Ads by Google Ads by Google

Pou Tiute a Leoleo

“Sauni, le uso, o fea lea e fa’atopetope mai ai ou vae? O a’u lea ua ou lele atu, ua fai si ta tuai, ae le mafai ona amatalia le aso, pe afai ae le maua mai le paga 10 4!”

“Ia ua maua atu, o lena ua e savali mai, lelei tele fai se Koleni!”

“Ioe ua ou fa’alogo i le tala, e tatau ona vave lava ta’ua leaga na fai mai a ou sau, ia vave ona lipoti atu ua piki oe, ae sili se’i o’u o’o atu lava ona faia lea o lou finagalo!”

“Pou, ua faigata le mea, ua misa fo’i ma le fafine, ae leai lava se aiga e sao mai lena mea! Lea ua fia vave alu atu ai i totonu, ae se’i maua muamua lava le ‘auga o le paipa, aua o lea ua maua mai le vaega leaga, ua le toe manatu fo’i le Saina e fa’amagalo se mea, uaa toa lelei le 2 vaiaso o tu’u atu e sau i luma o le sailiga, ae o le mea fita, sole, ole aufaigaluega lava!”

“Ia ua soso’o mai vala’au tate fa’atope ane i le a’oga maualuga lea e tau pupulu le mea ua tupu!”

“Sole se paga nei fanau a’oga ali’i, ai fo’i se fusu’aga i ni tama’ita’i!”

“Se sole, ia va’ai, ua le fusu la ali’i, ae o lea ua sipa tama’ita’i! Lale e fiu e saili mai ni tama’ita’i e fusu mo Amerika Samoa e le Kalapu fusu ma le Asosi fusu a le tatou malo, ae o lea e tetele le taleni i totonu o lea a’oga maualuga.”

“Pou, o le mea faigata lena o le a e o’o i ai, o lea e saili mai ni teine fusu e le futiulu, ae ou te iloa, e vave ae toe fa’auia i tua le fanoga o si tama’ita’i fia masoa lea, pe a va’ai atu ua folifoli mai le kiuli mai Aferika i saute.”

“Se ae o le la fo’i e i ai le isi vaega fou lena ua fa’ailoa mai, ua taumafai e fa’atulaga ai lava le latou Ofisa i totonu o lena a’oga, ua avea ai matua matutua i le TAOA ma a latou tagata faigaluega, e va’ai toto’a i amioga a le fanau, ma latou fautua mo i latou, ina ia suia ai o latou mafaufau mai faiga leaga, ae fa’asaga ane i le lelei!”

“Oi se talofa, toe ititi lava a uma le gaualofa o le Atua, ae amata ona fa’asau i lalo lona gaumata’u, ona fatitu mai lava lea o se mea malo fa’avaivai e pei o le suavai.”

“Oka, Sauni, ua amata ona sua mai le tai o ou mafaufauga, ua lololo mai au fa’aupuga, ma ua taumafai fo’i si o’u aupogaleveleve apa’au gau latou e tufi taufoe le tele o na mea ua luai mai e lou fofoga i lenei afiafi, pe ana fa’apea la ua ta ma’o’ona.”

“Aua e te popole i le mea’ai, aua o a’u latou, ua pisapisa ma le fafine, oso mai ae o’o lava i se pasese, ua galo!”

“Oi sole, ai lava sou ita ina a tele! Ailoga e te toe fa’amagaloina si fafine?”

“O le mea fo’i lea ua sau ai tama o le malo, o le sau motu lava, na’o le tasi lava le ofuvae ma le mitiafu lea e i totonu o le ato, ae o le peleni o le mea, ua misi atoa se underwear.”

“Sauni, fa’ato’a ou iloa lava lea, ua misi atoa oe ma lou igoa, ua le nofo sauni, ae ua e misia le pasi lena na tu’u i ai oe e si ou tama! Aua le popole, o tama na e maua lava i taimi uma, e va’ai lava le tama’ita’i e te lua size, o ia lava lena!” Ha Ha

“Sole ai foi ua tau lagona mai e le olomatua ma tamaiti i le fale se mea o tau oso a le tama, a ea? Ua tau o’o fo’i i taliga o fialogo le mapu a tai’i i le mea lea e i ai, ae ai lava fo’i o se tasi o le tatou sifi!”

“Pou afai a e ou manino o oe, e vave mai se taimi e toe pigi lava oe e lau paga i le sifi!”

“O lau kama e le fa’apega, o lea lava ua ta o i le va’a e tasi lea na e folifoli mai ai lava i le amataga. Oi sole toeititi lava misi oe!”

“E afe mai loa ae vili mai loa le base sole! Ia tago ane i ai oe!”

“10 4 10 4! Sole fa’avave atu i Faleniu, o lea e i ai le fa’alavelave lea ua fa’alogo atu o tupu mai ai, o se tamaititi ua lavea i le ta’avale!”

“Oka a tafefe, ua ese lea mea i la’u fa’alogo, talofa i si Faife’au! Ua uma fo’i la i le mea lea le ma’ua misa ma le tina o le aiga, o si Fa’afeagaiga lea sa tu’ufa’atasia si ma aiga!”                            

tusia: Leua Aiono Frost