Ua aloaia nei e le Fono Faitulafono tofiga a le afioga i le kovana sili ia Lolo Matalasi Moliga, mo Talauega Eleasalo Ale e avea ma Loia Sili a le malo, ma Ali’itama Sotoa e avea ma Faatonusili o le Ofisa o le Enetia a le malo, ina ua pasia e le Senate i laua i le taeao ananafi.

E 14-0 le palota mo Talauega ae 13-1 le palota na pasia ai Ali’itama. O le aso Faraile na te’a nei na pasia uma ai i laua e afioga i Faipule o le maota o sui i le palota e ta’i 19-0.

A’o le i pasia e le Senate ia Talauega ma Ali’itama i le taeao ananafi, na mua’i faatautaia ni iloiloga a le Senate. Na faatumulia luga o le potu fono a le Senate i le mamalu o aiga ma uo o molimau e to’alua, lea na lolofi atu e lagolago ma tapuaia taumafaiga a i laua nei e tusa ai o tofiga a le alii kovana.

ILOILOGA A TALAUEGA ELEASAO ALE

O le itula e 8:30 na faatautaia ai le iloiloga mo le tofa a Talauega, i luma o le komiti o Mataupu Tau Tulafono a le Senate, lea na taitaia e le afioga i le alii Senatoa ia Soliai Tuipine Fuimaono o le ta’ita’i komiti.

Ina ua maua le avanoa o le tofa a Talauega e saunoa ai, sa ia faafetaia le alii kovana e tusa ai o le avanoa ua mafai ai ona tofia o ia e fai ma Loia Sili a le malo, ma o se avanoa lelei lea e ofo atu ai lona soifua e auauna ai mo Amerika Samoa.

“Ou te faalagolago i le ta’ita’iga a le Atua mo a’u, faatasi ai ma faamanuiaga mai ia te outou o tamali’i o le atunuu, ina ia manuia ai la’u galuega, ae ua ou sauni e ofo atu lo’u ola e tautua ai Amerika Samoa,” o ulua’i saunoaga ia a Talauega i luma o le komiti.

O le to’atele o afioga i Senatoa na maua avanoa e tulei saunoa ai i le taimi o le iloiloga, sa na o viiviiga mo Talauega e tusa ai o agava’a e tele ua ia ausia e faatino ai le galuega, atoa ai ma le faautautaga loloto mai le afioga i le alii kovana, ina ua a’e se tofa na te tofia ai lenei tama fanau a le atunuu e avea ma Loia Sili.

“O oe o le lupe faalele a Amerika Samoa na auina atu i fafo, e saili mai le poto ma le atamai e tautua ai le atunuu, lea ua e toe fo’i mai i lou atunuu, alo ane laia e faatino lau galuega, faamuamua le Atua, alofa i le atunuu ma ia fai le amiotonu,” o upu faamanuia lea a le afioga i le alii Senatoa ia Tuiasina S. Esera, lea fo’i na lagolagoina e le afioga i le alii Senatoa ia Laolagi Fonoti Savali Vaeao ina ua maua lona avanoa e saunoa ai i le molimau.

Na taua e Laolagi le faagae’etia o ia ina ua faitau atu i talaaga o le soifua galue atoa ai a’oa’oga na oo i ai le ali’i loia, ma ua momoli mai ai se feau i lona loto, o Talauega, o le tagata talafeagai lea mo le tofiga o le Loia Sili.

O se tasi o itu lelei na viia e Laolagi i le alii loia, e ui e laititi lona soifua, ae sa tele se taimi na latou galulue ai ma ni isi o tamali’i o le atunuu sa avea muamua ma Loia Sili a le malo i ni taimi ua mavae atu, e pei o le afioga ia Fepulea’i A. Ripley atoa ai ma le afioga i le Aloali’i ia Afoa Suesue Lutu, lea na faamavae ma le tofi o le Loia Sili i le masina o Tesema 2013, ina ua ia talia le tofiga e avea ai o ia ma Senatoa mo lona Itumalo o le Maoputasi.

Na taua e Soliai e faapea, e le o toe maua gofie i le taimi nei ni tama fanau o le atunuu e pei o Talauega, o le maua o le poto ma le atamai i aoga ma galuega i fafo, ona toe fo’i mai lea e tautua le atunuu na soifua a’e ai.

O le tele o faamanuiaga na momoli e afioga i Senatoa i le tofa a Talauega, o le fautuaina lea o ia ina ia tausisi i le faamaoni ma ia alofa ia Amerika Samoa.

ILOILOGA A ALI’ITAMA SOTOA

I le iloiloga a le susuga a Sotoa i luma o le maota o sui i le vaiaso na te’a nei, na matua viia ai o ia e afioga i Faipule, ona o le tomai ma le agava’a ua ia maua e faatinoina ai le galuega.

I ulua’i saunoaga a le molimau i luma o le komiti o le ASPA/TEO a le maota o sui, na faailoa ai e Sotoa e faapea, o lo o i ai le faamoemoe e tatau ona o o atu i le tausaga e 2016-2017, ua le toe faaaogaina se suauu e ola ai le eletise mo le motu o Manu’a, ae o le a faaaoga i ai le malosi e maua mai i ni isi o malosiaga e pei o le la po o le savili fo’i (renewable energy) e pei ona latou galulue soosoo tauau ai ma le Pulega o le Eletise ma le Suavai (ASPA) i le taimi nei.

Na taua e Ali’itama i luma o le komiti e faapea, afai e taunuu nei fuafuaga, e ono faaitiitia le tau o le eletise mo Manu’a i le 50-60%, ma o se tulaga lelei lea mo tagata o le motu i Manu’a.

O le tele o faipule e leai ni a latou fesili i le molimau, se’i vagana ai faamanuiaga sa latou ofoina atu mo ia mo lana galuega.

Na fautuaina e le alii faipule mai Manu’a ia Fetui Fetu Jr le molimau, ina ia aua ne’i mulimuli i tulaga vae o ni isi o Faatonu sa muamua atu i le Ofisa lea, e na o le tele o tala ae leai ni galuega e faatino mo le atunuu.

O le taeao ananafi na faia ai le iloiloga a le Senate ma e tele faamanuiaga mai afioga i senatoa sa tuuina atu ia Sotoa.