Pasia Faipule ia Talauega Ale avea ma Loia Sili

E 19-0 le aofa’i o le palota a afioga i Faipule o le Maota o Sui i le aso Faraile na te’a nei, na latou pasia ai tofiga a le afioga i le kovana sili, mo le susuga ia Talauega Eleasalo Ale e avea ai o ia ma Loia Sili a le malo o Amerika Samoa.

 

O se tasi o vaega na taua e Talauega o lo o taula’i i ai lana vaai pe afai ae pasia e le Fono tofiga a le kovana mo ia, o le taumafai lea e faamalosia tulafono a le malo o lo o i ai i soo se vaega, e aofia ai ma tulafono tau i Femalagaaiga.

 

“E le faapea e le i faamalosia tulafono a le malo i nofoaiga ua mavae atu, ae i lo’u talitonuga, e tatau ona saga faamalosia tulafono ina ia mafai ai ona puipuia le malo mai le ono aafia i ni tulaga e ono tula’i mai,” o le tali lea a Talauega ina ua fesiligia e le afioga i le alii faipule ia Puleleiite Li’amatua Tufele Jr i sona finagalo, i ni lu’itau e ave i ai lana faamuamua pe afai e avea o ia ma Loia Sili a le malo.

 

O le iloiloga e fesiligia ai agavaa o Talauega, sa faatautaia lea e le komiti o mataupu tau Tulafono a le maota o sui, i lalo o le taitaiga a le afioga i le taitai komiti ia Vui Florence Vaili Saulo.

 

Saunoa le afioga i le faipule ia Faimealelei Anthony Fu’e Allen ma viia Talauega i le tulaga sa faaalia ai sona finagalo i le iloiloga sa faia a le maota o sui i le vaiaso ua te’a, i le tulafono taufaaofi e faataga ai ona aumai i le atunuu le ‘faga ea’ e faaaoga e tagata fai faatoaga.

 

Na taua e Faimealelei e faapea, o ia e le masani ia Talauega, ae ina ua faailoa lona finagalo e faatatau i le tulafono taufaaofi lea, na tula’i mai ai i lona mafaufau, o Talauega le ulua’i loia ua molimau i luma o le maota o sui ua manaia ona manatu faaalia, ma ua atagia mai ai sa fai lana meaaoga (home work).

 

O ni isi o faipule e leai ni a latou fesili faasaga i le molimau, sei vagana ai lo latou faafetaia o le susuga a Talauega ina ua mafai ona toe fo’i mai i Amerika Samoa e tautua ma galue ai, i le tuana’i ai o tausaga e tele sa galue ai i Amerika.

 

Na talosaga le afioga i le alii faipule ia Vailoata Eteuati Amituana’i i le alii loia, ina ia silasila toto’a i tagata mai Asia o lo o aumai e galulue i faatoaga i totonu o le atunuu, ona ua maitauina le tele o faafitauli o lo o tutupu mai ai.

 

Mo se faataitaiga e pei ona saunoa Vailoata, o isi tagata Asia na aumai e galulue i faatoaga, peitai ua ese galuega lea ua ave i ai latou e galulue ai, ma o nisi fo’i a o atu sui o le Ofisa o Femalagaaiga e faatino a latou galuega, ae taufetuli ma sosola e le manana’o e maua i latou ona o tulaga faaletonu i latou pepa nofomau.

 

Na lagolagoina e le afioga i le alii faipule ia Atualevao Gafatasi Afalava le finagalo o Vailoata, i le tatau lea ona mata’itu e le Ofisa o le Loia Sili ma le Ofisa o Femalagaaiga mataupu e faatatau i tagata mai Asia ua faatupulaia i le atunuu.

 

I le tulaga o tulafono sa pasia e le fono e ao ona faamalosia e le ofisa o le loia sili, sa fautuaina ai e le afioga i le alii faipule ia Larry Sanitoa ia Talauega, ina ia silasila toto’a i le paketi faaopoopo (supplemental) lea na pasia e le Fono i le tausaga na te’a e totogi ai ni isi o aitalafu ma fuafuaga a le malo, e aofia ai ma faaiuga sa tuuina mai e le faamasinoga e tatau ona totogi, e pei o le mu i le Laufou, peitai o lea ua maua le tala e le i totogiina e le malo se tupe i le mu o le Laufou.

 

Ina ua fesiligia e Sanitoa ia Talauega e faatatau i le mataupu i le mu i le Laufou atoa ai ma le talosaga Apili lea ua i luma o le faamasinoga, na taua ai e le alii loia le le mafai ona ia taliina o lea fesili, ina ne’i avea ma itu e faalavelave ai i le talosaga a le malo ua i luma o le faamasinoga.

 

Ina ua maua le avanoa o le afioga i le alii faipule ia Taotasi A. Soliai e fesiligia ai le alii loia, sa ia tapa ai se finagalo a Talauega, pe na te lagolagoina finagalo mai ni isi o le atunuu, ua tatau ona tuu eseese galuega a le Ofisa o le Loia Sili ma le Ofisa o Femalagaaiga, ina ia taula’i lava le silasila a le Ofisa o le Loia Sili i tulaga o tulafono, ae taula’i le silasila a le Ofisa o Femalagaaiga i tulaga o tagata mai fafo.

 

Saunoa Talauega e faapea, e taua tele finagalo o le atunuu e uiga i lea mataupu, ae i lona talitonuga, o tatau lava ona i ai le Ofisa o Femalagaaiga i lalo o le faamalumaluga a le Ofisa o le Loia Sili, ona o lo o aofia ai tulaga o tulafono mo tagata mai fafo e ulufale mai i le atunuu.

 

O le taeao nei lea ua faatulaga e faia ai le iloiloga a le Senate mo Talauega, i lalo o le taitaiga a le afioga i le alii senatoa ia Soliai Tuipine Fuimaono o le ta’ita’i komiti.

Comment Here