O le taeoa ananafi na pasia ai e Senatoa ma Faipule ni isi o tofiga e tolu a le kovana sili, na aofia ai le tofa a Taeaoafua Dr. Meki Solomona, lea na pasia e le Senate i le palota e 12-2 e avea ma Faatonusili o le Matagaluega o Auaunaga mo Tagata ma le Soifua Lautele; o Taimalelagi Dr. Claire Poumele e avea ma Faatonusili o le Pulega o Uafu ma Taulaga ma Faleosina Voight e avea ma Faatonusili o Galuega Lautele a le malo, lea na maua palota tai 20-0 mai le maota o sui.TAIMALELAGI DR. CLAIRE POUMELEO le iloiloga e fesiligia ai agavaa o le tamaitai fomai ia Taimalelagi na faatautaia lea e le komiti o Pulega o Uafu ma Taulaga a le maota o sui, i lalo o le taitaiga a le afioga i le alii faipule ia Talaimatai Elisara Su’aO se tasi o fesili na fesiligia e le afioga i le alii faipule o Atualevao Gafatasi Afalava, sa ia fesiligia ai le tamaitai fomai, pe aisea ua ia manatu ai e avea o ia ma faatonusili o lea matagaluega, ae o lana matata sa aoga ma faauu mai ai o le avea lea ma faiaoga.Na tali Taimalelagi e faapea, ina ua fesiligia o ia e le alii kovana i se vaega o le malo e fia tautua ai, sa ia taua ai le mataluega o Pulega o Uafu ma Taulaga, ona o se tasi lenei o ofisa o lo o faalagolago i ai le tamaoaiga o le malo i tulaga o tupe maua.O se tasi o itu sa ia faailoa i le komiti i le taimi o le iloiloga, o le fale lea na fausia i le malae vaalele i se alagatupe mai le malo tele, e faatinoina ai aoaoga mo fuimu, lea e tasi lava le taim na faaaoga ai.Na taua e le tamaitai fomai e faapea, o lea galuega e tusa ma le $16 miliona lona tau, na fausia e le vaega a le Federal Aviation Administration (FAA) ma le faamoemoe e faaaoga i aoaoga mo le au fuimu i le malae vaalele.O ni isi o tulaga na taua e le tamaitai fomai o le a vaavaai i ai, o le tulaga i le faateleina lea o i latou e maua tusi kapeteni vaa e galulue i le matagaluega.FALEOSINA VOIGHTO le iloiloga e fesiligia ai agavaa o Faleosina na faatautaia lea e le komiti o Galuega Lautele a le maota o sui, i lalo o le taitaiga a le afioga i le alii faipule ia Atualevao Gafatasi Afalava, ma o le toatele o faipule na maua le avanoa e saunoa ai, e lei finagalo e faia ni a latou fesili, sei vagana ai fautuaga ma timaiga i le molimau, i auala e faatautaia ai lana galuega.Saunoa Vaetasi Tuumolimoli Moliga e faapea, tusa lava pe agavaa se tasi i se galuega, ma ua lava lona tomai e faataunuu ai ona tiute, ae afai e aunoa o ia ma le faamaoni, alofa ma le loto maualalo, e i’u fua ana galuega uma e faia.I fautuaga a le alii faipule mai Leloaloa, sa ia fautuaina ai Faleosina ina ia alofa i lana aufaigaluega, ma ia faamuamua le atunuu i soo se manaoga e talosaga atu ai.O ni isi o faipule sa o latou talosagaina le faatonu ina ia alofagia tulaga o auala i totonu o latou itumalo o lo o faaletonu, ma o lo o manaomia le toe faaleleia.Na talosaga le alii faipule o Aunuu i le tamaitai faatonu ina ia alofagia le ofisa o Galuega Lautele a le malo o lo o i Aunuu, ina ia tofi ni tama se toa 10 e galulue ai, ina ia maua ai le fesoasoani mo lona itumalo, ae mo auala o femalagaaiga, sa ia talosagaina ai le toe fausia o le uafu i Auasi, ina ia lelei atili ai femalagaaiga i Aunuu, leaga e le mafai ona vaelua le sami ae savavali ai tagata pe a oo ina faaletonu auala o femalagaaiga.TAEAOAFUA DR. MEKI SOLOMONAO le iloiloga e fesiligia ai agavaa o le tofa a Taeaoafua Dr. Meki Solomona na faatautaia lea e le komiti o Auaunaga Lautele a le Senate, i lalo o le taitaiga a le afioga i le alii Senatoa ia Magalei Logovii, ma o le toatele o Senatoa na maua avanoa e saunoa ai, sa na o fautuaga ma timaiga na o latou tuu atu i le molimau e fesoasoani ai i le faatinoina o ona tiute e pei ona tofia o ia e le kovana e galue ai.O le toatele o afioga i Senatoa na o latou taua e faapea, o le tofa a Taeaoafua, o se tasi o alo o le atunuu ua lava lona tomai e avea ai o ia ma faatonu i le matagaluega o auaunaga lautele.Na fesili le alii Senatoa ia Faumuina Tagisiaalii i le molimau, pe fia tautua o lo o mafai ona ofo atu e lona ofisa mo le atunuu, ae na saunoa Taeaoafua, e 7 polokalame eseese o lo o faatupe mai e le feterale o lo o tuuina atu e lona ofisa mo le atunuu.Saunoa Taeaoafua e faapea, o le tulaga lelei o polokalame eseese nei, e mafai ona fesoasoani le isi polokalame i le isi polokalame mo le manuia o le atunuu.