SAELUA:  E LE’I O’O ATU ‘PAYOUT’ A LE MALO I LE OFISA PAKETI

Ao lei pasia e le Senate tofiga a le kovana mo le faletua ia Catherine Dora Aigamaua-Saelua i le taeao ananafi i le palota e 17-1, sa ia faailoa i luma o le komiti o le Paketi a le maota maualuga e faapea, e le’i tuuina atu i le Ofisa o le Paketi ‘payout’ a le malo sa faia i le tausaga na te’a nei.

O le afioga i le alii Senatoa ia Galea’i Tuufuli na fesiligia le molimau e tusa ai o lenei mataupu i le taimi o le iloiloga a le komiti i le taeao ananafi.

Ina ua toe fesili Galeai pe sa i ai se tupe a le malo na faaagaga e faatupe ai le ‘payout’ lea, na tali le molimau, e $600,000 le tupe sa faatulaga mo lea faamoemoe.

E tusa ai o ripoti ua i luma o le Senate, e silia ma le $1miliona na faaalu e le malo e faatupe ai totogi mulimuli mo faatonusili i le nofoaiga na mavae atu nei, ma e talitonu Galeai, ua ova atu le tupe ua faaalu nai lo le tupe sa faaagaga mo lea faamoemoe.

O lo o faagasolo suesuega a le Komiti a le senate ma ua i ai le faamoemoe o se taimi o le vaiaso fou e faia ai se iloiloga e faatatau i lea mataupu, e pei ona saunoa Galeai i le taeao ananafi.

Na tutulu le alii senatoa ia Magalei ao saunoa e faailoa agavaa o le molimau i luma o le komiti i le taeao ananafi.

I le avea ai o ia ma se tasi sa fai ma Faatonusili o le Ofisa o le Paketi a le malo, na saunoa ai Magalei e faapea, e silia i le 20 tausaga o la galulue ma Saelua, ma ua ia talitonuina lona atamai ma lona agavaa e avea ai o ia ma faatonu, o se mitamitaga foi lea ia te ia ina ua tofia o ia e le kovana e fai ma faatonu o lenei ofisa taua o le malo.

Na taua e Magalei e faapea, sa avea Saelua ma ona lima taumatau, soo se taimi foi na te moomia ai o ia ina ia oo atu i le ofisa e galue, tusa lava po o le faaiuga o vaiaso, e alu atu lava Saelua e galue.

“O se poto ma se malamalama sa ia te au, sa ou tuuina atu uma mo lenei tamaitai, ona o ia o lo’u lima taumatau, sa ou vaai maualuga foi e i ai le aso e avea ai o ia ma faatonu o lenei Ofisa, lea la ua tofia oe Catherine, o la’u tatalo, ia manuia lau nofoaiga,” o le saunoaga lea a Magalei.

O le toatele o senatoa na maua avanoa e saunoa ai, sa latou taua le agavaa tele o le molimau mo le taitaia o le Ofisa o le Paketi.

Na taua e Saole Mila e faapea, “ua manaomia e le malo se toa e tulai mai na te lagaina le toilalo o le malo i le itu tau tupe, ma ua avatu atoatoa le faatuatuaga o le kovana ma le fono ia te oe e te mafai ona e faia le galuega.”

Na fesili Saole ia Saelua pe talitonu o le latou ofisa le isi ofisa o lo o tulai mai ai le faaletonu i itu tau tupe a le malo, na tali le molimau ioe.

Na fautuaina e senatoa Saelua ina ia faamuamua le Atua i lana galuega, ma ia faamaoni e mulimuli i le tulafono o le paketi ua pasia atu e le fono, ona leai lea o ni faaletonu e tulai mai i tupe a le malo.

Na tutusa fautuaga Faumuina Tagisiaalii ma Laolagi Fonoti Savali Vaeao o le taitai komiti i le molimau, i le tatau lea ona mulimulitai le Ofisa o le Paketi i le paketi ua faatulafono atu e le fono ma sainia e le kovana.

ILOILOGA A FAIPULE

O le itula e 11:00 i le taeao ananafi na faataunuu ai foi le iloiloga a le komiti o le Paketi a le maota o sui, mo le fesiligiaina lea o agavaa o le molimau e tusa ai o tofiga a le kovana.

I lana uluai saunoaga na taua ai e Catherine e faapea, mai le 32 tausaga o lana tautua i le malo, e 24 tausaga sa galue ai mo le Ofisa o le Paketi, ae 8 tausaga sa galue ai mo le Faalapotopotoga o Fesootaiga a le malo, le ASTCA.

Na taua e le sui fofoga fetalai ia Talia Faafetai Iaulualo e faapea, e lua lava mafuaaga e ala ai ona ova tupe faaalu i le paketi, e le gata e le lava tupe e maua ae le sa’o foi le paketi o lo o tuuina mai i le fono.

Saunoa Talia, afai e pasia le tulafono o le paketi, e leai se isi na te toe suia e oo lava foi i le kovana ma le malo, e le mafai e se tasi ona toe suia le tulafono.

O le vaega tupe e faaleleia ai auala i totonu o afioga ‘road maintainance fund’, o se tasi lea o mataupu na fesiligia e le afioga i le tamaitai faipule ia Vui Florence Vaili Saulo, ona o le isi lea vaega tupe o lo o fesoasoani malosi i le faaleleia o auala i le atunuu.

Saunoa Vui, afai e faaauau pea lea vaega tupe, o le a mafai ona faaleleia pea auala i totonu o le atunuu.