E ui na fulisia le senate i le taeao ananafi i le palota e 12-0 e pasia ai le pili a le maota o sui, e tu’u atu ai le malosi i le faigamalo latou te fa’atautaia le fa’avaeina o se Faletupe fou, peita’i o le taeao nei lea ua fa’amoemoe e feiloa’i ai maota e lua mo le talanoaina o suiga a le Senate ua teena e le Maota o Sui.

O suiga a le maota maualuga na teena e le maota o sui ananafi, e aveese atoa ai le gagana sa i totonu o le tulafono sa talosagaina e le kovana, o le avea lea o le lutena kovana, teutupe ma le fa’atonusili o le matagaluega o fefaatauaiga ma Alamanuia a le malo, o isi ia e to’afitu i ai totino o le Komiti Fa’afoe o le faletupe, a ia tu’u pea le malosi i le alii kovana na te tofia ai sui e to’afitu o le komiti fa’afoe ae fa’amaonia mai e le Fono Faitulafono.

O le agaga o le maota maualuga i le taimi na pasia ai a latou suiga, e le tatau ona ta mau i totonu o le tulafono totino o le komiti fa’afoe, ae lelei le tatala pea o le avanoa e filifili mai ai e le kovana so o se tasi na te silafia, o lo o i ai le agava’a i tulaga tau tupe e avea ma totino o le komiti fa’afoe o le faletupe.

Na taua e le afioga i le ali’i faipule ia Puleleiite Li’amatua Tufele Jr i le taimi na felafolafoa’i ai le maota o sui e fa’atatau i suiga a le maota maualuga, e tatau lava ona toe fa’afo’i le gagana o le tulafono i le tulaga sa tu’uina mai ai i le faigamalo, o le tumau lea o le avea o le lutena kovana, teutupe ma le fa’atonusili o le Ofisa o Fefa’atauaiga a le malo ma totino o le komiti fa’afoe.

“Talu ai o le faigamalo lea e taulamua i le fa’afoeina o le faletupe fou, e talafeagai le tu’u ai pea o i latou nei ua i ai le agava’a i itu tau tupe, latou te amataina mai le faletupe mo lenei taimi, ae afai e finagalo le Fono e toe fai ni suiga i le isi lua tausaga, ona toe va’ava’ai lea i ai”, o le saunoaga lea a Puleleiite na lagolagoina e le sui fofoga fetalai ia Fetu Fetui Jr ma le afioga i le ali’i faipule ia Faimealelei Anthony Fu’e Allen.

Saunoa Fetu, afai e tofia ni sui fou e avea ma totino o le komiti fa’afoe o le faletupe, e alu se taimi o tau fa’amasani latou i auala e fa’atautaia ai le galuega, ae na saunoa Faimealelei, o suiga o lo o naunau afioaga i senatoa e fai, e mafai fo’i ona toe fai i le isi lua tausaga o lo o lumana’i, pe afai e sologa lelei le faatautaiga o le faletupe.

E le gata fo’i i lea, na taua e Faimealelei sona popolega i meatotino a le malo lea o le a tu’u atu e faatautaia ai le faletupe, e tatau ona malupuipuia i lalo o le vaavaaiga a sui e to’atolu o le malo o le a avea ma totino o le komiti.

O afioga i faipule ia Vailoata Eteuati Amituana’i m Vui Florence Vaili Saulo na lagolagoina suiga a le maota maualuga.

Saunoa Vailoata e fa’apea, o le taua o suiga ua faia e le maota maualuga, o le a tatala atu ai le avanoa i le lautele o le atunu’u e avea ai i latou ma totino o le komiti fa’afoe o le faletupe.

Ae na saunoa Vui e fa’apea, o suiga a le senate ua aumai, e le o taofia ai le avanoa e toe tofia mai e le kovana le lutena kovna, teutupe ma le fa’atonusili o le Ofisa o Fefa’atauaiga a le e avea ma totino o le komiti fa’afoe o le faletupe, o le agaga fo’i lea o le ali’i peresetene ia Gaoteote Palaie Tofau i le taimi na ia fa’aleoina ai suiga a le senate i sui o le Komiti o le Pone a le malo, ia aveese le faaigoa mai o tulaga o tagata e tatau ona i ai i le komiti, ae afai lava e tofia mai e le kovana le lutena kovana, teutupe ma le faatonusili e avea ma totino o le komiti fa’afoe o le faletupe, o le tiute o le fono o le iloilo ma fai i ai la latou fa’aiuga.

O le taeao nei lea ua fa’amoemoe e komiti aoao ai maota e lua mo le talanoaina o suiga a le maota maualuga.