PHOTOS: FA’APALE SUSANA AVEA MA MISS SAMOA FOU

Ua avea nei le tamaitai talavou ia Susana Reti Fanueli ma Miss Samoa fou mo le 2013-2014 e sui tulaga i le Miss Samoa tuai sa i ai o Janine Tuivaiti, ina ua faapaleina o ia i le tauvaga e sailia ai se lalelei o Samoa mo lenei tausaga, i le tauvaga sa faia i le Hall a le EFKS i Mulinuu i le po ole aso Faraile na te’a nei (taimi Samoa).

 

Click to read English language version in Samoa Observer

 

O lenei tauvaga na taualuga i ai le vaiaso o le Teuila i Samoa, lea e pei ona faagasolo mai i le amataga o le vaiaso ma faai’u ai i le sailiga o se Lalelei o Samoa.

 

O Susana, 23 tausaga le matua, e galue o se Su’etusi, ma sa lagolagoina o ia e le kamupani a le Apia Insurance Company.

 

I le mae’a ai o le tauvaga sa faia, na taua ai e Susana i le au tusitala e faapea, ua lagona lona fiafia ma le faagaeetia ina ua faapaleina o ia i le tofi o le Lalelei o Samoa.

 

I le maea ai o lana faamatalaga lea, sa ia faafetaia ai loa ona aiga uma, uo aemaise ai lana aufaigaluega ma le kamupani sa lagolagoina o ia, ona o le latou lagolago ma le faamalosi sa tuu atu a’o alo atu ai mo lenei faamoemoe.

 

Ina ua fesiligia o ia i le isi laasaga lea o le a alo atu i ai, na ata le tamaitai ma faapea lana tala, o le a taumafai e avea o ia ma Amapasa mo Samoa i atunuu i fafo, ina ia faalauiloa atu le lalelei o Samoa i le lalolagi.

 

O Susana, o le alo tamaitai lea o le afioga ia Lupematasila Reti ma le faletua ia Lagaasa Fanueli.

 

Na aoaoina o ia i le Kolisi o Samoa i tausaga ua mavae, ma o lo o aoga nei o ia i le Iunivesite a Victoria, i Ueligitone i Niu Sila, ae o le taimi nei o lo o avea o ia ma Su’etusi Sili i le Ofisa Su’etusi a le malo.

 

E le gata na manumalo Susana i le taleni pito sili ona manaia, ae na manumalo fo’i i le Miss Photogenic.

 

O le Miss Australia, le tamaitai o Muliagatele Renera Thompson na manuina le tulaga lua i le Miss Samoa, ina ua ia manumalo i le Best Puletasi ma le Best Traditional.

 

O le Miss Mahealani Island Wear Teagan Martha Moore na mauaina le tulaga tolu, ina ua ia manumalo i le faailoga o le Best Sarong ma le Miss Interview.

 

fa’aliliu AFM

Comment Here