Polokalama Fesoasoani e Atina’e ai Soifua Tautua o Fitafita Tuai

Mai le tu’ufa’atasiga o sao o Ofisa o Fitafita Tuai a le Malo Tele i le Setete o Hawaii, Le Ofisa o Fitafita Tuai a le Malo o Amerika Samoa, Le Ofisa o Faleomavaega Eni fa’apea ma tautua a le OPAD sa mafai ona fa’alauiloa mai ni fua o fa’ato’aga ua fa’atautaia e Fitafita Tuai a Amerika Samoa, i latou na fa’aaogaina nei fesoasoani mo fa’ato’aga e totoina i le vai.

 

O se tasi o fitafita tuai o Apela Afoa sa ia fa’aalia mai le tapenaga o lana fa’ato’aga o lo’o totoina i le vai, ae o lo’o fa’aola ai fo’i le i’a vai o le Tilapia i le vai lava lea e fa’ata’amilo mai ma toe toto ai le toga kapisi, lakisi, strawberry, ma isi fuala’au aina fa’apena.

 

“O le igoa e ave i la’u ituaiga o fa’ato’aga o le “Aquaponics” o le fa’alelei eleele o lo’o fa’aaogaina o fe’au a i’a o lo’o fa’atata’a ma fafaga fo’i i le suavai lava lea e tasi. A uma ona fa’auia mai lea o le suavai o lo’o faia ai fe’au a i’a, ma fagaina ai le iliili lea e totoina ai le kapisi latisi ma isi fuala’au ‘aina uma nei.

 

E i ai pamu e fa’aola mai le eletise e ao ina fa’aaoga i lea fa’ato’aga, ae ua fa’alua nei ona selesele Afoa i lana fa’ato’aga e fa’atau atu lea i le School Lunch Program a fanau a’oga.

 

Mai le fa’ato’aga a le susuga Ed Avegalio, sa matua folasia le tele o ana fuala’au ‘aina sa toto ae maise o tipoli Tahiti lapopo’a ma le matagofie. O nei oloa uma, sa totoina e fa’aaoga ai le “Hydroponic” po’o le isi fo’i ituaiga o fa’ato’aga e totoina fo’i i le vai. E o’o lava i le talo, sa se’i mai ina ia va’aia le mapo ma le lapopo’a o talo, o fua o lana fa’aeleeleaga ua ‘aina nei.

 

O le tala mai a lea Fitafita Tuai, “Ua mae’a taulia lava la’u fa’ato’aga i le polokalama a le School Lunch ma ua fa’atau lava fo’i i o matou aiga tuaoi ma le matou nu’u!”

 

O aiga o nei fitafita tuai, o tagata iloga i le matata o le Faifa’ato’aga, e fiafia fo’i i ai i la’ua e fa’atino mea sa soifua a’e o faia e matua, ae ua i ai le suiga tele, “Ua le toe tigaina e vele ni vao e fai ma fili o le faifa’ato’aga, ua na’o le va’ai lava o le taimi e tatau ona fa’aalu ai le vai aga’i i le fa’ato’aga, ma le taimi fo’i e tatau ona fesuia’i ai nofoaga e tu’u i ai fa’ato’aga, ia ma le taimi e tatau ai ona ‘aina ma selesele i fua o le fa’ato’aga.”

 

“Ona o lenei vaitaimi, ua tau le fiafia tagata e fa’apalapala atigilima, masalo o le ituaiga o fa’ato’aga lenei o le a mafai ona fiafia nisi e fa’atino, e le toe velea ni vao ma tiga ai le tua e punou i lalo.” O le tala ata lea a le susuga Apela Afoa o Taputimu.

Comment Here