Ads by Google Ads by Google

Pasia e le Fono le faaopoopo 2% i siaki tagata litaea

O le taeao ananafi na tau fai pasia ai e le Senate (15-0) ma le Maota o Sui (15-1) a laua pili e faaopoopo ai le 2% i siaki a tagata litaea.

 

O le iloiloga a le senate sa taitaia e le afioga i le alii senatoa ia LeAtualevao S. Asifoa o le sui ta’ita’i komiti, a’o le iloiloga puupuu a le maota o sui na taitaia lea e le afioga i le alii faipule ia Fagasoaia F. Lealaitafea o le taitaifono o le komiti o le litaea.

 

Na tau fai talitonu senatoa ma faipule i le taua o lenei 2% ua faaopoopo i siaki a tagata litaea, ona o le tulaga sa i ai la latou tautua mo le malo i tausaga ua mavae a’o galulue mo le malo.

 

Saunoa le alii senatoa ia LeAtualevao e faapea, o le faaopoopoga e 2% lea ua i luma o le fono, “o se tali atu lea a le malo i le tautua sa pagatia ai tama ma tina o le atunuu,” ae na taua  e le alii faipule mai Manu’a ia Toeaina Faufano Autele e faapea, o le faaopoopoga e 2% ua pasia e faipule, “o se meaalofa e tusa ai o le tautua a i latou ua malolo litaea.”

 

I le taimi o folafolaga a le maota o sui, na saunoa ai Taotasi Archie Soliai e faapea, na te le lagolagoina lea siitaga, ona o a’afiaga i le teugatupe a le litaea pe afai ae faaopoopo lenei 2%.  E talitonu le alii faipule, e i ai ni isi o mataupu e tatau ona faamanino mo le nofo malamalama a le atunuu faapea faipule e le’i maua le avanoa e faimalaga atu ai i le fono sa faia i Hawaii, e aofia ai le faamanino o le auala o lo o faaaoga e agavaa ai le tagata i le tupe o le litaea (funded ratio), e tatau foi ona faamanino le $632,143.00 lea e le o uma ona totogi atu mo le litaea.

 

Na ta’ua e Taotasi, i le ripoti a le Suetusi mo le tausaga e 2011, o lo o ta’ua ai le $19 miliona na leiloa mai i le teugatupe a le litaea, ona o le fesuiaiga o aseti (change in net assets).  Ae i le 2009, e pei ona ta’ua i le ripoti, e 98.9% le ‘funded ratio’ sa faaaoga, peitai i le 2012, ua itiiti ifo i le 80% le aofai ua i ai le galueina o tupe, ma o le isi lea tulaga e tatau ona matua faamalamalama i le atunuu.

 

Na lagolagoina e le alii faipule ia Larry Sanitoa le finagalo o Taotasi, e tatau ona faia se iloiloga a le komiti o le litaea e faamalamalama ai tulaga o le ripoti.

 

A’o le’i saunoa Fagasoaia e talia le talosaga a Taotasi mo se iloiloga, sa ia toe faamausali le talitonuga, o lo o tulaga lelei teugatupe a le litaea. Fai mai Fagasoaia, e tusa ma le $209 miliona le aofai o le tupe a le litaea o lo o i ai i le taimi nei, lea e pei ona faalauiloa ane i le fonotaga faaletausaga sa faia i Hawaii i le lua vaiaso talu ai, lea foi na faatasi atu i ai ni isi o senatoa ma faipule o le fono.

 

Sa ia taua foi e faapea, o Amerika Samoa o lo o numera tasi i setete ma teritori a le malo tele i le tulaga lelei ma le maualuga o lana teugatupe mo le litaea.

 

Sa na’o Taotasi na te’ena i le pili i le taimi o le palota, ma e lei faatulaga mai e le taitai komiti se aso mo le iloiloga e pei ona talosagaina e Taotasi