Ads by Google Ads by Google

Pasia tofa Tuaolo avea ma Komesina Ofisa Sili Palota

E 16-2 le palota na pasia ai e le maota o sui ananafi tofiga a le kovana sili mo le tofa Tuaolo M. Fruean, e avea ai o ia ma Komesina o le Ofisa Sili o palota a le malo mo le isi tolu tausaga o lo o lumana’i nei.

 

O lea faaiuga a afioga i faipule na faia ina ua maea sa latou iloiloga sa faia i le taeao ananafi a le komiti o le Faagaioiga o le malo na taitaia e le afioga i le alii faipule ia Faimealelei Anthony Fu’e Allen, lea na o latou fesiligia ai le tofa Tuaolo i ni isi o suiga ma fuafuaga ua amata ona faataoto mo le siitia lea i luga o le tautua a le Ofisa o Palota.

 

O se tasi o suiga fou na faafofoga i ai afioga i faipule mai le tofa Tuaolo, o le vaavaai lea o le Ofisa o Palota i le faatuina o se auala fou faaonapo nei e faa faigofie ai galuega a le Ofisa o Palota, po o le polokalame e taua i le gagana faaperetania o le ‘Automated Election System’.

 

“O le agaga o le polokalame lea e le gata e faa faigofie ai galuega a le Ofisa o Palota, e mafai ai foi ona tuuina i totonu ma le atamai faaonaponei e pei ona faaaogaina i totonu o lem alo tele o Amerika,” o lana saunoaga lea i luma o le maota o sui.

 

Ina ua fesiligia e ni isi o sui o le komiti le tofa Tuaolo e faamalamalama atili le uiga o le polokalame fou e pei ona ia taua, na saunoa ai le alii faatonu e faapea, afai o se tagata palota e alala i Leone ae o lo o faigaluega i le kamupani i’a i le aso o le palota, e mafai lava ona ia faaaoga se fale palota e latalata atu i le nofoaga lea e palota mai ai, nai lo le tau alu mamao i Leone e fai ai lana ekisi.

 

Na fesiligia po o le a le umi o lo o vaavaai i ai le Ofisa e faatuina ai lea polokalame, na saunoa le tofa Tuaolo, “O lo o i ai le faamoemoe e tatau ona faaaoga le polokalame lea i le paloga o le 2016,” ma o vaega e aofia ai i lea polokalame e aofia ai le faitauina o le aofai o palota, ma le tulaga malupuipuia o le saogalemu o le faitauina o palota mo sui tauva.

 

Na faamanino e le molimau i le komiti e faapea, e na talanoaga ma feutanaiga o lo o faia i le taimi nei, ae le’i faapea ua i ai se galuega ua amata, peitai o le faamoemoe e tatau ona faatino ma faataunuuina loa.

 

Na taua e le toatele o faipule lo latou le fesiligia o agavaa o lo o i ai i le tofa Tuaolo, ona e le gata o ia o se taitai e faaaloalogia faaleaganuu, ae o ia foi o se taitai ua loa lana tautua i vaega e tolu o le faigamalo a Amerika Samoa.

 

Na faafetaia e ni isi o faipule le tofa Tuaolo i lona taliaina o le tofiga ua filifilia i ai o ia e le kovana sili, aua latou te iloa e le o se tofiga faigofie lea ua filifili i ai o ia na te tauaveina, aemaise lava i le taimi e pisi ai le malo i ana faiga palota i tausaga eseese.

 

Ao faagasolo fesili a sui o le komiti, o le toatele lava na o latou taua le tele o agavaa o lo o umia e lenei tama o le atunuu, ma ua soo uma foi vaega e tolu o le faigamalo a Amerika Samoa o galue ai o ia, e pei o le taimi sa avea ai ma Faamasino, sa avea ma faipule ma Senatoa, a’o lea fo’i ua filifilia e avea ma Faatonu mo le faigamalo, e pei ona saunoa le faipule mai Pago Pago ia Vaamua Henry Sesepasara.

 

Sa avea foi o ia ma komesina o Leoleo i le nofoaiga a Togiola ma Faoa ua mavae atu.

 

Na taua e le afioga i le alii faipule ia Vaetasi Tuumolimoli Sane Moliga e faapea, o le faatuatuaina o lenei tama o le atunuu faatasi ai ma le agavaa o lo o ia te ia, o le mafuaaga autu lea na ala ai ona filifilia o ia e le alii kovana e avea ma Komesina o Palota.

 

Na taua e le afioga a Faimealelei e faapea, e le gata na au le tautua a Tuaolo i vaega uma e tolu o le faigamalo, ae sa tautua foi i lala tumaoti e pei o le falema’i a le malo, sosoo atu ai ma le Ofisa o Mataupu Tau Samoa, ma filifilia ai loa e avea ma faipule mo lona afioaga o Pago Pago mo le umi e 10 tausaga.

 

Na maea lea ae sosoo ma le tofiaina o ia e avea ma Senatoa, ina ua tuana’i le taimi na avea ai o ia ma Faamasino, ma tofia mulimuli ai loa e fai ma komesina i le nofoaiga ua mavae atu.

 

O le tofa i le tootoo ia Velega Savali Jr na uluai tofia e le alii kovana e fai ma komesina o le Ofisa o Palota a le malo mo le nofoaiga lenei, peitai e le’i umi ona tauave e le tofa Velega lea tofiga ae toe faamavae, a’o le’i tuuina atu lona igoa i luma o le fono mo le faamaoniaina.

 

Ina ua fesiligia e tusitala le tofa Velega i le mafuaaga na faamavae ese ai mai lenei glauega, na ia taua ai e faapea, o le galuega e le talafeagai ia te ia, ona o se galuega e le pisi ae sei vagana lava ua oo i tausaga palota ona faatoa mafai lea ona gaioi e faatino le auaunaga a le ofisa.

 

Na taua e le alii kovana ia Lolo Matalasi Moliga i lana tusi i le fofoga fetalai o le maota o sui e faapea, o le agavaa ma le tautua o lo o ia Tuaolo, faatasi ai ma le faatuatuaina o ia, o ni isi ia o mafuaaga na ala ai ona ia filifilia o ia e avea ma Komesina o le Ofisa o Palota.

 

E lei faatulagaina le aso e faia ai le iloiloga a le Senate mo le tofiga a le kovana i le tofa Tuaolo.

 

A’o galue le tofa Tuaolo i le tofiga o le Komesina o Leoleo i le nofoaiga a Togiola ma Faoa ua mavae atu, e tele ni isi o atina’e fou ma suiga sa ia faia mo le matagaluega, ma o ni isi o ia suiga tetele e aofia ai polokalame o lo o faaauau e oo mai i le taimi nei, e aloaia ai le tautua a le alii ma le tamaitai leoleo i totonu o le matagaluega mo kuata taitasi.

 

O ni isi o atinae sa ia faia e aofia ai le tatalaina o le Ofisa Leoleo fou i Leone lea ua faalautele atu i ai le tautua a le matagaluega i le taimi nei.

 

E le’i faatulagaina le iloiloga a le komiti o le Faagaioiga o le malo a le maota maualuga, e fesiligia ai tofiga a le kovana mo le tofa Tuaolo.