Ads by Google Ads by Google

Pou tiute a Leoleo

“Ua vala’au mai le gaoiga lea e fia siakia po ’o a mai le ata a le ali’i fai'oloa, lea ua fa’apea e iloa uma lava mea sa faia, ae maise e tula’i mai e iloa lelei lava e le fai'oloa ma lana 'aufaigaluega se tasi o nei ali’i!”

“E a ea, lea ua manatu lava o sao lana mea o fai, ae emo ane le ata, o lo ’o manino mea uma i le silafaga a le fai'oloa ma le 'aufaigaluega, si ona fia tama ninja, ae leiloa, o le ninja e sau ai le Saina!” Ha Ha.

“Ia ua vave nei le manatu o le ali’i talavou, e le tilotilo atu le video ia te ia, ae na vave lava le pikiapu a le 'aufaigaluega, manino lelei ai ma le mata o le vai, ua maua fo’i si ona sui, ma e le faigata lava ona piki mai!”

“Oka se mea ina a mataga sole, o lou manatu ifo lava oe, ua e sao mai le pu o le avi’i, ae uma ane, talofa e, o lo ’o maua taitaia oe lena e le tagata ua loa o lua mafuta i le galuega, e lelei fo’i ma si ana tatala masini tupe a ea?”

“O mea na e special ai le ali’i lena, o le tatalaga o le masini ina ia fa’asaoina aua le leaga!” Ae sau ai loa i tua ma le fa’asalalauga, “ia e sau e tatou te talanoa, e sili lena e vave ai ona maua sou to’omaga nai lo loimata maligi i TCF po ’o Tafa’igata.”

“Ioe o le mea fo’i, e mafai lava ona 'ave le vaega mai sisifo i Tafa’igata e tulia ai latou fa'asalaga aua o le tumu toe saisai lea ua i ai lo tatou nofoaga i Tafuna.”

“Ia uma loa le ta asiasiga lea i si fai'oloa, ona ta tatalia lea o se vala’au mai le Base fo’i pe i ai se i si fa’aletonu i sisifo ta te fa'ananati atu i ai.”

“E lelei sia Saina, ua alofa mai i nai o tatou tamaiti talavou le taupulea amio, o le faiga lea o tatou fanau, ae fa’afetai o lo ’o manatu lea faipisinisi e fa’amagalo i latou, ae sa'ili se ala e pei o le faigaluega ma tulia le seleni ua avea i lona pei.”

“E sili fo’i lena mo le faipisinisi, aua e moni lava e fa’anofo le tagata i le to’ese, ae le toe maua ai lana tupe, e sili ona lelei le toe fa’atumu atu i le seleni nai lo se isi lava mea i le faipisinisi lava latou!” “E moni fo’i oe!”

“Sole ua toe vala’au mai le base, Talofa ua mae’a le sa'iliga, ua 10/4 mea uma.” Oi sole e a ia ua lelei o le a fa’alatalata i ai i’ina!”

“Ia Sauni, o lea ua fa’ailoa mai e ao ina ta tu lata i le Veterans Memorial i Tafuna, o lo ’o sa'ili ai siamupini a le fanau talavou a’oga maualuluga fo’i.”

“Oi sole le vaega fo’i lea a tuai ma le lelei le tamo’e ona fa’avave lea i le tau’ai ma’a o ta’avale a nai tamaiti saoasaoa?”

“Pei lava o le ma’i lena e matele i ai le fanau a’oga i lau a’oga, ae le fa’apea le fanau a’oga lea e sa'ilia siamupini lea! Ae o le ta tiute lea e fai mai o le tu latalata lava i ai, ina ne’i tupu mai se mea, ae o lo ’o ta’ua pi’i ama lava i ai!”

“Ua tau sau le fiu sole e tima’i i tamaiti a’oga, ae a o’o lava ina vevela le fia tama leaga, e oso lava mea saoasaoa a tama. O le tala mai le isi afiafi lea sa faia ai fo’i tu’uga fa’ata’ita’i, na vevela lava fo’i toto o le au vaega e kipia taimi, ae o lo ’o tutu’u le fanau a’oga.”

“O le a la le mea na tupu ali’i Pou i lena afiafi? O le ituaiga tagata lena e matua le tatau lava ona auai i na ituaiga o tofiga, ma ua tatau loa ona fa’ate’a uma lava la’ua na i le taimi lava na tau tupu ai fo’i lena mea!”

“Ua le o toe i ai, ae na tau oso lava le fe’afe’a o lo’u tina, manatua o si ou brother lea e koleni fa’apitoa ai e Samoana, ia ae oso mai le ali’i lena kola le tama o lo ’o tauina ‘ai o si o’u uso, ae o lo ’o tau pu’e ata a si o’u tina. Oi oso atu lava Mama e le’i tele lava ni tala, ana le vave ona oso e tu ai le fa’amalu i le puimanava, ae ua fia fusu i le isi tamaloa sa tau ‘ai i la latou aoga.”

“Oi sole, na fai lava lea o tauga'upu, oso atu loa Mama fai i ai, a lua fia fusu, o i fafo o le malae, ma ‘aua nei toe va’aia oulua i totonu o ta’aloga a fanau a’oga, a le oso ai misaga a fanau a’oga i taimi e fai ai latou ta’aloga, ona o outou lea e o mai e tapua’i ma maimoa ae amata ai le fia fa’aalialia o tou malosi! Po ’o ai fo’i le tagata le atoatoa le mafaufau ona ‘avatua oulua tou te faia’oga i ta’aloga a le fanau?”

“Ua lava ai lava Mama e faia le fa’ai’uga a le matagaluega o Leoleo ma le vaega o fa’amasinoga! ha Ha! Ua tatou iloa lava, e tusa po ’o le a le fia a’asa o tama, ae va’aia loa Mama ua ita e le taitai ona toe pa’u atu se 'upu ae fai loa ma le mea e ao ina fai. Ae o a’u na lulu fo’i si o’u ulu ma fai atu i lo’u tina, suga e, soia e te oso vale fua oe i mea e le tatau ona e faia, e te le fia va’ai lava fo’i i si au tama o a’u o totolo solo pe a ta maua atu oe ua fasi mai oe e se tasi i na nofoaga.”

“E a ea, e moni lava, aua e tiga lava lota pala’ai, ae a va’aia lota tina ua so’onafai mai e se tasi, e oso lava le fe’ai oso fa’asoloatoa i totonu o le mama, ae le lelei tele ni lima latou i lea mea o le fusu’aga!”