E 13-0 le palota na pasia ai e le maota maualuga a le Senate i le taeao ananafi tofiga a le afioga i le alii kovana sili, mo le tofa a Utoofili Asofa’afetai Maga, e avea ai o ia ma totino o le Komiti Fa’afoe o le Falema’i a le LBJ, e sui tulaga i le tofa a Taufete’e J. Faumuina, lea ua avea nei ma Pulesili o le LBJ.

O le fa’aiuga a le maota maualuga ananafi, na faia lea ina ua mae’a se iloiloga sa valaauina e le Komiti o le Soifua Maloloina ma le Falema’i a le maota, lea na fesiligia ai agava’a o le molimau e tusa ai ma le tofiaina o ia i lenei tofiga, lea na taitaia e le taitaifono o le komiti ia Tuaolo M. Fruean.

O le to’atele o afioga i Senatoa na maua le avanoa e saunoa ai i le iloiloga, sa latou fa’ailoa ia Uto’ofili le leai o ni latou fesili e fa’atatau i ona agava’a, ona ua lava ma totoe ona agava’a e mafai ai ona avea o ia e fai ma totino o le komiti fa’afoe o le falema’i, ae se’i vagana ai fautuaga e taoto atu i ona tafatafa, e fesoasoani ai i lana galuega.

Na taua e afioga i ali’i senatoa ia Alo Faauuga, Uti Petelo, Mata’utia Afonotele, Magalei Logovi’i ma Gaea Perefoti Failautusi, o tausaga e tele na avea ai Utoofili ma Faatonusili o le Matagaluega o le Soifua Maloloina a le malo, ua atagia mai ai le lava o lona soifua i auala e fa’aleleia ai le auaunaga a le Komiti Fa’afoe faapea ai le LBJ.

Na fautua Magalei ia Utoofili e faapea, afai ae pasia o ia e le maota, o lana galuega muamua lava e tatau ona faia, “ia saili se auala e foia ai le vevesi o loo tula’i mai i le va o le Komiti Fa’afoe ma le Pulesili o le Falema’i,” ae na saunoa Soliai T. Fuimaono e fa’apea, “o la outou fonotaga muamua lava ma le Komiti Fa’afoe a le Falema’i e faia pe a pasia oe, ia e fautua loa i ai fa’atama matua o le atunu’u, soia le pisa soo ua pei latou o ni tamaiti laiti, ae fa’atino galuega na mafua ai ona tofia i latou e le kovana e fai.”

Saunoa Soliai e faapea, “atonu o le tofiga lenei a le kovana mo oe Utoofili e amata ai le fautuaga lea sa fa’atula’i e le Fono, ua tatau ona sui uma totino o le Komiti Fa’afoe a le falema’i, e pei ona atugalu i ai le Fono Faitulafono.”

Na fesili Soliai ia Utoofili, pe talitonu lona taofi, e tatau ona tofia se foma’i e avea ma Taitaifono o le Komiti e Iloiloina Agava’a o Foma’i e galulue i le teritori, nai lo le tofia i ai o le Faatonusili o le Soifua Maloloina e avea ma taitaifono, na tali le molimau “ioe”.

I le avea ai o Utoofili ma Faatonusili o le Soifua Maloloina mai le 2004 e oo mai i le 2008, sa ia taua ai i luma o le komiti e faapea, e manino lava le tulafono, e otomeki lava ona avea le Faatonusili o le Soifua Maloloina ma totino o le Komiti lea, ae na te matua talitonu atoatoa, e tatau lava ona tofia se foma’i e avea ma ta’ita’ifono o lea komiti.

Na fesili le afioga i le ali’i senatoa ia Afoa M. Lutu i le molimau, poo le a se gaioiga talafeagai e tatau ona faia e le Komiti Fa’afoe a le Falema’i, ina ia taofia ai le toe tula’i mai o le latou vevesi ma le Pulesili, ae manuia ai le tautuaina o le atunu’u, na tali Utoofili, pau lava le galuega a le Komiti Faafoe e tatau ona fai, e le gata ia latou malamalama i lo latou tuaoi ma le Pulesili o le Falema’i, a ia latou iloa fo’i a latou galuega faatino i lalo o le tulafono, e gata lava lo latou malosi i le fausiaina o ta’iala ma tu’u atu i le Pulesili e mulimuli ma usita’i i ai.

Na fesili Tuaolo ia Utoofili i le taimi a’o avea o ia ma Faatonusili o le Soifua Maloloina, aemaise ai o le totino o le Komiti e iloiloina agava’a o foma’i, pe mafai e le Komiti lea ona tuu atu ni laisene i ni foma’i e galue fa’afoma’i ai i le falema’i, na tali le molimau “ioe”, ae faatoa mafai lava ona latou tuuina atu laisene i foma’i i na aso, pe afai e tauaao e le Komiti pepa uma ma fa’amaumauga e tatau ma talafeagai e faavae i ai la latou iloiloga.

Na faamanino atili e Utoofili i le komiti e faapea, tusa lava pe fa’auu mai se fomai mai isi aoga fa’afoma’i i le Pasefika e pei o Fiti, ma isi fo’i aoga fa’a foma’i e le o i lalo o le fa’amalumaluga a le malo tele o Amerika, e le mafai ona taua lena foma’i o se foma’i i le vaavaai a Amerika, se’i vagana ua su’e ma pasi le foma’i lea i le suega e taua o le USMLE (United States Medical Licensing Examination).

I saunoaga fa’aiu na taua ai e Tuaolo e fa’apea, o Utoofili, o se tasi o ta’ita’i e le fefe e fa’asoa ona lagona, e mafua lea tulaga, ona o ia le isi sa taulamua i le finauina o le mataupu, e taofia ai le fausiaina o le fale’aiga o le McDonald i Utulei, lea ua avea nei ma nofoaga o le Su’iga’ula a le Atuvasa.