Ads by Google Ads by Google

PULE SE ALI’I 16 TAUSAGA I LONA OLA

E 16 tausaga o se alii aoga mai Aoloau na maliu i le aso Lulu na te’a nei, ina ua maua atu o sisi lona ua i le umukuka e i tua o le latou fale.

 

E le i mafai ona faailoa mai e le Ofisa o Leoleo le suafa o lenei alii ona o lo o faagasolo suesuega i le taimi nei i le mafuaaga o lona maliu.

 

Na pau faamatalaga na tuuina mai i le Samoa News e ni isi o molimau, o le alii ua maliu e aoga i le Aoga Maualuga a Leone.

 

E toatele ni isi o le afioaga na faateia ina ua vaaia le tele o taavale leoleo ma taavale a le falema’i i le aso Lulu na te’a nei

 

Na taua e ni isi o molimau e lei finagalo e faailoa o latou suafa uiga tausaafia ma le lelei o lenei alii talavou i totonu o lona aiga, ona o ia o se tagata e galue malosi mo le faia o le fatuaiga i totonu o lona aiga.

 

O ni isi na talanoa i le misia o lenei alii ae o ni isi na talanoa ina ua faateia i latou i le mea ua tupu. Na taua e se molimau e faapea, o le alii ua maliu e malaga mai i se nuu o le motu tele o Savai’i, ae nofo i lona uso matua ma lona toalua i Aoloau, ma o iina tonu lava i lona aiga na tulai mai ai lenei faalavelave ua mafua ai ona maimau lona soifua.

 

E oo mai lava i le taimi nei e lei toe maua mai se isi ripoti mai le ofisa o leoleo i le mafuaaga tonu o lenei faalavelave.

 

Faatoa tulai mai lava lea o se mataupu i se tagata e pule i le soifua i totonu o le atunuu, talu mai le tele o tausaga ua mavae atu.