Ua poloaina nei e le Komisi a le Iunaite Setete e gafa ma mataupu o Avanoa Faigaluega Tutusa (U.S Equal Employment Opportunity Commission - EEOC) le malo o Amerika Samoa, ina ia totogi i tagata faigaluega e toalua le tupe e $12,500, ona o le tagi na faaulu e Eneseiaso Liu, Maniua Lacambra ma isi, faasaga i le faailoga lanu o le malo ia te i latou ona o a latou tausaga.

I se tusi na tuuina atu e le ali loia sili lagolago ia Eleasalo V. Ale, lea o lo o gafa ma mataupu savili (civil) i le Ofisa o le Loia Sili, i le Loia Sili o le malo ia Afoa L. Suesue Lutu atoa ai ma isi loia i totonu o le Ofisa o le Loia Sili, o lo o taua ai aiaiga uma o le poloaiga mai le EEOC i le tupe e tatau ona totogi e le malo ia Liu ma Lacambra, o le umi e tatau ai ona faagata le totogiina o lea tupe, faatasi ai ma le laasaga e ao i le malo ona uia ina ia foia ai le toe tula’i mai o ni mataupu faapenei i le lumana’i.

I le pooaiga o lo o taua ai e faapea, o le aso 31 Aokuso 2011 na faaulu ai e le EEOC le tagi a Liu, Lacambra ma isi tagata faigaluega a le Matagaluega o Tagata Faigaluega a le malo faasaga i le malo o Amerika Samoa, i luma o le Faamasinoga Faaitumalo a le malo tele i Hawaii, ona o tuuaiga i le soli lea e le malo o Amerika Samoa o se vaega o le Tulafono Faailogalanu i Tagata Faigaluega matutua (Age Discriminating in Employment Act - ADEA).

O lo o finau Liu, Lacambra ma isi fai mai, o le faailogalanu o le malo na mafua ai ona tula’i mai faaletonu i a latou avanoa faigaluega, e ui sa teena malosi e le malo o Amerika Samoa ia tuuaiga, atoa ai ma le le manuia o se taumafaiga a le EEOC, ina ia aofia ai i le iloiloina o lenei mataupu tagata faigaluega uma a le malo o lo o aafia i le tulaga lea.

O le aso 21 Tesema 2012 na tuuina mai ai le faaiuga a le Faamasinoga Faaitumalo a le malo tele e tusa ai o lenei mataupu, faatasi ai ma le poloaiga ina ia totogi e le malo vaega tupe ia Liu ma Lacambra, ia aua ne’i sili atu i le aso 19 Mati 2013.

I se kopi o le faaiuga a le EEOC na tuuina mai i le malo o Amerika Samoa, o lo o taua ai le tatau lea ona totogi atu ia Liu le tupe e $7,500, ae $5,000 mo Lacambra, ma o lea tupe e tatau ona totogiina i totonu o le 90 aso talu mai le aso na tuuina mai ai le poloaiga.

O le tupe ua poloaina e le EECO le malo na te totogiina ia Liu ma Lacambra, o tupe ia e ao ona la maua mai lalo o aiaiga o le Tulafono o le ADEA, lea e aofia ai le totogiina o tupe mo la lafoga lotoifale, medicare ma le saogalemu.

Ua poloaina foi e le EEOC le malo o Amerika Samoa ina ia fai lana vaega mo le totogiina o vaega tupe mo lafoga lotoifale, medicare ma le saogalemu mo i laua nei, ae aua ne’i tipiina mai i le tupe ua poloaina e totogi atu ia i laua.

O le isi poloaiga ua tuuina atu i le malo, e aofia ai le saunia o pepa o le W-2 mo le failaina lea o lafoga a i laua nei e pei ona masani ai, ma ia totogi e le malo ni isi tupe e manaomia mo lenei gaioiga.

Afai ae maua siaki a i laua nei mai le failaina o a la lafoga, e tatau i le malo ona tuuina atu i le loia a le EECO o Anna Y. Park i le setete o Kalefonia kopi o la siaki na maua.

O isi tuutuuga ua tuuina atu e le EEOC i le malo, tauala atu lea i le Matagaluega o Tagata Faigaluega a le malo (DHR), ia faia ni suesuega i ni isi tagata faigaluega a le malo o lo o aafia i le mataupu lenei, e tatau foi ona toe faa faigaluega i latou ua mautinoa sa aafia i lalo o lenei vaega.

Afai ae toe faa faigaluega i latou na aafia i lalo o aafiaga nei, e tatau i le malo ona toe tuu atu avanoa sa galulue ai i latou ao lei aafia i aafiaga ua taua, e pei ona poloaina ai e le EEOC le DHR.

O tagata faigaluega e manatu le EEOC o lo o aafia i lenei mataupu, o i latou sa galulue i le malo amata mai i le aso 1 Iuni 2009 e oo atu i le aso 31 Tesema 2010.

Ua poloaina foi le tatau i le malo ona faia ni aoaoga se tolu mo tagata faigaluega o lo o galulue i vaega nei, ma e tatau ona oo atu ia Iuni 2014 ua maea le aoaoga muamua.

Na taua e le Faatonusili o le DHR ia Le’i Sonny Thompson i le fono a le Kapeneta i le vaiaso na te’a nei e faapea, e i ai le tagata faigaluega a lona Ofisa ua gafa ma le taulimaina o mataupu a le EEOC, ona o se tasi lea o aiaiga o le polokalame.