E toa 14 faipule na lagolagoina le avea o Tiotalaga John Kruse e fai ma Pulesili o le Ofisa o Oloa a le malo, ae to’alua na tete’e i le latou palota, i le mae’a ai o se iloiloga sa faatautaia e le Komiti o le Faagaioiga o le Malo, lea na taitaia e le afioga i le alii faipule ia Faimealelei Anthony Allen.O le toatele o faipule na maua avanoa e saunoa ai i le taimi o le iloiloga, latou te le’i fesiligia ni fuafuaga a Tiotalaga e tusa ai ma lona tauaveina o lenei galuega, ae na o viiviiga ma le agaga faafetai faasaga i le kovana, i lona filifilia o lenei sui e avea ma taitai o le isi lea Ofisa taua a le malo.Ae sa fautuaina e ni isi o faipule Tiotalaga ina ia toe vaavaai i le tautua lea sa masani ona tuuina atu i isi Ofisa ma Matagaluega a le malo, i le sapalai o oloa mo a latou ofisa.Na taua e le alii faipule ia Larry Sanitoa e faapea, sa manaia lava le tautua lea a le Ofisa o Oloa a le malo, peitai na faafuasei lava ona taofi ma latou le toe sapalaia ai oloa mo ofisa o le malo.Ae na taua e le alii faipule ia Taotasi Archie Soliai e faapea, e i ai lona talitonuga e le o mulimulita’i le Ofisa i taiala o lo o faatulaga mai i lalo o le tulafono e faafoe ai ana galuega, e pei o le tatau lea ona latou sapalai atu oloa i ofisa o le malo peitai ua latou te le toe faia lea tautua.Na saunoa foi Faipule, e sili atu ona taugofie le tau o oloa pe afai e sapalai e le Ofisa o Oloa a le malo, nai lo le alu lava o le ofisa po o le matagaluega e faatau mai ana ia oloa.Na taua e Sanitoa e faapea, e i ai ni isi o le atunuu sa o’o atu a latou faasea i le le faamaoni o ni isi o lona ofisa i auala e tuu atu ai konekarate i ni isi o pisinisi.Na fesili Taotasi ia Tiotalaga i auala na te taulimaina ai tulaga o konekarate e tuu atu i pisinisi tua, pe le tulai mai ai se feteenaiga i lea tulaga, aemaise ai foi o ia o se alii faipisinisi, e i ai foi lona sootaga i ni isi o tagata faipisinisi i le atunuu, ae na saunoa Tiotalaga e faapea, ua maea ona i ai faiga faavae ma taiala e faatautaia ai e le Ofisa tulaga e pei ona fesiligia e le alii faipule, ma e le mafai foi ona ia toe suia tulaga ia, aua o lo o i ai lava tagata faigaluega ua uma ona tofia e galulue i vaega taitasi nei.Na faamanino e Tiotalaga i luma o le komiti e faapea, o le faanaunauga o lo o ia te ia, o lona faatulai lea o ni faataitaiga lelei mo le matagaluega, aua o le taitai e avatu ai faataitaiga lelei i lana aufaigaluega, o ia foi e faalagolago i ai le lelei o le Ofisa ma lana tautua.O le vaiaso nei lea ua faamoemoe e iloilo ai tofiga a le kovana mo Tiotalaga i luma o le Senate.