Photos and Slideshow: Tala i Kirikiti

Siamupini Teine o le Fa'asaulala i le Liki Kirikiti

 

Ua siamupini nei le 'au a Teine Faasaulala i le aso Toanai ina ua malo i Teine I'a Vai i latou suega siamunpini lea na faia i Asotau i Vailoatai, ina ua uma le taaloga i le va o le Lupelele ma le Asaga e su'e ai le tulaga tolu ma le fa.

 

Ua outou sii nei le afioaga ma tuu i luga o le mauga le nofoaga sa i ai Asomua i lena aso, ua outou ta'a'alo ma le loto e tasi, ma le fatu e tasi ma le agaga e tasi lea ua sapi ai nei le tapuaiga a le afioaga ae tainane le 'au faigaluega a le Atua.

 

Ua outou tau ma outou 'ae malo le faiva i le fa'atamasoaali'iga, po'o a ni mea e maua i le tou faiva, a lea ua maua nei e malumalo e fa'aali i le tou taalo faatausala i lena aso, le tapuaiga a le afioaga na latou tapuaia lo outou alo faiva.

 

Le alalafaga e afio ai lau afioaga Satele o le alo o Salamasina, afio mai alo o Fanene ia Tuatagaloa ma Te'o, susu mai le sa'o o Tuiasina ma le aiga sa Tuiasina. Alalatai mai lau tofa Maiavatele, ma le fofoga o le Avalopa. Mamalu mai le aiga Faletolu ma Falealili.

 

Lea ua o atu tou alo ma fanau ua 'ae malo le faatamasoalii ua tau le 'ai a le afioaga ma le alalafaga, ua siamupini le tou 'au a tamaita'i, ia fa'amalo i le tapuaiga le leoa ma le tu'i mai o le mulipapaga ua 'ae ai ma le manuia faiva a alo ma fanau i le aso Toanai. Malo le amio pulea ua outou faia, ua mafai ua toe teu ma ua matua teu, ua outou sii le afioaga i luga o le ma'a salalafa, malo le tausinio.

 

E fa'apena foi le afioaga o Atiulagi ma Itu'au le mea e maliu mai ai le Teine o le I'a Vai, le mea e afifio ai Malu o le Fale o Malota ma Ulutu, susu ai i laua Tama Matua, Alapalelei, Tuiagamoa, Tuilefano, Tuitasi ma Tuiolemotu ma le to'afa o le alataua, ma le mamalu i le aiga Aitulagi. Faliu le vai o Sina i le isi itu o le afioaga, o le mea e Afio ai foi le Falefia o alii ia Amituanai, susu ai le launatausala, le afioaga a Toilolo, susu ai le matua o Taulapapa, susu mai le Tuileata ae puipui malu e le fetalaiga i Tauto'oto'o ia Talia'aueafe ma Nanai o paia lena o le faleituau.

 

Ua tele lava nai mea na e faaletonu i le tausaga atoa lava nei, o le talituaa, o le sapo, o le ta (e laiti lava nai teine e lelei o latou ta, a'o le to'atele e tatau ona taumafai mai le ta.)

 

Ae na outou faamoemoe lava i te'a a le tou 'au faate'a, na outou se'e mai lava e le lelei o outou faate'a i le amataga o le liki lenei lava ua outou oo ai i le su'ega siamupini.

 

Taumafai mo le tausaga fou, e oo atu i ai ua tele ina lelei mai ta o teine laiti na e vaaia le alualu i luma o latou ta, ma 'aua le fiu gofie, e le'i fauina Roma i se aso se tasi. Malo le ta'a'alo, malo le ta'alo faatausala malo le ta'alo fa'atamalii, o le fai soo lava e maua ai le mea lelei ma le aoga i isi tausaga o lumana'i.

 

Na faapena foi le su'ega o le tulaga tolu ma fa, na vaaia ai teine faate'a a le Asaga i le matagofie o le la tulai mai i lea aso o ia teineiti, e pei a o le mea lea na vaaia i lena aso, o le talitua'a ma faate'a laiti nei a le Asaga. Ua avea le umi tele o le liki a tamaita'i ma mea ua maua ai tou faate'a lelei, o Agape ma Aleluia.

 

Na faaali le faasea o le kapeteni a le Lupelele, na sau fai mai i le komiti, "Lea ua mautinoa lava le malo o le Asaga, ae o le a le mea na tuu mai ai 'au ou te sasau lau pate, le mea le fetaui lava lenei o le tu atu i luga ae oo mai le te'a a Aunuu ae la e tau tatala ou se'evae…! Ou te ofo lava i le komiti poo le a le mea na taofi atu ai…..fai faalelei tou faaiuga..!!!!!."

 

Faamolemole o le mea muamua (1) ua e tu i luga o le malae kirikiti, e pule lava le faate'a ia i le lana faiga e fai. (2) E le faiga fa'aaloalo le mea nei, o le popolega foi e i ai, te'i ua u lau ta ona fiu lea e tape oe. (3) E sese lea mea na e tago ai e tatala ou se'evae, o le a le mea na le tatala ai i fafo, ona e alu lea i luga o le malae. (E sa'o pe sese ?…. ia aua le toe amanai'a na mea ae taupule mo lea tausaga.)

 

Ia o aga lava o le taaloga, e mautinoa e silafia e susuga a le tamaitai kapeteni a le Lupelele, ao o le naunau lava i le fia ta na alai ona saunoa mai i le komiti, o nai mea e faanoanoa ai i lena aso.

 

Ia fo'i atu la outou 'au Aunuu ma le tu tolu, ae outou iloa e faigata ona fai i ai se fuafuaga i le lelei lea na i ai le 'au o le Asaga ina ua uma taaloga e fa o le liki, i le sau na sau ai nei, e oo lava i le suega o le tulaga tolu, ua faaali i le aso lena o le tou taaloga.

 

Le tapuaiga a le afioaga, le mea o fa'aafio ai le Lupega o Lutali ma Lemafa. Susu mai le Sa'o o Sagale, susu mai le tama a aiga i le lau afioaga Fonoti. Susu mai Sa'ole o le Maopu, mamalu mai oulua fofoga o le Saole o Taufai ma Fuiava. Faapea Saleaumua ia Tautolo, Lauvao ma Matila, mamalu mai lau tofa Sagatu, o le launatausala ia Saole ma Saleaumua.

 

Malo le taalo faatamalii malo le faatoatoa i luga o taleni ma agava'a, ia faatasi atu le Atua i a outou faiva ma galuega o loo outou feagai ai, ia manuia le fanau o loo gafa ma a'oa'oga.

 

Faapea foi le 'au a le Teine o le Lupelele, e le faigofie la outou taumafaiga i lenei vaitau, faamalo foi i le kapeteni aua le tau atina'eina o le tou 'au, e tele foi i teineiti aoga le tou 'au, malo le finau malo le saili malo.

 

Le tapuiaga mau i lau afioga Letuli, o le Punefa o le motu, o oe foi o le Maopu, susu mai oulou Sa'o ia Lealaimatafao ma Letuligasenoa, susu mai lo ouloa faauluuluga o le meana'i o le Leatualevao. Susu mai le matua Timuiaileala. Susu mai le taauso Leituala ma Tauaimulimuli, mamalu mai upu i le Tagaloa o Sagapolutele ma Funa'iipaogo. Le mamalu lena o le Lupelele.

 

FAASAULALA 97 'ai, 19 pe. VS I'A VAI 75 a'i, 19 pe

 

O le 'au lea a le Faasaulala, o se 'au e leai se mea e faaletonu ai, fai o le lelei o ta, lelei faate'a toe tuu atu foi i le talituaa e sili mamao lava i le latou 'au a tama, o le Limua'a. E leai se alapolo e tutu mai ai teine, toe lelei uma sapo a teine, toe mataalia.

 

E le faamoemoe le isi i le isi, e fai lava le teine latou ia, na tata muama ina maua ane le seleni e tata muamua i latou.

 

O le aso foi lea na u ai le ta a le teine lea o Gail, lea na u foi lona ta i le latou taaloga muamua o le taamilosaga, ae o lea foi ua toe faapena foi i le taaloga o le su'ega siamupini. Na misi loa le se'e e le teine o le I'a Vai, o le faiatuga lena na maua a'e lana pe ua 28 ana 'ai, ma o ia foi ma toe oso mai ai 'ai a le Faasaulala.

 

Na tutu mai ma Leata ina ua 4 pe ae 12 'ai, ae pe mai Gail ua atoa a latou 'ai e 35, e tusa e 23 'ai na maua i le tataga a le toalua lea.

 

Ao le taimi lena i le talituaa a le I'a Vai, ua sasi solo lava i le leaga o mea e tutu mai ai le talituaa, i le vaaiga i ai, a le sau lava se teine tuai a le I'a Vai e sapo le polo, e le maua le pe.

 

A'o isi teineiti fou lea ua fememea'i i le le mautonu poo fea e tutu ai ma talituaa, a ua le tutu i le alapolo, na manaia le te'a a si tamaitai o Taia Pati, tiga le leaga o ona fofoga i le 'pink eye' a ua taumafai lava e te'a le polo i le mea e gata ai lona malosi.

 

Ia o 'ai silia ia a le Faasaulala, o Gail e 28, Vaai 18, Leata 13, Tutaima e 10, o Penina e 8, Kuka 8 ma Tina e 4, ae isi teine e ta'i tasi pe ta'i lua foi o latou 'ai ona pe lea.

 

Ina ua uma na tata le Faasaulala, na maua o latou 'ai e 97, toe tolu lava atoa le selau, ae o le mea e laki ai le latou 'au o le leaga o sapo a le I'a Vai. E tusa ana maua uma sapo, e na o le fa sefulu lima 'ai a le Faasaulala. Na ai silia Terry Custodio lea faatoa kirikiti i le tausaga lenei i le latou 'au kirikiti, ae o le mea lea ua vaaia o le alualu i luma o kirikiti a le 'au fou ia.

 

E i ai Josephine, o Terry, Masela, lea e fesoasoani i teine tuai o le 'au, a'o isi uma teine ua matutua ae o le a faato'a o lea i le malae kirikiti i o latou olaga atoa.

 

Na o Terry lava na 'ai silia e le latou 'au, e 13, soso'o atu i ai ma Rosie e 12, soso'o atu ai ma Mona e 10, Florence e 8, Josephine e 7 ma le toatele na fuamoa uma lava.

 

E le faatusatusalia le 'au a le Faasaulala i le lelei o faate'a i le aso o le su'ega siamupini, e na o le tolu lava faate'a na fa'aaoga mai i le ta'aloga atoa, o Meleane, Fia ma Uini.

 

O Meleane e 6 'olo, Fia e 5 ana 'olo ma Uini, a'o le 'au a le I'a Vai lea na maua e Taia 'olo e fitu, tolu Rosie, fa lea na maua mai i le te'a e Josephine, ae faaletonu te'a tuai pei o Monalisa ma Florence. O le talituaa e tolu lava le polo e pau i le talituaa a le Faasaulala, ae na soso'o mai ai loa pe a Meleane ma Fia.

 

TEINE O LE ASAGA, 64 'ai, 19 pe. VS LUPELELE 31 'ai, 19 pe

 

O le taaloga lea i le suega o le tulaga tolu ma fa a tamaitai, ma vaaia ai le lelei o faate'a a le Asaga, i le fetalia'i o itu olo e lua, a misi mai i le 'olo e sau se ta ua sauni atu le talituaa, e tasi le sapo na le mauaina e le talituaa a le Asaga.

 

Ao le Lupelele, ua le iloa e se isi le mafuaga na faapea ai le latou talituaa, le tele o polo na tatau ona sapoina i lea taaloga, ae le masani ai le leaga o le latou talituaa pei ona sau ai le liki.

 

Na tata muamua le Asaga ina ua manumalo i le peti, na tutu le latou kapeteni o Fatima, o ia foi lea na 'ai silia e 22, pito i ai ma Sela e 10, o Tagilima e 8, Aleluia e 7, o Akape e 4 ma Nonoi e 4 lea na maua ai le 64 i le latou tataga. Na tuli loa e le Lupelele ma o se vaaiga e faanoanoa ai le tapuaiga i fiu e ta te'a a le Akape ma Aleluia.

 

Na fai i le isi taimi na sau Fatima e faamalolo ai le te'a a Aleluia i sina taimi ina ua vaai atu le latou kaepeteni ua tau malo mai le tauau, peita'i ina ua lava le malologa a le faate'a, na toe faaauau foi lana te'a manaia.

 

E uma 'ae lena aso i le taaloga, na maua e Akape 'olo e lima ono Aleluia e 7 ma le tasi lea na mao ai le te'a e Fatima i le 'olo, a'o o le talituaa o le mea 'strong' lava ia, i le tasi a le polo na pau i le tamo'e o le taloto e tau sapo le pa tasi i talane o le malae.

 

A ou togia le talituaa ma le faate'a, e A - le talituaa, B (plus) ia faate'a, ia o lea na manumalo ai i le tulaga tolu e le aso Toanai, a e ia lou mafaufau i le tausaga fou lea, o le 'au lenei o le a fefeu nei i le liki o le isi tausaga lea, e fai o le lelei o le laiti o teineiti ao le mataalia toe vave a latou gaioi i le mea e sau ai le polo i taimi uma lava.

 

A'o le Lupelele, ua ou fiu e tau maitau le mea ua faapea ai le tou taaloga i lea aso, ua iloa le upu o le atunuu e faapea, 'O le aso ma filiga, o le aso ma le mataigatila' e i ai lava aso faapenei, ua tutusa outou ma le I'a Vai i lena aso taua i le tou liki.

 

Ae faafetai atu ai i le komiti a le liki kirikiti lau tofa i le Satoafaiga Leae Mauga le taitai komiti aoao, ma le mamalu o le komiti i ta'ita'i malae, lau afioaga Toilolo Alaipalelei, ma lau tofa Tulauulu, ma oulou komiti o Sasa'e ma Sisifo i lau afioga Vui Tagaloa, lau afioga Letelesa, lau afioga Mulipola Salele'a, Tofa i le Tauto'oto'o ia Noa, le tofa ia Mui, lau fetalaiga Moo Tau, le susuga ia Taumaoe Taufete'e, le susuga ia Tunupopo ma le susuga ia Tele'a ma le 'DJ' lea o Johnny.

 

Ia o le sifi lea o faatafai solo lea o Nuu, ma isi tama uma na fesosoani ai le vaaiga o ova, (ua le maua tou suafa) fai a'u ma sui o le atunuu, e momoli atu ai le faamalo i lo outou timuia ma laina i le faafoeina o le liki kirikiti o le Fu'a.

 

Faamalo atu le tou tagai i faigata ma le matuia o faaupuga e vevesi ai le tele o taaloga, o faaupuga e sasi atu ai le tofa ma le faautaga poto, ae sa tou le manatunatu i se isi itu, ae tausi pea le filemu ma le fai o mea e lelei ai, i faaupuga na lafo atu ia te outou i luga o ta'aloga.

 

Sa outou 'olo'olo pito vaa pea i taimi o fitaituga i vevesi, sa outou faia pea ia lelei ma saogalemu le liki o le Fu'a o Amerika Samoa ma Manu'a i lenei tausaga 2014, ma fai le tiute i le mea e gata ai lo outou taumafai se'i paia lona siui.

 

Ia faamanuia atu le Atua ia te outou i lenei tausaga atoa ma ia 'sagai ane ai o le tai' ia i ai pea lana faamanuiga ia outou faiva ma galuega ua totofi ai outou, tou te galulue ai.

Comment Here