Pasia Senate $200,000 fa’atupe ai polokalame fanau aoga

O le vaiaso na te’a nei na pasia ai e le Senate se tulafono taufa’aofi na tuuina atu e le faigamalo mo le paketi fa’aopoopo e $200,000, e fa’atupe ai le polokalame mo fanau aoga mo tuuga o le tau mafanafana o lo o lumana’i nei.

 

Na fulisia uma finagalo o afioga i ali’i senatoa e pasia lenei tulafono fa’aofi, ona o le naunau ia lava se vaega tupe e fa’atupe ai polokalame mo nai fanau aoga.

 

O le fa’aiuga a afioga i senatoa  pasia le paketi fa’aopoopo na faia ina ua mae’a se iloiloga puupuu sa faia i le amataga o le vaiaso na te’a nei, lea na fesiligia ai e le Komiti o le Paketi a le Senate le Teutupe a le malo ia Dr. Falema’o Phil Pili ma sui o le Matagaluega o Tagata Faigaluega e fa’atatau i lenei mataupu.

 

Na fa’ailoa e Pili i luma o le komiti e fa’apea, o lo o agaga o le alii kovana ia Lolo Matalasi Moliga ua mafua ai ona ia talosagaina le faataga atu e le Fono o le fa’aaogaina o le tupe lenei, ina ia mautinoa e lava le tupe e faa faigaluega ai le toatele o fanau i taimi o tuuaga o aoga.

 

O le pili lenei o lo o fa’atupe mai i tupe fa’asili a le malo mai le tausaga tupe 2013, lea na mae’a i le aso 31 Setema 2103, lea e $215,000 le aofaiga e pei ona taua i ni ripoti sa tuuina atu e le teutupe i luma o le Fono.

 

Na fesili le afioga i le ali’i senatoa ia Galea’o Tu’ufuli i molimau po o aofia ai ma fanau aoga mai Manu’a i le polokalame lenei, ae na tali molimau, o lea lava.

 

O le aso Faraile na te’a nei na pasia ai e le maota o sui i le faitauga fa’alua le pili a le senate e fa’asoasoa atu ai le $200,000 e faatupe ai polokalame a le fanau, ma le faamoemoe o le taeao nei e faitau tolu ai le pili ma faia ai loa sa latou fa’aiuga fa’ai’u, o le aso mulimuli fo’i lea o le tauaofiaga lona 3 o le nofoaiga lona 33 a le Fono Faitulafono.

 

Na faatuatuai se faaiuga a le maota o sui mo lenei tulafono taufaaofi, ona sa latou manaomia se ripoti mai le Teutupe e fa’amaonia mai ai o lo o i ai le tupe e fa’atupe ai le pili tupe lenei a le faigamalo, ma o lo o lelei fo’i tulaga o tupe maua mai a le malo mo le tausaga tupe fou lenei o lo o fa’agasolo.

 

I lea ripoti o lo o taua ai e le teutupe e fa’apea, talu mai amataga o le tausaga tupe lenei 2014 seia oo mai i le aso 18 Mati na te’a nei, o lo o maualuga tupe maua a le malo nai lo ana tupe fa’aalu.

 

Mo se fa’ata’ita’iga e pei ona taua i le ripoti, e $41 miliona tupe sa fa’aalu e le malo, ae $42 miliona tupe sa mafai ona ao mai.

 

Na fa’aalia e afioga i ali’i faipule le fa’amalieina o i latou i le ripoti a le teutupe, ma latou talia ai loa i le aso Faraile na te’a nei le talosaga a le maota maualuga, ina ia fa’aauau pea la latou pili ae taofi le pili a le maota o sui lea e le i faia i ai se faaiuga, ona ua utiuti le taimi o lo o totoe o le fono ae ua manaomia le faa pasia o lenei tulafono mo polokalame a fanau aoga.

Comment Here