Pasia Senate ia Fiti Sunia avea ma Sui Fa’amasino

E 13-1 le palota na pasia ai e le Senate i le taeao ananafi tofiga a le afioga a le faigamalo mo le susuga ia Fiti Alesana Sunia, e avea ai o ia ma Sui Fa’amasino o le Fa’amasinoga Fa’aitumalo.

 

O lea fa’aiuga a afioga i senatoa, sa faia ina ua mae’a se iloiloga puupuu sa faatautaia e le Komiti o Mataupu Tau Tulafono a le maota, e fesiligia ai agava’a o le molimau e tusa ai o tofiga a le kovana, i lalo o le taitaiga a le afioga i le alii senatoa ia Soliai T. Fuimaono o le taitai komiti.

 

E leai ma se senatoa sa fai sana fesili fa’asaga i le molimau i le taimi o le iloiloga, sei vagana ai fautuaga ma lagona o le fa’afetai i le kovana e tusa ai o le tofiaina o Sunia e avea ma Sui Fa’amasino.

 

Na faafetaia e le afioga i le alii senatoa ia Mauga Tasi Asuega le susuga a Sunia, ona o le avanoa ua mafai ai ona ofo mai lona soifua e tautua mo le atunuu ma le malo.

 

Na taua e Mauga e fa’apea, o Sunia le isi tama fanau a le atunuu sa malaga atu e aoaoina i fafo, lea ua toe fo’i mai e ofo mai le tomai ma le soifua e auauna ai mo Tutuila ma Manu’a.

 

Na faafetaia faatasi e afioga i alii senatoa le afioga i le faamasino sili ia Michael Kruse ma le afioga i le kovana ona o le avanoa ua mafai ai ona tofia Sunia e galue i le vaega o Fa’amasinoga.

 

Na faafetaia e Sunia le afioga i le alii faamasino sili atoa ai ma le kovana, ona o le avanoa ua mafai ai ona tofia o ia e galue i lenei galuega taua. Sa ia taua fo’i e fa’apea, e ui i lona fa’atauva’a, ae o le a ia ofo atu lona malosi ma le tomai e tautua ai le malo i lenei matata.

 

Na taua e Fa’amasinoga Sili ia Micheal Kruse i sana tusi ia kovana sili Lolo M. Moliga ina ua ia tofia Sunia e avea ma Sui Fa’amasino o le Fa’amasinoga Fa’aitumalo, i lona mataituina o le alii loia ia Sunia i taimi uma ao galue ai i galuega faa faamasinoga i lona tofiga o le loia, ua ia mautinoa au lona agavaa tele mo le faatinoina o lenei tiute taua.

 

O tulaga agavaa faaloia o le susuga Sunia e pei ona taua e Kruse i lana tusi, atoa ai ma le ituaiga tagata o lo o i ai o ia, ua manatu ai o ia o se aseta taua mo le vaega o fa’amasinoga a le malo.

Comment Here