Ads by Google Ads by Google

Pasia Senate tofiga Kovana avea ai Lealao Purcell ma faatonu Faatoaga

O le taeao ananafi, na pasia ai e le Senate i se palota, 11-3, ia le avea o le tofa Lealaosoloata Melila Purcell Jr., ma Fa’atonusili o le Matagaluega o Fa’ato’aga, ae o le vaiaso ua tuana’i na pasia ai e le Maota o Sui lenei tofiga, i se palota e 13-0.

Ae e le’i faia se fa’ai’uga a le Senate, na ulua’i fa’ataunu’uina sa latou iloiloga, lea na fa’atautaia e le komiti o fa’ato’aga, i lalo o le ta’ita’iga a le afioga Paogofie Fiaigoa.

Sa su’esu’eina e afioga Senatoa nisi o fa’afitauli e pei ona tulai mai i le va o nisi o fai fa’atoaga ma le Ofisa o Faatoaga i se taimi ua te’a, lea sa tau saili ai po o ai e pulea le maketi i Fagatogo, aemaise ai foi o se auala e foia ai le faaf’itauli lea ua maitauina, i le tele o  tama’i maketi ua fa’atutu i luma o fale o aiga, ae ua le aumaia fua o fa’ato’aga a tagata, i le maketi ua uma ona fausia.

Na fa’aalia e Lealao e fa’apea, o ana fuafuaga  mo le manuia o le aufai faatoaga atoa ai ma le faatumauina lea o le lelei o faatoaga i le atunuu, o le taumafai lea ina ia faatulaga ni polokalame e unaia ai tagata fai faatoaga ia ina tumau le naunau e toto faatoaga.

Saunoa Lealao ina ua fesiligia e Senatoa Lualemaga Faoa, e toa 202 le aofai o tagata fai faatoaga ua maea ona lesitala i le taimi nei, mo le tausiaina o le polokalame o meaai taumafa mo fanau aoga, ma le anoano o isi fai faatoaga e lei lesitalaina o latou igoa i le Asosi.

“O loo i ai se fuafuaga e fia faia se galuega ina ia fesiligia ai ma faatalatalanoa i latou ia o loo faia a latou maketi i luma o le auala, ina ia mafai ona o atu faatasi e faaaoga le maketi fou i Fagatogo,” o le molimau lea a le tofa Lealao.

Sa fesiligia e le Samoa News nisi o i latou ia o loo faia a latou maketi i luma o latou fale i tafatafa o le alatele i ni o latou finagalo e uiga i lenei mataupu, sa taua ai e nisi o i latou ia e faapea, e tele atu tupe latou te maua i tafatafa o le alatele nai lo tupe e maua i le maketi.

O isi na taua, o se tasi o mafuaaga e faigofie ai le faaaoga o le maketi i luma o le fale, e le gata e faigofie mo fela’uaiga, ae leai foi ni tupe e alu ai mo le tau la’uina atu o uta i le maketi i Fagatogo.

O se tasi o mataupu na fesiligia e le alii Senatoa ia Velega Savali Jr, o ni polokalame mo tagata fai faatoaga i Manu’a, aemaise ai o se auala e fesoasoani ai i le la’uina mai o uta a  tagata e faatau i le maketi.

Na faamanino e Lealao i luma o le komiti e faapea, o le polokalame lea sa faatupe mai e le feterale, le NEG lea sa avea ai o ia ma Faatonu, na autu i le unaia lea o tagata ia na le toe maua ni galuega ina ua tapunia le kamupani i’a o le Samoa Packing, ina ia fo’i i o latou aiga ma amata ona toto faatoaga e pei o maumaga, laau aina ma isi lava ituaiga faatoaga e maua ai tupe, e fesoasoani ai i le tausiga o aiga.

E toa 102 i latou na auai i lenei polokalame, lea na faatautaia mo le 3 masina e pei ona faamaonia e Lealao i luma o le komiti, ma o le toatele o i latou sa fesoasoani malosi ai le polokalame lenei i o latou aiga.

Sa fautuaina e le komiti le tofa Lealao ina ia taulai lana silasila i auala e faaleleia ai tulaga o faatoaga, ona o le isi lea itu o loo tua i ai le tamaoaiga o aiga i aso fai soo.