Pasia maota e lua I’ugafono sui ai le Fa’avae

Ua pasia nei e maota e lua se I’ugafono Soofaatasi e faatulaga ai suiga i le Faavae o Amerika Samoa, e ala i le suia lea o aso e fono ai le Fono Faitulafono mai le 45 aso o lo o i ai nei i le 60 aso.

 

E 14-0 le palota na pasia ai e le Senate la latou iugafono soofaatasi i le aso Lua na te’a nei, ae 17-0 le palota na pasia ai e le maota o sui la latou fo’i iugafono soofaatasi i le taeao ananafi, ma ua tuu atu nei le iugafono soofaatasi a le Senate e fai i ai se finagalo o le maota o sui, lea e pei ona faitau muamua i le taeao ananafi, ae ua tuu atu foi le iugafono soofaatasi a le maota o sui e fai i ai se faaiuga a le Senate.

 

I lalo o le Faavae, e tatau ona 2/3 le palota e maota ta’itasi e pasia ai le iugafono soofaatasi mo le suiga o le Faavae, e tatau foi ona manino faamaumauga uma nei i le taimi e tuuina atu ai le iugafono soofaatasi i le Ofisa o le Kovana Sili mo le tuuina atu i le palotaga i le tausaga fou.

 

O i isi vaega e pei ona taua i le Faavae e tatau ona tuu faatasi uma atu ma le iugafono soofaatasi i le Ofisa o le kovana sili, o le faitauina o le palota, o le taimi atoa ai ma le aso na pasia ai le iugafono soofaatasi i luma o maota taitasi.

 

I le Vaega II, Maga 8 o le Faavae o Amerika Samoa o lo o i ai nei, o lo o faatulaga mai ai fonotaga tetele e lua a le Fono Faitulafono i tausaga ta’itasi, ma o ia fonotaga tetele e lua e ta’i 45 aso i le fonotaga, peitai o le suiga lea ua pasia e faipule ma senatoa, o le a ta’i 60 aso fono i le fonotaga.

 

O le fonotaga muamua e amata i le aso Gafua lona lua o Ianuari o tausaga taitasi, ma le fono lona lua e amata i le aso Gafua lona lua o Iulai. E mafai foi ona aofia le fono faitulafono i se fono faapitoa pe a valaauina e le kovana, o ia lea e faatulagaina mai le taimi e amata ai se fono faapitoa ma le umi e faia ai.

 

A’o le’i pasia e le maota maualuga le latou iugafono soofaatasi i le aso Lua na te’a nei, na tulai le afioga i le taitai fono o le komiti o Tulafono a le maota, le afioga i le alii senatoa ia Nuanuaolefeagaiga S. Nua ma saunoa e faapea, o le taua o suiga ua faia i le isi vaega lenei o le Faavae, o le a tele ai aso e tauaofia ai le fono, mo le iloiloina ma le talanoaina o mataupu e manuia ai le atunuu.

 

Saunoa Nuanuaolefeaiga e faapea, atonu o se auala lelei foi lea e taofia ai le tau valaau e le kovana o sana fono faapitoa, aua e mafua ona valaau le fono faapitoa ua vave ona maea aso fono ae lei maea ona talanoaina ma pasia mataupu o lo o manaomia ona pasia e le fono.

 

I le lua vaiaso talu ai, na saunoa ai le afioga i le alii senatoa ia Galea’i M. Tuufuli i luma o le maota maualuga ma ia talosagaina le peresetene o le maota, ua tatau ona o o i le taimi e tuu atu ai i luma o le fono mataupu o le Faavae e fia fai i ai suiga, ina ia pasia e le fono ma tuuina atu loa i luma o le atunuu mo le palotaina.

 

Na taua e Galea’i e faapea, e tele mataupu taua o le Faavae e tatau ona toe iloilo e le fono mo le faia i ai ni suiga, peitai o le faafitauli na mafua ai ona le pasia i tausaga ua mavae, ona ua fefiloi faatasi mataupu taua ma isi mataupu o le Faavae, faaopoopo atu loa i ai ma le le malamalama o le atunuu i mataupu taitasi uma nei, ona fai ai lea o le faaiuga e tete’e i suiga o le faavae.

 

O le finagalo foi lea o le alii faipule mai Manu’a #2 ia Toeaina Faufano Autele i le vaiaso na te’a nei ina ua talanoaina le mataupu o le Faavae.

 

Saunoa Toeaina e faapea, e i ai mataupu taua o le Faavae e tatau ona faamalamalama i le atunuu, ina ia silafia lelei e le atunuu le taua ma le uiga o mataupu taitasi nei, ona fai lea i ai o le latou faaiuga talafeagai, nai lo le palota pogisa o tagata i mataupu e le o malamalama i ai.

 

I le vaega faaiu o le pili lea ua pasia e maota e lua, ua talosagaina ai le kovana sili ia Lolo Matalasi Moliga, ina ia faaoo atu suiga o lo o iugafono soofaatasi lenei i le mamalu o le au palota i le palota aoao o le a faia ia Novema 2014.

Comment Here