O le poloketi a le ASPA i Faga’alu i le va o Matafao Elementary ma le fale e nofoia ai taane suauu a le malo, ua fa’ailoa mai, o lona taimi e tatau ai ona mae’a lelei o le aso To’ona’i o le vaiaso nei.

Ina ua fesiligia le ali’i supavaisa o le Paramount Builders, lea o lo’o faatautaia le poloketi,  Reupena Filemoni, ae ta’ua ai e ia, “O le aso To’ona’i nei sa fa’atulaga e ao ina mae’a ai le galuega. O le galuega fo’i na fa’atulaga, o le puipuia lea o le laina a le ASPA mai le afaina ona ua atia tele le apitagalu o le itu o le motu e le tetele o galu o le gataifale.”

I le fa’amalamalamaga mai a le ASPA, le pule sili Utu Abe Malae sa ia fa’ailoa ai, “O le laina ‘Tieline & Feeder 8’ fa’atasi ai ma le paipa vai e tusa ma le 20 inisi le lautele ua tauau ina afaina aua ua aia lea itu o le motu i le tetele o galu, ma ua solo ese fo’i le palapala aga’i i le sami, ae ua ta’atia fua ai aga’i i le suasami e vave elea ma atia ai fo’i. O lea ua fa’atulaga ai lea galuega ina ia toe tanumia lelei, ma fa’aleleia atili ai ma le apitagalu ia malosi ma anagata, e fetaia’i ma le ma galu malolosi i taimi uma.”

I le mae’a ai o lea galuega, ua fa’ailoa mai, e tusa o le isi fo’i 20-30 tausaga ua mafai ona fa’asaoina ai nei laina, ma ua va’aia toto’a le galuega o fa’atautaia nei, ia maua lea umi o lelei pea. Ua mae’a fausia fa’alelei ma le ala savali i luga tonu o le apitagalu ae ese ai le ala savali lava latou o lo’o i autafa tonu o le alatele.

I le umi o le galuega atofa e 400 futu, ua aofia ai le 5 o vaega o le apitagalu e ao ina matua fa’aleleia, ma ua va’aia ai e le mamalu lautele fegasoloa’i, le matua alu i lalo o le masini suaeleele a le Paramount Builders ina ia fa’atino le fa’atulagaga o ma’a tetele e talia ai le malolosi o galu i le apitagalu.

“E fai lava si faigata o le galuega, ona ole fa’asaoina fo’i o lenei masini tele i lalo mo le folaina o ma’a mo le taligalu. Peita’i, e fa’amuamua lava le va’ai toto’a i le saogalemu o le masini ae maise le ‘ave masini, le ali’i o Kapeni Mikaele,” o se talanoa mai lea a Filemoni.

Taua e le pule sili o le Paramount Builders Papali’i Lauli’i Seumanu “o le galuega e fuafua tonu o le tai pe ma le tai sua. Afai e pe le tai ona maua lea o le paganoa e fa’atino ai tiute o tama, ae a o’o ina sua tutu’i mai le tai, ona malolo lea aua e matua le maua se masele e fa’aauau ai.”

“Ona o le taimi ua fa’atulaga, ae ua foliga mai, ua tauau ina vave aua e fuafua fo’i i le ASPA i a latou vaipanoa tonu e ao ina fa’aleleia ina ia fa’atulaga ma fa’ailoa patino galuega toe fa’aleleia e mo’omia mo le taligalu fa’apea ma le laufanua i luga e faamatagofie atili,” o lana toe saunoaga lea e tusa ai o le galuega.

E ese mai nei vaega ae ua iloa fo’i ua i ai se tasi o poloka sima e masani ona fa’aaoga e tagata e siakia ai laina o paipa vai a le ASPA, atoa ai ma uaea o laina a le ASTCA, ua matua masi’i  ese lava ona o le malolosi o galu, o lea fo’i poloka mo tagata faigaluega e ao ina toe fa’atulaga sa’o ma ia laugatasia ma le laufanua i luga, ia le afaina i tafeaga o vai o le alatele.

Fa’ailoa mai e Utu Abe Malae, “Ua alia’i mai e tatau ona toe soso’o le taimi mo lea galuega, ina ua mautinoa ua toe fa’aleleia uma nei vaega o le laina ua aliali i le suasami ma le ea, ae maise o laina nei e feso’ota’i lelei ai le Malosi’aga Fa’aeletise i Satala ma Tafuna.”

A’o i ai pea le avanoa e fetufa’i ai fo’i i le galuega ma le ali’i fa’atonu sili o le ASPA sa ia fa’ailoa mai ai ma se isi mea lelei ua si’itia i ai le auaunaga mo i latou uma ua i ai mita Debit i o latou fale.

“O lo ua i ai le suiga lelei mo i latou na, ua mafai ona e fagaina lau debit mita e fa’aaogaina ai feso’ota’iga tau initeneti, ia tau le toe totogia fo’i se pili i le fa’aaogaina o le Ofisa o lo’o tautuaina le lautele i taimi ua manava ai galuega.”

“I le taimi nei, e i ai le totogi mo itula ua manava galuega i aso ta’itasi i le Ofisa autu lea e tatala mo le 24 itula ia mautinoa ua sapalaia aiga uma o fa’aaoga tatou Debit Meters, ae a fa’aaoga le laina lea o feso’ota’iga i luga o initeneti, po po’o le ao, ona to’ese lea o lena totogi,” o se toe fa’aopoopo mai lea a Utu.