Ua pasia e le maota o faipule i le vaiaso nei le pili tupe na faaulu e le alii kovana, e faasoasoa atu ai le aofaiga e $100,000 e faatupe ai nisi o manaoga taua e pei ona fuafuaina e le malo, e pei o le $50,000 e faamaea ai le fausiaina o le Fale Samoa a le malo i Utulei, ma le $50,000 mo le au taaalo football a tamaiti aoga lea na auina atu i Ausetalia i le vaiaso na tea nei.

E 12-6 le palota na pasia ai e le maota o sui lenei pili, ma ua i luma nei o le maota maualuga mo sa latou faaiuga.

O faipule na o latou teena le pasiaina o lenei pili tupe e aofia ai Maneafaiga Faoa, Tapumanaia Galu Satele, Galumalemana Bill Satele, Vaamua Henry Sesepasara, Vailoata Amituana’i ma Taotasi Archie Soliai.

Ina ua maea se iloiloga sa faia e le komiti o le Paketi a le maota o sui i le vaiaso na tea nei, na faia ai loa sa latou faaiuga o le a taoto se faaiuga i le pili sei vagana ua tauaao e le komiti ripoti mai le Ofisa o Mataupu Tau Samoa, i le faaaogaina o le $250,000 mai le Initeria lea na fausia ai le Fale Samoa i Utulei.

E ui e toatele nisi o faipule sa lagolagoina le tatau lea ona tuuina atu o se fesoasoai mo le au taaalo a tamaitai aoga e i lalo o le 19 tausaga lea na malaga atu ma o latou faatailaloina le au taaalo a Ausetalia i le aai o Brisbane, peitai sa toatele foi na o latou fesiligia le mafuaaga ua toe manaomia ai e le kovana se isi $50,000 e faamaea ai le fausiaina o le fale Samoa.

Saunoa nisi o faipule, afai e i ai nisi manaoga e tatau ona ave i ai le faamuamua a le Fono i le taimi nei i le itu tau tupe, o le mataupu lea i le falemai o le LBJ, e le gata e le o tulaga lelei mai lava le faafitauli tau tupe o loo latou feagai, ae o lea foi ua toe faamalumalu mai le isi faafitauli tele i le faaitiitia lea o itula faigaluega a tagata.

O le pili tupe lea ua pasia e le maota o sui, o loo faamoemoe le alii kovana e faatupe mai i vaega tupe sa ia teena mai le  Paketi o le Tausaga Tupe lenei 2012, ina ua toe fesuiai e le Fono le faaaogaina o ia vaega tupe, mai lalo o Polokalame Faapitoa.

Sa manatu le Fono e faasoasoa atu le tupe lea e fesoasoani ai i femalagaaiga mo Swains Island ae o le isi vaegta e faaopoopo ai totogi mo leoleo nuu, peitai o ia fuafuaga uma na teena e le alii kovana.

Ina ua teena e le kovana suiga ia a le Fono, na faaulu ai loa e le Senate sa latou pili tupe e faasoasoa atu ai le tupe e $253,000 lea ua teena e le kovana le auala e faaaoga i ai, e tuuina atu mo le falemai mo le LBJ, peitai sa toe teena foi e Togiola le faaiuga lea a le Fono.

Saunoa le alii peresetene o le Senate ia Gaoteote Palaie Tofau i le taeao ananafi e faapea, tusa lava pe ua teena mai e le alii kovana le pili tupe lea a le Fono, e finau lava le fono e toe faapasia ina ia teena ai le malosi faa kovana na te teena ai se pili e pasia atu e le Fono.

E le o taliaina e le Senate le fuafuaga a le kovana e toe faasoasoa  atu ai le $100,000 mo manaoga e pei ona taua, e pei ona saunoa Gaoteote i luma o le maota.