Ads by Google Ads by Google

Pou Tiute a Leoleo

“O le a sau mea a fai, pe afai e o’o i le taimi o lou tiute, ae fa’asaga le isi tagata e fa’aleaga mai lou aso i ana fa’a'upuga?” “Sole, Pou o le a le mea ua amata ai lou aso i na ituaiga o fa’a'upuga?”

“Se leaga o le tagata lea na loka mai anapo i le fa’alavelave tau ta’avale, ala mai lava i le taeao o le a fa’afeao atu i le Fa’amasinoga, e foliga mai e le’i taitai lava sau i lalo lona va’alele! Ia e taumafai atu e loka ae fa’anoi mai ua fia alu i le fale’ese. E tu’u atu e alu, ae toe auselasela lau tama e tuli mai ua tau sola!”

“Ia o gafea lava e mafai ai ona oso i luga o le pa, e pau lava lau mea e fai, o lou tutu ae se’i alu i le atoa e sa'ili mai lava e le sela toe pa’u ane ai i ina, e fa’amamafa atu loa i ai se pouvai!”

“Ia o lea lava la, ai o le mea lena sa talie mai ai le vaega tuai ia te a’u ma la’u momo’e! Uma mai ua kaka mai le sope, ae sau fa’ato’ese fa’aselau mai e ‘aua lava ona ta’ua i le fa’amasinoga lea faiga sa ia taumafai i ai, ae le iloa, o le lipoti le mea e ao ina fa’ato’ese i ai!”

“Ha Ha, Ia o le a la le leaga o i ai lou aso, pe tusi pe fa’agalo?”

“O le mea lena e te fesili sa’o lava i lou fatu, po ’o fea lea e fai mai e fai, aua o oe lava na e tamo’e ma e au selasela solo e tau ‘aumai.”

“Uma la’ia ae ua e va’ai toto’a atu i le pupula a tama leaga ia e fa’aauau fa’amasinoga ona o le tagofia o fuala’au fa’asaina? Ioe, ua oso ai ma lota fia nunutia o se tasi!”

“O le tala moni, o i latou na e te va’ai mamao atu lava i le pupula fo’i lea, Ua a ali’i kama? Le lava le manava! Ha ha”

“Ioe o le pa’e’e latou ua fiu e taofiofi manava, o le vaega leaga le vaega lena o le la’u vaega na la’u mai, ae o’o atu i le faitoto’a o le fa’amasinoga, oka, ua fetagisi mai nai tina ma fanau, ua naunau mai i sina mafutaga!”

“E sili ona o’otia lota loto e va’ai i lena itu o le galuega lea o le la’uina o tatou sui e tula’i i le fa’amasinoga, ae o le 'aulelei ia o nai isi tina laiti lea e taofiofi e tama leaga nei o latou alofa’aga!”

“Pou, va’ai i su’e atu oe, ua e le ‘ave tama i le fa’amasinoga, ae ua e nofo ma le 'ofu lanu moli ona o lou va’ai fua i le itu lena o le olaga. Ia e iloa lelei, o tama 'ofu sasama na, o lo ’o latou tausa'ilia lava se fasi sasi lava ia i tatou e fa’aoso ai a latou fika ali’i kama!”

“Ioe, o le faigata lena o le ata, e i ai taimi e te mo’omia ai fo’i sina fa’amama avega mai, leaga e fou fo’i lea itu o le 'au'aunaga ma ona mamafa! Lea ua ta va’ai i olaga o tama nei i le nofoaga o sala, ae ou te va’ai atu i nai o latou aiga, e oso ai lava le loto momomo.”

“Pou, e 'ese'ese lava lagona e o’o mai i so ’o se tiute tatou te faia, o le isi lea mea e fa’atupula’ia ai i o tatou agaga le alofa ma le fia fesoasoani i so ’o se tasi, e o’o lava i tagata e sili ona matuia latou solitulafono sa faia.  E moni lava, e te taumafai ina ia e ofi i se’evae o le isi, i le taimi lava na ia faia ai se filifiliga e fa’ataunu’u se solitulafono, i ona lagona, masalo o se mea tonu lea e ao ina faia!”

“Fa’afetai uso, ua lagona lava le fa’amafanafana mai o au saunoaga, ioe le taofi, o lo ’o ia te outou lava le sosia o la tatou galuega, ua loa tausaga o outou faia, e ao lava ona fesili matou mulimai ia muamai, i so ’o se mea lava.  E moni lava e i ai le sa’o ma le sese, ae i ai fo’i le fa’autautaga loloto e ao lava ina fa’atino ai o tatou tiute.”

“Se moni ai le tala a le Saina, a maua sau mea, aumai sa’u mea! Ae aua le 'ai'ai fa’aloloto ai lava na’o o oe i sosia o le galuega a ea?”