Ads by Google Ads by Google

Pasia Fono Le’i avea ma Faatonusili Ofisa Tagata Faigaluega malo

Ua pasia nei e le Fono Faitulafono tofiga a le afioga i le kovana sili ia Lolo Matalasi Moliga, mo le tofa i le tootoo ia Le’i Sonny Thompson e avea ai o ia ma Faatonusili o le Matagaluega o Tagata Faigaluega malo.O le faamaoniaina o le tofa Le’i na te tauaveina lenei tofiga mo le isi 4 tausaga, na faia lea ina ua pasia e le Senate o ia i le aso ananafi i le palota e 10-5, ma o se palota na toeitiiti lava a le manuia ai lana taumafaiga, e ui sa tele palota na pasia ai o ia e le maota o sui i le 17-1 i le aso Lulu na te’a nei.Na faatumulia luga o le maota fono o le Senate i ni isi o le atunuu na lolofi atu e fia faafofoga i lenei iloiloga, ma o ni isi o i latou nei o sui o le Matagaluega o Tagata Faigaluega a le malo, ae o ni isi o uo ma aiga o le molimau.A’o le’i tuuina atu le faaiuga a le Senate mo le tofa Le’i, sa faataunuuina se iloiloga e le komiti o Tagata Faigaluega ma Tautua Lautele a le maota, lea na taitaia e le afioga i le Sa’o ia Magalei Logovii e fesiligia ai agavaa ma tomai o le molimau, ma o le toatele lava o afioga i alii senatoa na maua avanoa e saunoa ai, sa mafuli lava a latou saunoaga i fautuaga sa tuuina atu i le molimau, i auala e ao ona faatino ai lana galuega.Na fautuaina e le afioga i le alii Senatoa ia Soliai Tuipine Fuimaono le molimau, ina ia toe silasila i auala o lo o faafoe ai le tautua a lona ofisa, ona ua tele faitioga mai le atunuu fai mai, o pepa uma ma gaioiga a le ofisa i tausaga ua mavae, ua faatinoina uma i faiga faamiliteli.O ni isi o senatoa na o latou taua le maualuga o agavaa o le molimau e mafai ai ona avea o ia ma taitai i le matagaluega, ae o ni isi na saunoa e faapea, tusa lava pe lava le tomai o le molimau ae afai e leai se alofa ma le faamaoni, e le aoga lea.Na faaleo e le afioga i le alii Senatoa ia Saole Mila ni isi o faasea mai le atunuu ma ni isi o le aufaigaluega a Le’i e faapea, e i ai ni isi tagata faigaluega e le fiafia ia Le’i ona o ona uiga faaalia, ma e faa faigata foi i ni isi ona taumafai e talanoa atu ia te ia.Saunoa Saole e faapea, o i latou ia o lo o galulue i le ofisa lea o le a tofia Le’i e galue ai, o ni isi ua silia i la tai 20 tausaga pe sili atu foi o tautua ma galulue ai, ae o se itu e faanoanoa ai pe afai e i ai se tulaga faapea o lo o tulai mai i le va o le molimau ma ni isi o ana tagata faigaluega.I le saunoaga a Le’i sa ia taua ai e faapea, atonu e toatele le atunuu latou te silafia o ia mai ni isi o ofisa o le malo sa taitai muamua ai, o ia ma lona tagata e mulimuli lava i le tulafono, o ia foi o se taitai e tautala sa’o ma faamaoni, e le o ia foi o se tagata e faapolokiki ona manatu i le taitaiina o le galuega.“O lo o i ai tagata faigaluega o lo o i totonu o le Ofisa lenei e le o fiafia i le tofiga lenei a le kovana mo a’u e avea ma ta’ita’i, ae o le mea moni lava, o Le’i o se tagata e tautala sa’o, e le faapolokiki fo’i lo’u manatu i le faafoeina o lenei Ofisa,” o le saunoaga lea a le molimau.Na taua e le faatonu tofia e faapea, o ni isi o faaletonu ma faafitauli na alia’e mai i le ofisa lenei i tausaga ua mavae, e i ai lona talitonuga e toatele le atunuu o lo o silafia, ae atonu o le mafuaaga lena ua tofia ai o ia e le kovana e fai ma taitai i lenei ofisa, ina ia tautua le atunuu ma fai le amiotonu.Mai lana galuega sa galue ai i totonu o vaega au a le malo tele, e leai lava ni vaega na galue ai na ia faia ai ni tulaga faaauau, ae i ai lona talitonuga o fautuaga uma ua tuuina atu o le a aoga mo lana galuega.I tulaga o livi ma’i, livi tausaga faapea ai ma ova taimi, o ni isi ia o mataupu na aofia i fesili a le afioga i le sui peresetene o le maota ia Nuanuaolealofa Saoluaga, ina ua maua lona avanoa e fesiligia ai le molimau.O se tasi o mataupu na fesiligia e sui o le komiti, o le mafuaaga e ala ai ona maualuluga totogi o faatonusili nai lo totogi o Senatoa ma Faipule o le Fono Faitulafono.Na taua e le alii senatoa ia Tuiasina Esera e faapea, o se atunuu muamu lenei ua ia vaai i ai, e maualuluga atu totogi o faatonusili nai lo totogi o sui o le Fono.O lana fautuaga sa tuu atu i le Faatonusili, e sili ona fautua i le kovana ina ia toe tuu i lalo o totogi o faatonusili ina ia tutusa ma totogi o le fono, leaga ua oi nai toeaiina i le le lava o latou totogi.I le saunoaga faaiu o le iloiloga na saunoa i ai le alii peresetene o le Senate, le afioga Gaoteote Palaie Tofau, o se tasi foi o tamalii o le atunuu na malolo litaea mai i vaega au a le malo tele.I ana fautuaga sa tuuina atu i le molimau, sa ia taumafai ai e toe faamanatu taimi ao galue i vaega au a le malo tele, e pei foi o le molimau ao galue ai, i auala eseese e faatino ai e sui o le militelii tiute ma tautua e tuuina atu.I le aotelega o le saunoaga a Gaoteote sa ia taua ai e faapea, o Le’i, o se tasi o tofiga a le kovana ua lava lona agavaa e faatino ai lana galuega i le tofiga ua filifilia o ia e galue ai.I le pasia ai e le Fono o le tofa Le’i na te tauaveina lenei tofiga, ua atoa ai ia te ia le toalua o tofiga a le kovana ua maea ona pasia e le Fono. O le tofiga muamua o le afioga Vaitinasa Dr. Salu Hunkin-Finau, lea ua avea nei ma Faatonusili o le Matagaluega o Aoga a le malo.Fesootai mai i le tusitala ia ausage@samoanews.com