Ads by Google Ads by Google

POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua maea ai le evaga a Lisati ma ana uo, ma ua lagona ai e le tamaititi le fiafia ina ua maua le avanoa e mafutaga ma tafafao ai ma nisi o ana uo i le aoga.]

 

E fo’i le tamaititi o Lisati i le fale i le po lea, ua lagona le fiafia o lona loto ina ua maua le avanoa e eva ma tafafao ai ma ni isi o ana uo ae o le itu taua i le mafaufau o le tamaititi, o lea faatoa maua le avanoa e ulufale ai i fale’aiga ma se tasi o fale tifaga tele i totonu o le aai o Aukilani i Niu Sila, ma o ni vaaiga e maofa ai lona loto ona o le matagofie ma le mananaia o nei nofoaga, ae ua atili ai lona fiafia ina ua mafai ona valaaulia o ia e le tamaitai o Lisa atoa ai ma isi ana uo teine mo le taimi muamua. Ua laalaa atu i le masina atoa talu ona i ai le tama i lana aoga fou ma ua toatele foi tamaiti aoga mai Samoa ma isi atumotu o le pasefika ua latou masani, ma ua amata ona aliali le taleni taalo lakapi o lo o nofo ma le tamaititi o Lisati. O Lisati i le aoga na faauu mai ai i lona nuu o Amouta i Savaii, na sili i mataupu uma e 5 sa ave i totonu o le vasega, o ia foi o se alii filemu ma le gaoia, ae tumu i le faaaloalo ma le agamalu i soo se tagata.

 

O le masina lona lua talu ona a’e le aoga na faalauiloa ai loa le taamilosaga lakapi taitoa 7 i totonu o le aoga, o se taamilosaga e masani ona fai i tausaga uma lava, e fili mai ai se au a le Iunivesite lea a Aukilani e auina atu i taamilosaga a Iunivesite ma aoga tetele i totonu o Niu Sila. E masani la ona fai le ‘au lakapi a tamaiti fou faatoa ulufale atu e faafetoaia ‘au lakapi a tama tuai o le aoga. Ua amata ona koleni le au lakapi a tama aoga fou lea foi ua faatasi atu ai ma Lisati e fia koleni i le au lea. O le tino malosi ma le maualuga o le alii o Lisati, o se tasi lea o itu na faigofie ai ona iloa o ia e le faiaoga a lana ‘au, o ia o se tagata e lelei i le taaloga lakapi.

 

“E ese le manaia o lau taalo alii Lisati, sa e taalo i se au a lau aoga i Samoa,?” o le fesili fiafia atu lea a le alii faiaoga Niu Sila lea ua avea nei ma faiaoga o le au a le vasega a Lisati, “Ioe, sa ou taalo i le au a le matou aoga, ou te fiafia foi e taalo lakapi..” toeititi le misi se aso e fai ai koleniga a le au ma maua le avanoa e talanoa ai Lisati ma le faiaoga, ma o iina na amata ai ona vavalalata le mafutaga a le au alii ia, o iina foi na iloa ai e le faiaoga o le ‘au, o Lisati o se tagata e tauagafau ona uiga, e fiafia i soo se tagata, e loto maualalo ma loto alofa, ae o se tagata e lelei lona mafaufau ma malosi lona tino i le faatinoina o le taaloga. O le aso na sosoo ma le aso e amata ai le taamilosaga a le aoga, na vave alu ai Lisati i le fale e vave tapena lana ato mo le camp a le latou ‘au, peitai na te’i le tama ina ua taunuu i le fale ae tatagi loa lana telefoni, ma ia vaavia ai o le numera mai Samoa, na te’i le tama ina ua hello atu ae faapea mai le leo, “talofa Sati, ai ua galo ia te oe lo’u leo, a ea ....”