Ads by Google Ads by Google

Pou Tiute a leoleo

“Lea ua uma atu le vaitau o le malologa e vevesi tele ai i tatou, ae fa’alogo atu ua fai mai le fiafia a le matagaluega o leoleo i Samoa, sole, e tatau fo’i ona fa’ata’ita’i i ai i tatou i nei mea matagofie e oso mai le uso o tatou i Apia.”

“Manaia le manatu lena e fa’aoso ane i luga o le tatou fonotaga fa’alevaiaso, pe le maua ai se ti’eti’e i le tipoti e avea ai oe i Manu’a ae ave sa’o lava a’u i San Francisco! Ha Ha!” “E o a na San Francisco, e va’a pa’u sa’o lava oe i Aunu’u!”

“Oka se matou pisi anapo ali’i Pou, e te iloa e na taso’o mai lava le fia maua o se fesoasoani i ta’avale a le falema’i, ma pisi atu ai, aua e tele na’ua le vaega fia ulaula mealele lea e feoa’i nei, au amata ona le toe fefefe le tupulaga e fa’ailoa mai latou mata mumu i leoleo auala!”

“Ia o le tou vaega lea sa latou lukia i lalo le fale o si tamaititi a ea? E laki ali’i o le tamaititi ua sili ma le 20 tausaga, ae fai mai e oso lava fo’i si tou mea maua mai ma le sope i si ali’i matua e fai mea fa’alilolilo i si ona to’alua!”

“O a fai mea fa’alilolilo, sole, e fiafia i ai le fafine, ua leva na a’oa’i teineiti e ‘aua lava ne’i tautala, ae le tu’ua i ai e matou se avanoa, ua lelei lava e matua selau pasene lava fo’i le fesoasoani mai a le matagaluega o va’aia aia tatau a le fanauiti!”

“Se Pou, aua e te fa’apena mai au tala, ua ou iloa lelei lava, e le o le mea lena e te fia oso oso ai e fai mai case na, ua ou iloa lelei lava lou fia pi’iama lava fo’i i le teine fou lena ua fa’a’i’i mai si ona leo i le telefoni pe a fia talanoa mai nei ia oe! Aua le ata, ua toe lava o se isumu na te le iloa au faiga na e tau fa’apa lava!”

“E aua le fa’apea na o outou na o mai i mea na, ua leva ona matou maua fo’i avanoa e sipaika ai autaliga o mea na! O le manatu lava o oe o lea lava e tau fa’apa se pomu? Uso, aua e le o toe laiti fo’i tama! O tama nini’i la i aso lava la, ae o le taimi nei, o mea ua iloa e nini’i e ofo fa’amaga ai lava le au fia sifi!”

“Ia malo ia oe, ae fai mai o lea e fia ‘ata atu fo’i i mea o si tou sifi!”

“Ia o oe lava lea e fa’asese atoa le mataupu a ta’ua, ae o a’u latou lea e avatu sa’o lava le mea na tutupu! E le’i leva na tau manava atu i le ofisa, ae toe tatagi le telefoni o le vaega o tama’ita’i ua ova le onana, ae tatau ona avea e se leoleo le latou ta’avale i o latou fale!”

“E le’i fa’atafa ma’ua ma la’u paga, oso i ai, ae uma ane, sole, leai ma se alofa mai!” Ia pagai ai lava le fa’afetai a ea? Se o le tau fa’ase’e ia o nei mea o tina, ua ‘ese na fai mai tala e fa’agau ai lota loto e oso e ave le ta’avale i le latou aiga, o’o i le fale toe la’u atu mea sa i tua o le ta’avale i le fale, ae uma loa aumai ma le fa’amanuiaga o le po, ma ia tama lelei!”

“Oi e le o tau goto ane lava i le mafaufau o lena tina, o le tama ua matua, o lo’o fia maua fo’i le ali’i lena o lelei!”

“Aua o lea lava e lelei le amio a tamaiti, aua e moni lava e maua lava manuia i mea nei o tina pe a fa’amaoni i galuega e ao ina fai. Pau le mea, ou te le malamalama pe mafai ona maua se manuia ali’i Sauni, pe afai o le tina lea e fa’amanuia mai o lo’o fa’asua’ava, ma ua toetoe lava a aupua’i i la ta ta’avale.”

“O le mea lena, e fa’amasino uma lava i luga, aua afai ae e te fa’afesili ai i le tatou faifeau, e tasi lava le tala e fai mai, ‘aisea na le poki uma ai lava le mea lena? ha ha ha!” “Sole, itiloa a tele na’ua fa’aletonu e alia’i mai i si ou afio’aga, e le o malu puipuia nai tagata i lau puipuiga fa’aleoleoo le afioaga. Ua maua fo’i lo’u manatu e fa’aalia i le tatou fonotaga, “Ole afioaga o nofo ai le tagata, o fua va’aia fo’i lena o si ona olaga!”

“O le mea ea ua si’itia le pili o falema’i ali’i, aua e ui lava ina si’i, ae o lo’o toatele lava e la’u mai i le ta’avale a le falema’i mo togafitiga! O le popole ea o nai tagata ua mafua ai ona si’i ma’i mai!”

“Ae le taulia ai le ave pasi ma lona moe ae taumafai ai ona aumaia i luga lana pasese?” “Oi ae o se mea malie ai, na sau le papalagi sa i le isi pasi na toe sefea le to’atele o le pasese a le ali’i lea, ma fa’ailoa mai e fia fusu tele le ave pasi lea ua lavea lana pasi.”

“E a ea, ae na fa’apefea ona iloa lea mea?” “Se fai mai na fa’atu lelei e le ‘ave pasi ua lavea le latou pasi ae lu’i e ia le latou ‘ave pasi! Na muamua loa lea, ae toe o’o ma i latou i le laueleele sa tupu ai le fa’alavelave, oka ua faife’e mai ma le pasese!”

“O le va’aiga atu lea, ona o le tauva lava i pasese, e motusia ai le ava fatafata i lea fo’i auaunaga!”