Ads by Google Ads by Google

Pasia e le Fono tofiga Afoa Lutu ma Motusa Nua

Ua pasia nei le afioga i le Aloalii ia Afoa Leulumoega Suesue Lutu e avea ma Loia Sili o le malo mo le isi fa tausaga, atoa ai ma le susuga CSM. Motusa Tuileama To’atolu Nua e fai ma Faatonsili o le Matagaluega o le Soifua Maloloina a le atunuu, ina ua pasia i laua i luma o maota e lua i le aso ananafi.ILOILOGA A AFOA LUTUO ananafi na molimau ai le afioga a Afoa i luma o le Komiti o Tulafono a le Senate, i lalo o le taitaiga a le alii Senatoa ia Soliai Tuipine Fuimaono ma sa ia fa’ailoa ai, ua maea ona ia tu’uina atu sana tusi faamavae i le malo o Kolea e tusa ai ma lona tofiga o lo o umia nei, o se loia fautua mo tagata Kolea i totonu o Amerika Samoa.O le tusi a Afoa na tuuina atu i le taimi na amata mai ai sailiga tofi a le atunuu i le tausaga na mavae.Na fesili Magalei Logovii ia Afoa, pe na te lagolagoina le finagalo o le alii Komesina o Leoleo, ua oo i le taimi ua tatau ai ona faaaupegaina leoleo. Sa saunoa Afoa, e le o maua sona manatu e faatatau i lea mataupu, ae atonu o se taimi o i luma ona toe oo atu lea i luma o le Senate e faaleo sona finagalo e uiga i lenei mataupu. E 16-1 le palota na pasia ai e le Senate ia le afioga Afoa.ILOILOGA A CSM. MOTUSA TUILEAMA NUAO ananafi foi na molimau ai Motusa i luma o le Komiti o le Soifua Maloloina/LBJ a le maota o sui, i lalo o le taitaiga a le alii faipule ia Maugaoalii Leapai Tusipa Anoa’i.Na fesiligia ai o ia e le alii faipule mai i Aunu’u, le susuga Talaimatai Elisara Su’a, po o i ai se fuafuaga e faatu se falema’i i Aunu’u, e fesoasoani i tagata o Aunuu pe a oo ina faaletonu le tau ma le mafai ona malaga mai ni vaa i Tutuila.Na saunoa Motusa, o le asiasiga a lona ofisa mo Aunuu i le masina o Mati o le a faamautuina ai le tali o lea fesili.Na taua e Talaimatai e faapea, afai ua i ai taavale falema’i mo Tutuila ma Manu’a, ua tatau foi ona fai se va’a falema’i mo Aunu’u.Na fa’ailoa foi e Motusa, ina ua fesiligia o ia e Vui Florence Vaili Saulo e uiga i le falema’i i Tafuna, le i ai o ni isi fuafuaga faataoto mo falema’i i Tafuna, Leone ma Amouli, e faalautele ai la latou tautua e pei o vaega Su’etoto, Foma’i Nifo, ma le faia o Fa’ata (X-ray), ina ia faaitiitia ai le tuli tasi mai o le falema’i i Fagaalu.Na faapea foi ona fautuaina e le Sui Fofoga Fetalai ia Talia Faafetai Iaulualo ia Motusa, ina ia taga’i i le faafitauli o lo o feagai ma Manu’a, o le le manino po o ai o lo o gafa ma le aumaia o gasegase tigaina mai Manu’a, po o le “Public Health” po o le LBJ.Na saunoa Talia, e tatau ona i ai se maliliega tusitusia i le va o vaega nei e lua e faamautu ai tiute tauave mo tagata Manu’a.Na fesili le alii faipule ia Lemapu Suiaunoa Talo i le molimau, pe finagalo e faia suega o le HIV mo tupulaga e i lalo o le 18 tausaga le matutua, lea e le o faatagaina e le tulafono i le taimi nei, ae na saunoa le molimau, o se mataupu taua tele lea tulaga, ae tatau ona latou galulue faatasi ma le Matagaluega o Tautua Lautele ma le LBJ e uiga i lenei mataupu.Na faailoa e Motusa i le komiti e faapea, e le o i ai se mataupu e aafia ai le HIV o i ai i le atunuu i le taimi nei, ae afai o le tulafono lea e mafua ai le faafitauli, o le a latou galulue ma le LBJ mo le tuuina atu o sa latou fuafuaga faataoto i le Kovana ma le Fono e tusa ai o lenei mataupu.E 19-0 le palota na pasia ai e Faipule ia le tofiga o le Faatonusili fou o le Matagaluega o le Soifua Maloloina.