Ads by Google Ads by Google

Pasia Faipule Pili e fa’asala ai Sponsor o tagata ua ova aso

O le vaiaso na te’a nei na pasia ai e le Maota o Sui se tulafono e fa’aulutalaina e fa’apea, o se tulafono e fa’asala ai sponsor o tagata mai fafo ua ova aso no nonofo ai i le teritori mai le umi o le pemita sa tuuina atu e malaga mai ai, ma o le tupe o le a maua mai i nei sala o le a totogiina atu i le Teutupe a le malo, ina  ia teuina i se teugatupe faapitoa, e fesoasoani mo le faatupeina lea o galuega tetele mo atina’e a le malo.

E 13-0 le palota na pasia ai e le maota o sui lenei tulafono, ma ua faamoemoe o le a tuuina atu i le Senate mo le faia i ai o sa latou faaiuga.

I se vaega faaopoopo i le tulafono o loo i ai mo sponsor o loo latou aumaia tagata i le teritori o loo taua ai e faapea, afai ae faamaonia ua soli e le tagata mai fafoi tuutuuga o le pemita na faataga atu e le Komiti Faafoe a le Vaega o Femalagaaiga e ulufale mai ai i le teritori, ona faasalaina loa lea o le sponsor i faasalaga nei.

Afai o se tagata o loo fai ma sponsor mo le tagata mai fafo, afai ae faamaonia ua ova aso ua nofo ai le tagata mai fafo i le teritori, e $10 i le aso mo le umi lea ua ova ai le tagata mai fafo o le a faasala ai le sponsor.

Ae afai o se kamupani sa sponsor ina le tagata mai fafo lea ua ova aso, e $100 i le aso mo aso uma ua ova ai lana nofo o le a faasala ai.

Saunoa le afioga i le alii faipule ia Tuumolimoli Saena Moliga e fa’apea, o nisi o mafuaaga ua ala ai ona manatu le komiti e tuuina atu lenei tulafono i luma o le maota e fai i ai so latou finagalo, ona o nisi o faafitauli o loo tulai mai i le atunuu e mafua mai o tagata mai fafo.

Mo se faataitaiga e pei ona saunoa le alii faipule, o le silia lea i le to’a 1,000 tagata mai fafo ua ova aso ae o loo nonofo pea i le teritori i le taimi nei, faapea ai ma le silia i le $6 miliona aitalafu a tagata mai fafo i pili a le falemai e le’i totogiina.

I se molimau a le afioga i le Loia Sili ia Fepulea’i A. Ripley faapea ai ma le Pule o le Ofisa o Femalagaaiga ia Ufuti Faafetai i luma o le komiti ina ua molimau i lenei mataupu, sa la taua ai e faapea, o le taimi nei, ua silia i le to’a 1,000 tagata mai fafo ua faamauina ua ova aso o loo aumau ai i le teritori, ina ua maea le aso 30 o le pemita lea sa malaga mai ai.

Na taua foi i se molimau mai le pulega a le falemai o le LBJ i luma o le maota o sui e faapea, o se tasi o vaega tele o aitalafu ua faamaonia le le toe mafai e le falema’i ona aoina ai, o aitalafu ia a tagata mai fafo lea ua toe foi atu i o latou atunuu, lea e tusa ma le $6 miliona le aofa’i.

O nisi o faafitauli e pei ona taua e le komiti i le taimi o le iloiloga, o nisi o loo tuuaia i solitualfono mamafa eseese i le atunuu, o tagata mai fafo ua ova aso talu ona aumau i le teritorti, ma o le isi lea tupe tele a le malo o loo alu i le tausiga o i latou nei ao taofia ai i le toese.

Na faamanino e le afioga Ufuti i luma o le komiti e faapea, i lalo o le tulafono mo sponsor, o ia tonu lea e gafa ma le tausiaina o le tagata mai fafo i le taimi e ulufale mai ai i le teritori. O a uma pili ma tulaga tau tupe e manaomia e le tagata mai fafo, o le sponsor e tatau ona gafa ma le faatinoina o lea fatuaiga tausi e pei ona ia malie ai e aumai le tagata mai fafo.

O se tasi o faafitauli na taua e sui o le komiti ua maitauina i le taimi nei, o le aumai lea e le sponsor o le tagata mai fafo ona nofo lea o le tagata lea i le isi nuu ma le isi aiga, ae ese foi le nuu e nofo mai ai le sponsor, ma o nisi o faafitauli o loo aafia ai tagata mai fafo, e tutupu ae aunoa ma le iloa e le sponsor.

Talu ai o le tulaga taua ma le aoga tele o lenei tulafono, o le a taualoa i le aso lava e pasia ai e le Fono Faitulafono ma sainia e le alii kovana.

O le afioga ia Tuumolimoli ma le afioga ia Faimealelei Allen na faauluina lenei tulafono taufaaofi.