Ads by Google Ads by Google

Pasia Senate $2 miliona mo le LBJ ae teena $8 miliona a le Kovana

Ua pasia e le Senate i le taeao ananafi le latou pili tupe e faasoasoa atu ai le tupe e $2 miliona mo le falemai o le LBJ, i le maea ai lea ona tuuina atu o le molimau a sui o le Vaega a le Litaea, ma latou teena ai loa le pili tupe na tuu atu e le kovana, e faasoasoa atu ai le $8 miliona e fesoasoani ai i le polokalame o gasegase e auina atu i fafo a le LBJ.

O le taeao lava foi ananafi na tuuina atu ai le pili a le Senate e faitau muamua i le maota o sui ma le faamoemoe, e tatau ona oo atu i le aso Faraile lea e tapunia ai le tauaofiaga a le Fono ua pasia i le faitau tolu, ma tuuina atu ai loa i le Ofisa a le Kovana mo sana faaiuga.

E ui e le’i i ai se tino o le pili i luma  o afioga i faipule ae na faaulu lava ma faitau i lona faitauga muamua, ma ua tuu atu nei i le komiti o le litaea ma le paketi a le maota mo le latou iloiloga i le taeao nei.

O le afioga i le matua ia Togiola Tulafono o loo malaga i fafo ma le atunuu ma le faamoemoe, o le po nanei e toe taliu mai ai i fanua mai lana malaga e lua vaiaso o loo toesea ai.

O le komiti o le Paketi a le Senate na faatautaia le iloiloga mo le latou pili e toe faaopoopo ai le $2 miliona i luga o le nonogatupe e $20 miliona a le malo mai teugatupe a le Litaea.

Na taua e le taitaifono o le Komiti Faafoe a le Litaea ia Aleki Sene Sr i lana molimau e faapea, e le lagolagoina e le vaega a le litaea le pili a le kovana e toe faatulai ai se isi nonogatupe e $8 miliona mai teugatupe a le litaea, ona e le o manino i le tulafono fou lea le aofai o le pasese e totogi ai le nonogatupe, ae o afea foi e maea ai le totogiina o lea nonogatupe.

Na taua e Sene Sr e faapea, e na o le $6.7 miliona le tupe e mafai ona nono atu e le litaea i le taimi nei, ae afai e finagalo i ai le fono, o lona uiga e tatau ona faia nisi aiaiga fou mo le totogiina o lea nonogatupe, e aofia ai le tuuina atu lea o nisi meatotino fou a le malo e faamaonia ai se isi nonogatupe fou e toe fuafua.

Na fesiligia e Senatoa Velega Savali Jr le susuga Sene Sr pe fia ni paleni o loo totoe mai nonogatupe e lua a le malo o loo i ai, lea na taua ai e Sene Sr e faapea, o le nonogatupe e $10 miliona lea na fai i le 2006, toe $7 miliona ma ona tupu o loo totoe, lea o loo totogi e  le Kamupani Faitelefoni a le ASTCA, ae o le nonogatupe e $20 miliona lea na fai i le 2007, toe $13  miliona ma ona tupu o loo totoe, ma o loo totogi i le lafoga o le pia ma le ava malosi.

O le aso Lua na tea nei na fono ai le vaega a le litaea mo le talanoaina o le pili tupe lea a le fono, ma taua ai e Sene Sr  le lagolagoina lea e le vaega a le litaea o le toe faaopoopo o le $2 miliona i luga o le nonogatupe e $20 miliona a le malo o loo i ai.

O aiaiga mo le toe faaopoopo o le $2 miliona i le nonogatupe tuai a le malo lea ua pasia e le Senate, o loo aofia ai le toe faaopoopo o le pasene e totogi atu ai le nonogatupe, ae tumau pea le umi lea sa faatulaga e tatau ona maea ai le totogiina o le $20 miliona.

Saunoa Sene Sr, e $237,000 e totogi e le malo i le masina mo le $20 miliona, ae afai e pasia e le Fono ma saini e le kovana le toe faaopoopo o le $2 miliona, o lona uiga o le a totogi atu e le malo i le litaea le $272,000 i le masina mo le nonogatupe atoa lea.

Na taua e le taitaifono o le litaea e faapea, e lei i ai se talanoaga a le litaea ma le kovana e uiga i se nonogatupe e $8 miliona e fia faia, o le mafuaaga foi lena ua latou teena ai le pili tupe a le kovana, ona e le o malamalama le litaea i aiaiga uma o lea nonogatupe.

E ui na taua e le afioga i le alii Senatoa ia Paogofie Fiaigoa lona lagolagoina o le faamoemoe mo le tuuina atu o le tupe e fesoasoani ai i le falema’i, peitai o lona atugaluga tele o loo  i ai, o le aafia ai o teugatupe a le litaea pe afai e tulai mai se faaletonu i le totogiina e le malo o le nonogatupe.

I le avea ai o le alii senatoa ma se tasi o totino o le litaea, sa ia taua ai sona popolega i le ono le gafatia lea e le malo ona totogi nei mau aitalafu, o lona uiga o le a leai se mea e tua i ai tagata litaea.

Ae na saunoa Senatoa Malepeai Setu e faapea, na mafua ona faaulu e le kovana le pili e $8 miliona e faatupe mai i tupe a le litaea, aua e le o totogiina sana teugatupe i le litaea, e na o ia foi le tagata faigaluega e le o totogiina sana litaea e pei ona maua i ana suesuega, ma o lea faamalatalaga na alu ai le tali e ai molimau ma sui o le komiti.

Ina ua fesiligia e Velega le susuga Sene Sr i tagata faigaluega ua agavaa ona litaea, na taua ai le aofai e toa 70 o tagata na litaea i le tausaa 2011.

Saunoa Velega, o le isi lea faafitauli o loo feagai ma le malo, ua leai se faitotoa e ulufale atu ai ni tagata faigaluega fou i totonu, ona ua leai foi se faitotoa e ulufale ai tagata faigaluega ua litaea, peitai na taua e Sene Sr e faapea, pe toafia lava tagata e fia litaea i lea tausaga ma lea tausaga, ua sauni le teugatupe a le litaea e faatupe faamanuiaga mo i latou uma ia.