Ads by Google Ads by Google

Pasia Senate tofiga Kovana mo totino Komiti o le Kolisi

E to’alima totino o le Komiti o le Kolisi ua pasia e le Senate, i le mae’a ai o sa latou iloiloga puupuu na faatautaia i le taeao ananafi.

 

O i latou ua pasia e aofia ai Rev. Sekuini Seva’aetasi ma Dr. Fanuatele To’afa Vaiaga’e e ta’i 12-0 a la palota, Patele Viane Etuvale, Dr. Rev. Siulagi Solomona ma Tauiliili Lauifi e ta’i 11-1 a latou palota.

 

O le isi totino e to’atasi o le komiti na tofia e le kovana e le’i auai, o le faletua ia Robin Annesley Dalton lea o lo o toesea ma le atunu’u i le taimi nei.

 

I le taimi o le iloiloga a le komiti o aoga na faatautaia e le sui ta’ita’i komiti, le afioga i le ali’i senatoa ia Laolagi Fonoti Savali Vaeao, na faaalia ai e le to’atele o senatoa lo latou faafetaia o le kovana sili, i lana faaiuga ua mafai ai ona tofia ni isi o tama o le atunuu ua lava le agavaa ma le tomai e galulue i lenei komiti taua o aoga.

 

Ina ua fesiligia e le alii senatoa ia Soliai Tuipine Fuimaono molimau ina ia faailoa i luma o le komiti le taua o le avanoa lea ua tatala mai mo le Kolisi Tuufaatasi, e a’oa’oina ai mataupu ta’ifa tausaga, na saunoa ai le susuga Rev. Seva’aetasi e faapea, o le taua o lenei avanoa ua maua e le Koliti Tuufaatasi, e le gata o le a toatele ai alo o le atunuu o le a maua avanoa e sailia ai a latou faailoga maualuluga i totonu lava o Amerika Samoa, ae o le mafai ai foi ona taofia fanau mai le ulufale atu i aoga i fafo, ma faigofie ai i aiga ona faatupe le totogiina o aoga a le fanau.

 

“O le isi taua o le tulaga lea ua ave ai mataupu ta’ifa tausaga i le Kolisi Tuufaatasi, o le a faigofie ai ona siitia tulaga i togi e maua e le kolisi, ma fesoasoani ai i ni isi asiasiga a komiti o aoga mai fafo e toe asia le kolisi i le lumana’i,” o le saunoaga lea a Rev. Seva’aetasi.

 

E na o le BA i le matata faa faiaoga lea o le a ave i le kolisi tuufaatasi i le taimi nei e pei ona saunoa Rev. Seva’aetasi, ma le faamoemoe o isi tausaga o i luma o le a mafai ona ave ai fo’i faailoga mo isi matata.

 

Soo se taimi e asia ai e komiti o aoga a le malo tele le kolisi tuufaatasi i a latou asiasiga, e muamua lava fesiligia agavaa ma le maualuluga o faailoga o lo o umia e faiaoga o le kolisi e pei ona saunoa Rev. Seva’aetasi, ma o le isi lea mafuaaga na talia ai le talosaga ma maua ai loa e le kolisi tuufaatasi le avanoa e ave ai mataupu ta’ifa tausaga, ina ua maituaina o le to’atele o faiaoga a le kolisi o lo o i ai o i latou e umia faailoga faafoma’i.

 

Na faaopoopo le susuga Dr. Fanuatele i le saunoaga a Rev. Seva’aetasi ma ia saunoa ai e faapea, o isi mafuaaga ua ala ai ona talia le aoaoina o faailoga ta’ifa tausaga i le kolisi tuufaatasi, e le gata ua lelei faleaoga o lo o aoaoina ai fanau aoga, ae ua atoa fo’i vaega mo su’esu’ega e tatau ona i ai i le Fale Tusi a le aoga.

 

O aso ua mavae e pei ona saunoa Dr. Fanuatele, sa tele ina aumai i fafo tusi aoga e faaaoga i suesuega a fanau aoga, peitai o le taimi nei ua faaaoga e le Fale Tusi le polokalame lea e faia ai suesuega i luga o initaneti (digital library program) ma ua faa faigofie ai suesuega a fanau aoga, atoa ai ma le mafai lea ona tuuina mai soo se faamaumauga mai fafo latou te manaomia mo suesuega.

 

Ae na taua e le susuga Dr. Siulagi e faapea, o i latou e to’a 11 sa faamanuiaina i se polokalame na sailia ai a latou faailoga i totonu o le kolisi tuufaatasi i tausaga ua mavae, ua avea uma i latou ma ni isi e taitai i ofisa ma vaega eseese o le malo, e lagona ai lona fiafia ina ua maua e le kolisi tuufaatasi a Amerika Samoa lenei avanoa.

 

Talu ai o lea ua maua le avanoa e a’oa’oina ai mataupu ta’ifa tausaga i le kolisi tuufaatasi, ua fautuaina ai e le afioga Laolagi le komiti ina ia vaavaai i manaoga e ono tula’i mai i se taimi o i luma, e pei o le lava lea o fale e nonofo ai fanau aoga, aua o lea o le a lolofi mai tagata eseese e fia aooga iinei, ona o lea ua faigofie ma taugofie le sailiina o faailoga faa faiaoga iinei nai lo le tau malaga i atunuu i fafo.