Ads by Google Ads by Google

Pou Tiute a Leoleo

“Sole e foliga lava e faigofie, ae ono lamatia lava ola i le ta’ua galuega nei! Lea ua fai si fa’aletonu o lagona, ona ua soso’o lava fita o le galuega, ma le tau’ai fo’i i ala le ta’avale!”

“Pou, o lo’o i ai le Atua e tate fa’amoemoe i ai, aua e le o faia o se gau mata’u, ae o le gau alofa i nisi. E i ai lava le pasene o le atunu’u, e fia tusitusi lima mai, ma faitio fo’i ona o le tatou le atoatoa, ae le iloa e na sui, o tatou uma lava o lo’o ola i lalo o le lalolagi ua fa’ailo e le Atua, o le lalolagi agasala uma tagata!”

“Moni le saunoaga, paga lea, e le mautinoa lava le isi lima minute po’o fea o taufao ai le ola ma le oti, pe o sau le tama po’o savali ese atu nai lo ita!”

“O le mea lena, o lo’o matu’u atu fo’i i le Toea’ina! E matua le fai loto fo’i le nu’u manu e filifili ai sou manatu, pe a o’o lava na faliu mai le Toea’ina, tusi mai ma lona lima, “ Oe lena, sau!”

“Se o’o loa i lou itu Fa’afaife’au sole, amata ona ou popole, aua e leai se fomu o i lalo o le la e tusa ma oe, e tele le mea e fa’amalosi tulafono i lalo nei, ae pei oe o Kapilielu, le agelu fa’apitoa a le Toea’ina na auina mai e susunu i laugutu fa’a’ole’ole o le tama o Isaia!”

“Afai ae misi atu i lalo nei, ae o tau pipi’i ane ai lava sina vaega o le Tusi Pa’ia e ta’u ai i le molimau, sa faia se faiva o le fa’alogo i le lauga a le faife’au sa tima’i mai ai i le ao ma le po, ae le’i Bingo mai lava i le taimi o le faigalotu se’ia o’o i le tulua o po ma ao! Ha ha!”

“Se ou te ofo pe afai ae le maua se ta’ua nofoaga i le lagi i le taimi e toe saili ai so ta pou tiute e ta’amilo ai i le malo i le Lagi!”

“O ai na fai atu o ta’ua e avea ma le au fa’amalosi tulafono a Iesu i le lagi, sole Pou, o ta’ua e fai ma fasi la’au e matamata ai le afi a Satani!” Ha Ha!

“Ae feololo pe ana matamata ai le afi mumu pea o le lamepa a Iesu, ae o lea o le afi ma le teio a le tama leaga o Satani! Oka ua sili ai le to’otuli ma tagi sa’o lava i le taimi nei, ae le’i toe o’o mai se vala’au, ae o lea lava e fa’asasau!”

“Sole, fa’atoa o’o mai se ta’ua vala’au, ae ua toeititi uma le afiafi, o mafaufau loloto i le mea na tupu i si la uso o tatou, ‘aua la le fai ma mea e tatou te so’ona faia ai fua tagata lautele, aua o le ma’i lava lea ua tupu so’o, e fai e isi tagata i o tatou uso i le galuega, ae tetele ai fua tatou i  nisi i le taimi e fa’ataunu’u ai tiute fa’alaua’itele.”

“O le isi lena mea, se tau fautua atu i lau fa’alaititi fou lena, tau tu’u le mea lena o le le alofa, e va’ai atu lava i tagata matutua, ae a fa’amalo mai ma le toniga sole, e muliga fo’i le teine ua mae’a a’oa’oina e le vaega a le Maligi Koa ma le Ami fa’aleoleo ali’i!”

“Oi e fai atu le su’e fa’alima ae le pasi lava se togi e 10 mo le maligi, ae o’o mai loa ina maua si avanoa i le ta’isi ma le moa, leai se va’ai alofa, ae na’o le masau fa’amalo solo ua tau lavea atu ai lana puniloa!”

“Ha ha, o le a lena mea o le puniloa ali’i Sauni? Sole, talu ona e alu i lau vasega fa’asamoa, ua e sau ma alagaupu, ua matua ou leiloa, ai sou poto i lau vasega lena!”

“Aua, fai mai e ese lava le puni matatogo, e la’u puniloa! A fai loa la’u mata uliuli ua le iloa mai ou fatu mata, o lona uiga ua ou i ai i o’u uiga ua puniloa!” Ha Ha Ha “Pei lava ua fia ‘ave fo’i la’u fa’asamoa, se’i tau fafaga mai lo’u mafaufau i mea nei ua ou fa’alogo atu ua amata ona e fa’ata’ita’ia mai i lau tama, i mao sasalu se i si fai atu sa’u faata’ita’iga o au faiga, ae amo ai se ‘ala i tuataliga.”

“O oe lava,a e o lea o le a pasi uma atu mea ia ua ‘ou maua mai le vasega lea ia te oe, aua e tau totogi fo’i lau $100 i le unite i le a’oga i le Kolisi, ae na’o le fafaga ane lava o lau ma’a, ae o le a fa’asolo atu mea ua mae’a fafaga mai ai si o’u laulaufaiva e vaega fai mata i le Kolisi!”

“Hi hi, Sasalu atu o le puniloa, ae le iloa, ua punimatatogo le mea!” “Sole, o ia lava lena, e tasi lava le ala i mauga i olo, po’o lau o le fiso, o lau a na o le tolo!”