Pasia Fono i’ugafono talosagaina ai Faletupe Hawaii toe nofo

Ua pasia nei e le Fono Faitulafono se iugafono malilie faatasi a le Senate, e tuu atu ai la latou lagolagosua i taumafaiga a le malo ina ia fa’a tumau le tautua a le faletupe o Hawaii i totonu o Amerika Samoa.

 

O le aso Lua na te’a na pasia ai e le maota maualuga la latou iugafono, ae na pasia e le maota o sui i le aso na sosoo ai.

 

I le tino o lenei iugafono o lo o taua ai e faapea, talu mai le tausaga e 1969 ina ua faatoa tatalaina le tautua a le Faletupe o Hawaii i Amerika Samoa, ua avea ai lea auaunaga o se vaaiga tumau i soifuaga o tagata o le atunuu.

 

O tulaga manuia na molimauina i lea auaunaga a le faletupe, e le gata sa maua ai avanoa faigaluega mo le atunuu, ae sa maua ai fo’i le avanoa e agavaa ai tagata i isi tautua e pei o nonogatupe faavaitaimi, teuina o a latou tupe i totonu o le faletupe, atoa ai ma le malo ina ua fai paaga ma le faletupe.

 

Ae ina ua faalauiloa faafuase’i e le faletupe sana faaiuga o le a faamuta lana auaunaga ae tula’i ese, na matua faateia ma faanoanoa ai le toatele, ma ua atagia mai ai tulaga le mautonu i faaiuga a tagata atoa ai ma le malo, ona o auaunaga sa ofoina mai e le faletupe.

 

Ae ina ua maea ni feutanaiga sa faia i le va o taitai o le malo ma le faletupe, na toe faalauiloa mai ai loa e le faletupe, o le a toe faaauau lana auaunaga mo le atunuu i se taimi e le o mautinoa, sei faamautu lelei gaioiga a ni isi o faletupe e le i oo mai.

 

O le faaiuga a le faletupe ina ia toe faaauau lana tautua i le teritori mo sina taimi e le o mautinoa, ua tula’i mai ai lagona fiafia o tagata ina ia faatumauina loa lea tautua mo se taimi tumau.

 

E talitonu le fono, e tatau i ta’ita’i o le teritori ona tuuina atu la latou lagolagosua i taumafaiga a le alii kovana, ina ia faaauau pea feutanaiga ma le pulega a le faletupe, ina ia faatumauina lana tautua mo Amerika Samoa, ona e taua tele lana tautua mo tagata uma o Amerika Samoa e aofia ai ma le malo.

 

Saunoa le afioga i le ali’i senatoa ia Soliai Tuipine Fuimaono e fa’apea, e taua tele le i ai o le Faletupe o Hawaii i le atunuu, e fesoasoani i manaoga o tagata lautele i tulaga o tautua ma auaunaga.

 

“Ua pologa le atunuu ona ua tasi le faletupe, ua le iloa e tagata se mea o le a fai, ua manaomia le Faletupe o Hawaii ina ia tumau pea i Amerika Samoa,” o le saunoaga lea a le ali’i senatoa.

 

O se tasi o popolega a afioga i senatoa ina ua faatoa talanoaina lenei mataupu i le vaiaso na te’a nei, ina ne’i avea le aveese mai e le malo o ana teugatupe atoa ai ma le faatautaia o le totogi a le malo mai le Faletupe o Hawaii, ma itu e unaia atili ai le Faletupe o Hawaii ina ia aloaia loa lana faaiuga e tapunia lana tautua i le teritori.

 

Ua i ai le faamoemoe o le senate o le a faia sa latou feiloaiga ma le teutupe a le malo ia Dr. Falema’o ‘Phil’ Pili, se’i fesiligia i le mafuaaga ua ala ai ona fai le faaiuga e aveese mai le faatautaiga o le totogi a le malo mai le Faletupe o Hawaii ae tuuina atu i le faletupe o le Zion Bank i Amerika.

Comment Here