Ads by Google Ads by Google

Pasia Senate tofiga a le kovana mo Taufete’e J. Faumuina

O le aso Faraile na te’a nei na pasia ai e le maota maualuga tofiga a le alii kovana ia Lolo Matalasi Moliga, mo le tofa a Taufete’e John Faumuina e avea ai o ia ma totino o le Komiti Fa’afoe a le falema’i o le LBJ, i le palota e 14-0.

 

O Taufete’e na tofia a le alii kovana i le masina na te’a nei, e avea ma totino o le Komiti Faafoe o le LBJ, e sui tulaga i le tofa a Velega Savali Jr ua fa’amavae, ma o le aso Faraile na te’a nei na fesiligia ai e le Komiti o le Soifua Maloloina a le senate ona agava’a e tusa ai o tofiga a le alii kovana.

 

Saunoa le afioga a Mauga Tasi Asuega o le ta’ita’i komiti, o le tofa a Taufete’e, o se tasi lea o tama fanau a le atunuu ua loa lana tautua i vaega eseese o le malo, ua tele fo’i tausaga o avea ma Pulesili o le falema’i i Fagaalu, ma ua lava lona silafia i le faatinoina o le galuega.

 

Na lagolagoina e le afioga i le Alo Ali’i ia Afoa M. Suesue Lutu le finagalo o Mauga e faatatau ia Taufete’e.

 

Saunoa Afoa e fa’apea, i le tele o tausaga ao ia galue i vaega eseese o le malo, sa la masani mai ai ma le tofa a Taufete’e, o ia o se tagata ua lava lona silafia i auala eseese e faatautaia ai galuega a le malo.

 

Na fesili le afioga i le alii Senatoa ia Faumuina Tagisiaalii ia Taufetee pe toa lona loto, ae na tali le molimau, “e toa lo’u loto e faatino ai galuega ua tofia ai a’u e le alii kovana.”

 

Na faafetaia e Taufetee le alii kovana e tusa ai o le avanoa ua tofia ai o ia a avea ma totino o le Komiti Faafoe a le falema’i, ma ua ia taliaina fo’i le tofiga ma lona talitonuga, o le a ofo atu lona tomai ma lona agavaa o lo o i ai e tautua ai le atunuu e ala i le falema’i.

 

O le toatele o isi senatoa na maua le avanoa e saunoa ai i le molimau, e leai ni a latou fesili sei vagana ai lo latou faafetaia o le kovana ona o le avanoa ua ia tofia ai Taufetee i lenei galuega.

 

Na taua e le afioga i le alii senatoa ia Soliai Tuipine Fuimaono i lana molimau e faapea, ua silia ma le 4 masina o tula’i mai se faaletonu i le falema’i i Fagaalu, e le o toe ola le masini e fai ai fa’ata a gasegase, ma o se fa’afitauli e tatau ona vave foia ina ne’i tula’i mai ai se faaletonu ona aafia lea o le falema’i ma le malo.

 

Saunoa Soliai e faapea, o le faaletonu la lea ua tulai mai ina ua leaga le faata, e le o toe mafai e se foma’i ona iloa po o le a tonu le gasegase o lo o aafia ai le tagata, pau le mea ua fai o le ave o fualaau ma vailaau e ini ina ia tau foia ai le tiga o le tino, ae le o mafai ona tineia ai le pogai o le gasegase, e mafua mai ona ua leaga le faata sa mafai ai ona siaki tino o tagata.

 

“O le faaletonu lea ua tula’i mai, ua ave pogisa e foma’i ia vailaau i gasegase ona ua le iloa se mea o le a fai, ua leai se faata e siaki ai poo le a le gasegase o lo o aafia ai le ma’i,” o le saunoaga lea a Soliai.

 

Sa talosagaina e Soliai ia le komiti, ina ia aami ma Taufete’e i le iloiloga a le maota ma le Pulega a le falema’i i Fagaalu lea e faia i le aso Lua o le vaiaso nei, e lelei Taufetee ua lava lona silafia i faafitauli o lo o feagai ma le falema’i, o ni faafitauli fo’i ua leva na tatau ona foia.

 

Na talosaga le afioga i le alii senatoa ia Tuiasina S. Esera ia Taufetee, ina ia silasila toto’a i le vaega a le VA, lea e fai tau miliona ma miliona tupe e mafai ona maua mai ai e le falema’i i Fagaalu i le polokalame lea, ae o le faigata e le o lelei ni foma’i latou te togafitiina fitafita tuai pe a oo i a latou talavai, o le mafuaaga fo’i lena e o ai i fafo gasegase a le VA mo a latou talavai ae le nonofo i Fagaalu.

 

Saunoa Tuiasina e faapea, afai e lelei ni foma’i latou te vaaia gasegase a le VA, o le isi lea vaega tupe tele e mafai ona nofo i le falema’i i Fagaalu e atina’e ma fa’aleleia ai nisi o manaoga o lo o tula’i mai.

 

Na faaiu le iloiloga i le tuuina atu o fautuaga a afioga i senatoa ia Taufetee, ina ia alofa i le soifua maloloina o le atunuu, ma saili auala e faaleleia ai le tautua a le falema’i.