Na fa’apa e se tasi ni pomu na tatao i autafa o le Ofisa o leoleo i Villa Rica, Colombia i sisifo, ma ua fa’aleagaina ai le tele o mea o lea Ofisa, ae maise ua maliliu ai le to’aono o tagata ma le silia ma le 12 i latou ua manunu’a ai.

O lea pomu ua fa’apaina i autafa o le Ofisa o Leoleo i Villa Rica, na mulimuli mai i le aso na fa’apa ai fo’i le isi pomu i Tumaco ma maliliu ai tagata e to’a 11 i le itu i saute lava o lea malo.

I le taimi nei, ua amata ona va’ava’ai toto’a leoleo i le vaega tete’e o le ìFarcî lea ua masalomia nei, o lo ’o latou faia nei faiga tau fa’amata’u ma maliliu ai tagata e to’atele. Ua 'iloga mai, ua aga’i lava ina mata’utia atili atu  faiga fa’amata’u a lea vaega e fa’ataute’e ai i le vaega o leoleo lea latou te puipuimalu le malo.

O lea faiga e fa’ailo ai lo latou tete’e tele i le fasiotia o lo latou ta’ita’i i se osofa’iga a leoleo i le masina o Novema i le tausaga ua te’a. Ua fa’ailoa mai e leoleo, o le ta’ita’i o leoleo o le ofisa lea e i Villa Rica ua aofia ai i le to’aono lea ua maliliu.

Ua fa’ailoa mai e to’a 18 leoleo sa i ai i totonu o lo latou Ofisa i le taimi na fa’apa ai le pomu ma ua 'iloga mai sa fa’aaogaina kalone kasa ma isi mea fa’apapa na fa’aaogaina i lea pomu. I le aso Lulu o le vaiaso na te’a, 11 tagata na fasiotia ae to’a 79 i latou na manunu’a i le pomu na fa’apaina i fafo fo’i o le Ofisa o Leoleo i Tumaco, lea e gataifale i le vasa pasefika.

Na fa’apa tonu lava lea pomu a’o fono le ta’ita’i o Leoleo Gen. Jorge Rojas ma lana leoleo sinia ina ia maua’a fuafuaga e osofa’ia ai ni isi nofoaga o lo ’o matauina o lo ’o gaosia ai fuala’au fa’asaina ma tufatufa mai ai i le atunu’u atoa.

O se mea e ofo ai, e le’i i ai ma sina maila o le ali’i ta’ita’i Leoleo Gen Nieto Rojas. I le taimi nei e silia ma le 300 isi leoleo ua mae’a toe la’uina atu nei i le Ofisa o Leoleo i le a’ai o Tumaco e fa’aauau ai galuega ua mae’a fa’ata'oto e ao ina fa’aititia ai le fa’aaogaina, gaosia ma tufaina mai o fuala’au fa’asaina ma vaila’au o’ona i tagata lautele i lena itu o le atunu’u.

O le ali’i Minisita o le Puipuiga o le Atunu’u Juan Carlos Pinzon sa ia ofoina mai le 1,200miliona Pesos mo le tagata na te fa’ailoa atu le tagata po’o nisi fo’i sa latou faia lea pomu ma fa’apa ua afaina ai ali’i leoleo ma fa’aleagaina ai le Ofisa o Leoleo a lea itu o le atunu’u.

Ua mae’a fo’i ona tula’i mai le pulenu’u o Tumaco ma fa’amalosia le Sa i afiafi fa’atasi ai ma le fa’atonuga ina ia tapunia a’oga i le aso Tofi ona o le popolega foi ne’i te’i ua toe pa se pomu a’afia ai fanau a’oga.

O Tumaco, o se tasi lea o a’ai ua fa'amauina, e sili ona le amana’ia ai le tulafono i totonu o Colombia, ma ua 'iloga ona tele ai kegi ma isi faiga fa’asolitulafono e aofia ai ma le fa’atauga o fuala’au fa’asaina ma vaila’au o’ona. O la latou uafu ua matele ina matauina e faia ai pea nei ituaiga o fefa’ataua’iga fa’asolitulafono.

saunia:  Leua Aiono Frost