Ua faaalia e le toatele o tagatanuu o lo o latou totogiina atu pili i le Faalapotopotoga o le Eletise ma le Suavai (ASPA) lo latou fiafia tele, ina ua faalauiloa e le ASPA la latou faaiuga e faaitiitia ai tupe e totogi e le atunuu i a latou pili.

O le Pulesili fou a le ASPA ua i ai nei ia Utu Abe Malae, faatasi ai ma le Komiti Faafoe fou na tofia e le kovana sili, o ni isi ia o lo o ogatotonu i ai le agaga faafetai a le atunuu, ona o suiga ua mafai ona latou faia talu ona latou tauaveina mai le galuega.

“Tusa lava pe tasi sene le aofai o le tupe e faaitiitia ai le pili o le eletise ma le suavai, poo isi lava fo’i tautua a le ASPA, o le itu e sili ona taua ia te a’u ua mafai ona faaitiitia totogi o isi tautua mo le atunuu,” o le molimau lea a le tama o Laloulu Filimoni o Faleniu.

Fai mai Laloulu, o le isi lea avega o lo o feagai pea ma lona aiga i le tele o tausaga, o le taugata o le totogi o le eletise ma le suavai.

Sa fesiligia o ia pe masani ona motusia le eletise ma le suavai mai lona maota, na tali Laloulu, “e fa’akele,” na toe fesiligia o ia pe aisea, ae na toe tali le molimau e faapea, “afai lava ua leai se kupe e kokogi ai le uila ma le vai, e sili ai loa oga kipi ae gogofo pogisa i le po akoa,” o le isi lea saunoaga a lea tama.

Na faaigoa e se tama ua silia ma le 20 tausaga o galue i le kamupani a le StarKist Samoa suiga o totogi o pili a le ASPA, o se “fa’aolataga lea mo aiga matitiva ma le tagolima.”

Fai mai lea tama, afai ae solosolo lelei ai pea ma faaauau suiga ua faia e le ASPA, o le mea moni o le a tau feololo mai le mamafa o le avega o lo o tausoa e aiga lima vaivai i le atunuu.

Mai suiga e tele ua faalauiloa e le ASPA i le vaiaso nei, o lo o aofia ai ma le 8sene lea ua faamoemoe e pasi atu i pili o le eletise a le atunuu, mai tupe faasili o lo o maua mai e le ASPA i le avea ai ma sapalai mo le suauu.

O ni isi o suiga ua faalauiloa e aofia ai le tulaga lea, afai e fia toso se paipa a se aiga, e $150 e totogi ae le $300 e pei ona i ai mo tagata nofomau i le teritori, ae mo i latou e le o ni tagata nofomau, e $250 latou te totogiina mai le $350 sa i ai.

Mo i latou e fia faaaogaina moli mo taimi o afa i se taimi le tumau, e $120 e totogi ae le $250 e pei ona i ai: ae o le suia o le mita e avea ma debit meter i totonu o maota ma laoa, ua suia i le $95 mai le $170 sa i ai.