amilosaga.

Ua fa'aipoipo le ali'i Samoa i le tama'ita'i o Tracy, e i ai fo'i si o la'ua afafine e to'atasi o Kathy.

ISI TAMA TA’ALO

Mai le lisi o le ‘au ta’alo a le Warriors mo le 2019 o lo’o fa’ailoa ai nisi o tama ta’alo mai atunu’u Polenisia e pei o Niu Sila, Tonga, Fiti ma Hawai’i. O to’alua o nisi o le ‘au ta’aalo e i ai o latou pito Samoa, e pei o le ali’i o Inikil Thor Fa’amausili sa soifua ‘ae i Hawaii ae maise le ali’i o Lance Williams sa fanau i Hawaii ae ola ‘ae i Samoa ma toe foi i Hawaii ina ua 12 ona tausaga.

O le mitamitaga ia Williams, atonu o se taimi o i luma e avea ai o ia ma se sui o Samoa e ala i le Manu Samoa po’o o le ‘au a le Eagles a le Iunaite Setete.